ទម្រង់មុខមាត់ថ្មីដែលមហាជនមើលទៅឃើញខុស-ប្លែកពីមុនចំពោះ លាង សុផាឡែន។ រូបថត ហ្វេសប៊ុក, តារាចម្រៀងស្រីហង្សមាសកញ្ញា លាង សុផាឡែន។ រូបថត ភ្នំពេញប៉ុស្តិ៍
.jpg)
ភ្នំពេញ៖ នាពេលថ្មីៗនេះ ស្រាប់តែផ្ទុះនូវការងឿងឆ្ងល់ និងសង្ស័យពីមហាជន ចំពោះភាពខុសប្លែកនៃទម្រង់មុខ និងរូបសម្រស់របស់តារាចម្រៀងស្រីនៅផលិតកម្មហង្សមាស កញ្ញា លាង សុផាឡែន ខណៈពេលលេចវត្តមានឡើងវិញ នៅក្នុងការប្រគំតន្រ្តីនានា ក្រោយពីស្ងាត់មួយរយៈមក។
ក្រោយពីបង្ហាញវត្តមានក្នុងការប្រគំតន្រ្តីនៅដើមខែមករា ឆ្នាំ ២០២០ ប្រិយមិត្តអ្នកគាំទ្រតារាចម្រៀងស្រីវ័យកាន់តែជ្រេ នៅផលិតកម្មហង្សមាសបានយូរ កញ្ញា លាង សុផាឡែន ក៏លាន់មាត់បង្ហាញពីចំណាប់អារម្មណ៍ទាំងការសរសើរពីសម្រស់ប្លែក និងការងឿងឆ្ងល់ត្រង់ៗថា៖ «ភាពខុសប្លែកនៃសម្រស់នេះទំនងជានាងទៅកែសម្ផស្សហើយមើលទៅ មុខមាត់ឡើងសស្អាតខុសប្លែកជាងមុន និងមានខ្ទង់ច្រមុះរាងស្រួចជាងមុនដែរ»។
សូម្បីតែតារាចម្រៀងស្រីខ្លួនឯង ក៏ទទួលបានការសួរនាំផ្ទាល់ពីក្រុមប្រិយមិត្តគាំទ្រនាង ក្រោយពីការបង្ហាញវត្តមានក្នុងកម្មវិធីប្រគំតន្រ្តីកន្លងនោះដែរ ដោយកញ្ញា លាង សុផាឡែន លើកឡើងថា៖ «បងប្អូនជាអ្នកគាំទ្រភាគច្រើនបានសួរនាំមកខ្ញុំថា តើពិតជាបានកែសម្ផស្សមែន ឬយ៉ាងណា?»។
ថ្លែងដោយមិនមានចេតនាលាក់លៀមនឹងមហាជន កញ្ញា លាង សុផាឡែន បានប្រាប់ឲ្យភ្នំពេញប៉ុស្តិ៍ថា៖ «ខ្ញុំមិនមែនជាមនុស្សដែលចូលចិត្តលាក់បាំង ទៅនឹងរឿងនេះឡើយ ហើយខ្ញុំក៏បានប្រាប់ដល់ពួកគាត់ដោយត្រង់រួចហើយថា នាងខ្ញុំមិនបានកែសម្ផស្សទាំងស្រុងទៅលើផ្ទៃមុខនាងខ្ញុំឡើយ។ ខ្ញុំគ្រាន់តែមានការកែស្លាបច្រមុះបន្តិច ដែលបងប្អូនមើលទៅឃើញខុសប្លែកនោះឯង ចំពោះខ្ទង់ច្រមុះវិញនាងខ្ញុំមិនបានកែ ឬដូរឡើយ។ ម្យ៉ាងនាងខ្ញុំជាមនុស្សដែលខ្លាចរឿងកែកុនលើផ្នែកសម្រស់នៃខ្ទង់ច្រមុះនេះណាស់ ដោយសារមានអារម្មណ៍គិតថា ខ្លួនឯងខ្លាចមានបញ្ហានៅថ្ងៃណាមួយជាមិនខាននោះឡើយ»។
កញ្ញា លាង សុផាឡែន បន្តពីរឿងការងារសិល្បៈដែរថា៖ «ចំពោះរឿងចម្រៀង គឺនាងខ្ញុំក៏មានបទចេញជាហូរហែមកដូចគេដូចឯងទេ ហើយរឿងមានវត្តមានក្នុងការប្រគំតន្រ្តីនោះ គឺខាងក្រុមហ៊ុនហង្សមាស គេមានរៀបចំជាតារាងកាលវិភាគសម្រាប់ក្រុមសិល្បករ-សិល្បការិនី ព្រោះមានចំនួនច្រើន»។
គួរកត់សម្គាល់ផងដែរ ចំពោះបញ្ហាស្នេហាវិញ កញ្ញា លាង សុផាឡែន ធ្លាប់ធ្វើឲ្យមានផ្ទុះការផ្អើលពេញបណ្តាញសង្គមហ្វេសប៊ុកដោយសារនារីម្នាក់បានទម្លាយការពិតថា តារាស្រីនៅហង្សមាសកញ្ញា លាង សុផាឡែន មានទំនាក់ទំនងស្នេហាជាមួយស្វាមីខ្លួនគឺតារាចម្រៀងប្រុសឈ្មោះដើមលោក វង់ សុភៈ ឬឈ្មោះនៅក្នុងសិល្បៈថា T.O កំពុងតែរះលើទ្រនំផលិតកម្មថោន និងបានបែកធ្លាយចេញសារពីខាងប្រពន្ធកាលពីឆ្នាំ ២០១៧ កន្លងមក៕
