មនុស្សម្នាមកមើលឆ្នេរសមុទ្រ ដែលល្បីប្រចាំទីក្រុងជិនណៃ។ រូបថត AFP
.jpg)
ក្រុងជិនណៃ៖ រយៈពេល ៤ ថ្ងៃ ហើយគិតត្រឹមថ្ងៃចន្ទ ពពុះសក្បុសបានលេបត្របាក់ឆ្នេរសមុទ្រដ៏ល្បីរបស់ឥណ្ឌា នៅក្រុងជិនណៃ បង្កើតបានជាទិដ្ឋភាពបំពុលបរិស្ថានដ៏គួរឲ្យបារម្ភនៅប្រទេសដ៏ធំមួយនេះ។
កូនក្មេងបាននាំគ្នាលេងពពុះសាប៊ូ និងខ្លះថតរូបសែលហ្វ៊ីជាមួយសមុទ្រពពកសក្បុស នៅឆ្នេរម៉ារីណា បើទោះជាឆ្នេរពពុះសាប៊ូជះក្លិនអសោច ហើយអ្នកនេសាទត្រូវបានដាស់តឿនកុំឲ្យចូលទៅតំបន់នោះក្ដី។
ក្រុមវេជ្ជបណ្ឌិតបានព្រមានថា បញ្ហាស្បែកអាចកើតឡើងដោយសារការប៉ះពាល់ពពុះពុល ដែលបាតុភូតនេះកើតឡើងជារៀងរាល់រដូវមូសុង។ ដោយឡែកឆ្នាំនេះ បញ្ហាបំពុលកាន់តែធ្ងន់ធ្ងរជាងមុន។
យ៉ាងណាមិញ សេចក្ដីជូនដំណឹងពីបញ្ហាសុខភាព មិនបានជ្រួតជ្រាបទៅដល់ក្រុមគ្រួសាររាប់រយនាក់ ដែលនាំគ្នាទៅលេងឆ្នេរសមុទ្រដ៏វែងនៅទីក្រុងជិនណៃនោះទេ ដោយពួកគេថែមទាំងបណ្ដោយឲ្យកូនចុះលេងពពុះសាប៊ូជាតិពុលថែមទៀតផង។
ក្រុមប្រឹក្សាពិនិត្យការបំពុលបរិស្ថាននៅរដ្ឋតាមីលណាឌូ បានធ្វើការវិភាគពពុះសាប៊ូ ដែលលាតសន្ធឹងជាច្រើនគីឡូម៉ែត្រនៅឆ្នេរ។
ឆ្នេរសមុទ្រ ម៉ារីណា នៅក្រុងជិនណៃ ប្រទេសឥណ្ឌា គ្របដណ្ដប់ដោយពពុះសក្បុសពីការបំពុលបរិស្ថាន។ រូបថត AFP
អ្នកជំនាញ Pravakar Mishra នៅវិទ្យាស្ថានជាតិស្រាវជ្រាវជលសាទីក្រុងជិនណៃ បានឲ្យដឹងថា៖ «វាពិតជាមិនល្អសម្រាប់មនុស្សចូលទៅលេងពពុះនោះទេ ប៉ុន្តែប្រជាជនមិនទាន់យល់ពីបញ្ហាប្រឈម»។
ខណៈពពុះសក្បុសនៅឆ្នេរសមុទ្រមានកំណើនពីមួយឆ្នាំទៅមួយឆ្នាំ អាជ្ញាធរក៏សម្ដែងក្ដីបារម្ភដូចកាលពីឆ្នាំ ២០១៧ នៅពេលដែលត្រីរាប់ពាន់ក្បាលបានងាប់ពាយ ដោយសារការបំពុលធ្ងន់ធ្ងរនៅតំបន់ឆ្នេរ។
អ្នកនេសាទវ័យ ៣០ ឆ្នាំ Jeyaseelan បានត្អូញថា គ្មាននរណាចង់ទិញត្រី ដែលលោកខំរកបានបន្តិចបន្តួច នៅប៉ុន្មានថ្ងៃនេះទេ។
ក្មេងៗលេងពពុះ ដែលអ្នកជំនាញព្រមានថាមិនល្អចំពោះសុខភាព។ រូបថត AFP
លោកពោលថា៖ «គេខ្លាចត្រីពុល ដូច្នេះហោប៉ៅខ្ញុំទទេហើយ»។
ឆ្នេរម៉ារីណា ជាបេះដូងនៃក្រុងជិនណៃ ជាង ១ សតវត្សរ៍ហើយ។
អ្នកស្រាវជ្រាវបានឲ្យដឹងថា កាកសំណល់ចេញពីប្រព័ន្ធលូត្រឹមតែ ៤០ ភាគរយប៉ុណ្ណោះ ដែលត្រូវបានឆ្លងកាត់ការសម្អាតត្រឹមត្រូវ ដោយសល់ប៉ុន្មានត្រូវបានបង្ហូរចូលសមុទ្រ។
អ្នកវិទ្យាសាស្ត្រកំពុងតែសិក្សាលើដំណោះស្រាយបង្ហោះពោងភ្ជាប់ឧបករណ៍វាស់ជាតិពុលក្នុងទឹក។
ដោយសំអាងថា ក្រុមអ្នកស្ម័គ្រចិត្តរើសសំរាមប្លាស្ទិកជិតមួយតោន ប្រើពេលតែ ២ ម៉ោង នៅក្រុងជិនណៃ លោក Mishra ថ្លែងថា៖ «ការបំពុលបរិស្ថានបំផ្លាញឆ្នេរខ្លាំងជាងការឡើងកម្ពស់ទឹកទៅទៀត»៕ AFP
