.jpg)
ក្រុងស៊ីដនី: បុរសអូស្ដ្រាលីវ័យ ៩១ ឆ្នាំម្នាក់ បានរស់រានមានជីវិតពីឧប្បត្ដិហេតុគ្រោះថ្នាក់យាន្ដឆ័ត្រយោង ដោយដើរចេញពីកន្លែងកើតហេតុជាមួយរបួសតិចតួច ក្រោយធ្លាក់ចូលមហាសមុទ្រក្បែរឆ្នេរភាគខាងជើងក្រុងស៊ីដនី។
ប៉ូលិសបានឲ្យដឹងថា អ្នកជិះយានឆ័ត្រយោងវ័យចំណាស់រូបនេះ ត្រូវបានជួយសង្គ្រោះពីមហាសាគរដោយអ្នកស្រុក បន្ទាប់ពីលោកធ្លាក់ក្បែរតំបន់ជាយក្រុង Warriewood ម៉ោងប្រមាណ ៦ ល្ងាចកាលពីថ្ងៃអាទិត្យ។
កងសង្គ្រោះបន្ទាន់ត្រូវបានខលហៅមកកាន់ជ្រលងច្រាំងសមុទ្រក្បែរតំបន់នោះ ជាទីដែលក្រុមជំនួយការវេជ្ជបណ្ឌិតបាននាំយកបុរសចំណាស់ដោយគ្រាន់តែមានរបួសដាច់រលាត់ និងជាំបន្ដិចបន្ដួច។
វីដេអូលើបណ្ដាញផ្សព្វផ្សាយក្នុងស្រុកបានបង្ហាញពីរូបភាពលោកតាចិត្ដសឿង ដែលសុំមិនបញ្ចេញឈ្មោះ ដើរកាត់ផ្ទាំងថ្ម ដោយជើងឆ្វេងរុំប៉ងស្មង់ ដែលមានជំនួយពីក្រុមសង្គ្រោះ។
ប៉ូលិសបានឲ្យដឹងថា យានឆ័ត្រយោងរបស់លោកតាត្រូវបានស្រង់ពីផ្ទៃទឹក។ លោកតា វ័យ ៩១ ឆ្នាំ ត្រូវបានបញ្ជូនទៅព្យាបាលនៅមន្ទីរពេទ្យ Royal North Shore Hospital ក្នុងក្រុងស៊ីដនី៕ AFP/HR
