ក្រុងទូលូស៍៖ បុរសបារាំងម្នាក់ ដែលបានព្យាយាមដើរពីប្រទេស បារាំង ឆ្លងទៅកាន់ទឹកដីអេស្ប៉ាញ ដើម្បីទិញបារីតម្លៃថោកៗនោះ ត្រូវបានសង្គ្រោះនៅតំបន់ភ្នំ Pyrenees ហើយត្រូវពិន័យពីបទល្មើសបម្រាមធ្វើដំណើរអំឡុងពេលមានការរីករាលដាលនៃវីរុសកូរ៉ូណា។
ប្រជាជនរស់នៅភាគខាងត្បូងប្រទេស បារាំង ជាច្រើន ឆ្លងកាត់ព្រំដែនទៅទិញបារី ស្រា ម្ហូបអាហារ និងប្រេង ដែលមានតម្លៃថោកនៅអេស្ប៉ាញ។
បុរសម្នាក់នោះ ដើមឡើយចេញដំណើរពីផ្ទះដោយការជិះរថយន្តពីតំបន់ Perpignan ភាគខាងត្បូងប្រទេស បារាំង កាលពីថ្ងៃសៅរ៍ ទៅកាន់តំបន់ La Jonquera នៅប្រទេស អេស្ប៉ាញ។
លោកត្រូវបានឃាត់ខ្លួននៅប៉ុស្ដិត្រួតពិនិត្យ ប៉ុន្តែមិនអស់ចិត្តក៏បន្តធ្វើដំណើរដោយថ្មើរជើងឆ្លងភ្នំនៅតំបន់ព្រំដែនប្រទេសទាំងពីរ។
កងសង្គ្រោះរបស់បារាំង បានសរសេរនៅលើបណ្ដាញសង្គម Twitter ថា៖ «បុរសនោះធ្លាក់ចូលស្ទឹង និងដើរកាត់ព្រៃបន្លា រហូតដល់វង្វេងផ្លូវ»។
ឧទ្ធម្ភាគចក្រត្រូវបានបញ្ជូនទៅសង្គ្រោះបុរសនោះ ដែលកំពុងតែវង្វេងផ្លូវទាំងអត់ឃ្លាន ហើយរងារឯការនៅក្នុងព្រៃតែម្នាក់ឯង។
ក្រោយពីត្រូវបានសង្គ្រោះត្រឡប់មកវិញ បុរសគំរិះកេងចំណេញរូបនោះត្រូវបានពិន័យជាប្រាក់ ១៣៥ អឺរ៉ូ (១៤៦ ដុល្លារ) ដែលល្មើសបម្រាមតម្រូវឲ្យនៅផ្ទះ។
ករណីលើកនេះ បានធ្វើឲ្យអាជ្ញាធរបន្ដអនុវត្ដវិធានការដាស់តឿនប្រាប់ដល់ពលរដ្ឋជាថ្មីថា៖ «យើងសូមក្រើនរំឭកម្ដងទៀតថា សុំឲ្យនៅផ្ទះដាច់ខាត!»៕ AFP/HR