កង្វះកន្លែងដាក់សត្វសម្រាប់កាប់សាច់ តម្រូវឲ្យវានៅលើដំបូលមួយរយៈ។ រូបថត AFP
.jpg)
ក្រុងការ៉ាជី : ពិធីបុណ្យសាសនាប្រចាំឆ្នាំរបស់លោក Syed Ejaz Hassan ក្នុងទីក្រុងធំការ៉ាជី របស់ប៉ាគីស្ថាន បានចាប់ផ្ដើមដែលលោកនឹងដឹកជញ្ជូនគោពីអគារជាន់ដំបូលមកកាន់ដីនៅប៉ុន្មានថ្ងៃមុនពិធីបុណ្យ Eid al-Adha ដែលរៀបចំឡើងនៅចុងសប្ដាហ៍នេះ។
មូស្លីមធ្វើសត្ដឃាតលើសត្វពពែ ចៀម គោ ឬអូដ្ឋនៅក្នុងពិធីបុណ្យប្រចាំឆ្នាំតាមបែបសាសនា ហើយសត្វទាំងនេះត្រូវបានចែកចាយក្នុងចំណែកស្មើៗគ្នាដល់អ្នកក្រ សាច់ញាតិ និងទទួលទានក្នុងក្រុមគ្រួសារខ្លួនឯង។ គ្រាន់តែនៅទីក្រុងការ៉ាជី គោ ពពែ និងអូដ្ឋជិតកន្លះលានក្បាលនឹងត្រូវបានលក់ចេញ ឬបូជាអំឡុងពេលពិធីបុណ្យ។
ប៉ុន្ដែក្នុងទីក្រុងដ៏មមាញឹកមានប្រជាជនប្រមាណ ២០ លាននាក់ដែលអាសោចចំពោះបញ្ហាចរាចរណ៍ស្មុគស្មាញ លំនៅឋានណែនណាន់តាន់តាប់ និងខ្វះបរិស្ថានបៃតង ដំបូលផ្ទះពលរដ្ឋខ្លះត្រូវបានប្រើជារោងសត្វបណ្ដោះអាសន្ននៅមុនថ្ងៃបុណ្យ Eid ចូលមកដល់។
សត្វរាប់ម៉ឺនក្បាលត្រូវបានត្រៀមសម្រាប់ថ្ងៃបុណ្យ Eid ចុងសប្ដាហ៍នេះ។ រូបថត AFP
ខណៈសត្វរាប់ពាន់ក្បាលនឹងត្រូវបានសម្លាប់នាចុងសប្ដាហ៍នេះ ដើម្បីប្រារឰពិធីបុណ្យ Eid អ្នកលក់សត្វពាហនៈ និងអតិថិជននឹងចង់បន្ថែមភាពទាក់ទាញចំពោះជំនួញទាំងនោះដោយការគ្រងសម្លៀកបំពាក់ជាមួយគ្រឿងអលង្ការអង្ក្រងជើង ឬកម្រងផ្កា ខណៈសត្វផ្សេងៗទៀតត្រូវបានជ្រលក់ថ្នាំផងដែរ។
ប៉ុន្ដែស្ថិតក្នុងផ្សារលក់សត្វដ៏រញ៉េរញ៉ៃនៃទីក្រុងការ៉ាជី ការលក់ដូរហាក់ដូចជាធ្វើសង្គ្រាមតថ្លៃបែកពពុះមាត់។ អតិផរណាទ្វេដង រូបិយប័ណ្ណរូពីកំពុងដាំក្បាលចុះ និងការដំឡើងពន្ធនាឆ្នាំនេះបានបង្កើនតម្លៃគ្រប់មុខទំនិញរួមទាំងសត្វបូជាថ្ងៃបុណ្យនេះដែរ។
អតិថិជនម្នាក់ឈ្មោះ មូហាមេដ អ៊ីមរ៉ាម ជាម្ចាស់អាជីវកម្មតូចមួយបានត្អូញត្អែរថា៖ «កាលពីឆ្នាំមុនខ្ញុំបានទិញសត្វ ១ ក្បាលតម្លៃ ១០ ម៉ឺនរូពី (៦២៥ ដុល្លារ) តែខ្ញុំនឹងត្រូវចំណាយ ១២០០ រូពីបន្ថែមទៀត (៧៥ ដុល្លារ) ដោយបានត្រឹមសត្វតូចជាងមុន»។
យោងតាមអ្នកជំនួញ ហ្សាគី អាប្រូ បានឲ្យដឹងថា ទោះបីជាមានតម្លៃកាន់តែខ្ពស់យ៉ាងណាក៏ដោយ ក៏គោប្រមាណ ៨ ម៉ឺនក្បាលត្រូវបានលក់ចេញក្នុងផ្សារតែមួយ៕ HR
