ក្រុងសាន់ត្យាហ្គោ: ខណៈពិភពលោកកំពុងរងការរីករាលដាលនៃវីរុសកូរ៉ូណា ប្រជាជនដែលសម្ងំនៅផ្ទះធ្វើឲ្យចរាចរណ៍ផ្លូវថ្នល់ស្រឡះស្ងាត់ជ្រងំនោះ ស្រាប់តែមានសត្វខ្លា ព្រៃ Puma ត្រូវបានប្រទះឃើញដើរតាមផ្លូវដ៏ស្ងាត់ជ្រងំនានា នៃទីក្រុងសាន់ត្យាហ្គោ ដើម្បីរកអាហារ។ នេះបើយោងតាមអាជ្ញាធរស៊ីលីបានឲ្យដឹងកាលពីថ្ងៃអង្គារ។
ប្រទេសស៊ីលី កំពុងតែកំហិតសកម្មភាពប្រជាពលរដ្ឋដើម្បីការពារការឆ្លងវីរុសកូរ៉ូណាជាសកល។
សត្វខ្លា Puma អាយុប្រមាណជាង ១ ឆ្នាំ និងទម្ងន់ជាង ៣៥ គីឡូក្រាមនេះ ត្រូវបានគេសន្និដ្ឋានថា មកពីតំបន់ភ្នំជុំវិញរដ្ឋធានី។
លោក Marcelo Giagnoni នាយករដ្ឋបាលកសិកម្ម និងសត្វពាហនៈ ដែលចូលរួមក្នុងកិច្ចការចាប់សត្វខ្លា Puma ជាមួយប៉ូលិស និងកម្លាំងសន្តិសុខពីសួនសត្វជាតិ បានឲ្យដឹងថា៖ «ពួកវាត្រឡប់មកកាន់ទឹកដីដែលធ្លាប់តែជាជម្រកពួកវា ហើយយើងបានវាតទីយកមកធ្វើជារបស់យើង»។
លោកបានបញ្ជាក់ថា៖ «សត្វខ្លា Puma ១ ក្បាលនេះ មានសុខភាពល្អជាទេ»។
កាលពីឆ្នាំមុន សត្វខ្លា Puma ក៏ត្រូវបានគេសង្គ្រោះពីដើមឈើខ្ពស់ នៅតំបន់សម្បូរប្រជាជនរស់នៅឯភាគខាងកើតក្រុងសាន់ត្យាហ្គោ។
គេពុំបានដឹងពីមូលហេតុដែលនាំឲ្យវាជាប់លើដើមឈើនោះទេ តែសត្វព្រៃដ៏កាចសាហាវនេះបានឈរសម្លឹងមនុស្សពីលើមែកឈើប្រមាណ ១៥ ម៉ោង មុនពេលដែលអាជ្ញាធរសម្រេចបាញ់ព្រួញថ្នាំសណ្ដំ ទម្លាក់វាមកលើពូកពីកម្ពស់ ១៨ ម៉ែត្រ។
សត្វខ្លា Puma ១ ក្បាលនោះត្រូវបានលែងចូលព្រៃវិញ ដោយបំពាក់នូវឧបករណ៍តាមដានទីតាំង ប៉ុន្តែគួរឲ្យសោកស្ដាយ វាបានស្លាប់កាលពីប៉ុន្មានសប្ដាហ៍មុន៕