ក្រុងតូក្យូ៖ ក្នុងទីក្រុង «សេអ៊ូលដ៏តូច» នៃតំបន់មួយរបស់ទីក្រុងតូក្យូ អ្នកដើរផ្សារជនជាតិជប៉ុននាំគ្នាទិញផលិតផលនានាទាំងមុខស្រោបក្រែមផាត់មុខតាមម៉ូដែលតារា K-Pop និងតារាភាពយន្ដកូរ៉េ ដែលទំនងជាអាចជួយរឹតចំណងមិត្ដភាពជប៉ុន-កូរ៉េ កាន់តែស្អិតល្មួត។
ភ្ញៀវដើរផ្សារ Shin-Okubo អាចគិតថា ពួកគេកំពុងតែចូលក្នុងសង្កាត់ណាមួយនៃទីក្រុងសេអ៊ូល ដោយមានភោជនីយដ្ឋានជាច្រើនលក់គីមឈី និងហាងលក់អាល់ប៊ុមចម្រៀងចុងក្រោយរបស់ក្រុមកូរ៉េ K-pop BTS ឬ Wanna One។
ខុសស្រឡះពីនៅប្រទេស កូរ៉េខាងត្បូង ដែលពលរដ្ឋតែងតែចងកំហឹង និងអត់ទិញផលិតផលជប៉ុន នៅក្រុងតូក្យូឯណេះវិញ បញ្ហានយោបាយមិនអាចបន្សាបឥទ្ធិពលអ្នកគាំទ្រផលិតផលកូរ៉េនៅប្រទេស ជប៉ុន ទេ។
កញ្ញា អានណា កាណេកុ ជាយុវតីជប៉ុនអាយុ ១៩ ឆ្នាំ ជានិស្សិតម្នាក់ដែលតែងតែទៅផ្សារ Shin-Okubo ជាមួយមិត្ដភក្ដិបាននិយាយថា៖ «ខ្ញុំចូលចិត្ដគ្រប់យ៉ាង K-pop អាហារ និងសម្លៀកបំពាក់។ ខ្ញុំក៏ចង់ឲ្យប្រទេសទាំង ២ ល្អនឹងគ្នាផងដែរ»។
ការចងចាំមិនអាចបំភ្លេចបានចំពោះអតីតកាលដ៏ជូរចត់នៃសង្គ្រាមបង្ហូរឈាមរវាងប្រទេសទាំងពីរ ជាពិសេសការគ្រប់គ្រងឧបទ្វីបកូរ៉េពីសំណាក់ភាគីជប៉ុន ដោយពលរដ្ឋកូរ៉េរាប់សែននាក់ត្រូវបញ្ជូនធ្វើទាសករនៅជប៉ុន ខណៈនារីៗត្រូវបានបង្ខំឲ្យធ្វើពេស្យាចារក្នុងនាមជាទាសករកាមគុណក្នុងសម័យសង្គ្រាម។
BaeCheo-leun ដែលបើកអង្គការមួយ និងនាំយកបុគ្គលិកកូរ៉េមកធ្វើការនៅជប៉ុនបានសារភាពថា កាលពីប៉ុន្មានឆ្នាំមុន «សម្ដីស្អប់» ប្រឆាំងជនជាតិកូរ៉េរមែងត្រូវបានឮពេញៗត្រចៀក ជុំវិញផ្សារ Shin-Okubo តែសកម្មភាពនេះ បច្ចុប្បន្នវាហាក់ដូចជារសាយច្រើន។
លោក Bae ដែលចោទប្រកាន់លើអ្នកនយោបាយលើភាពប្រេះឆារបស់ប្រជាជាតិទាំង ២ បាននិយាយថា៖ «អ្នកគាំទ្រ K-pop ជនជាតិជប៉ុនវ័យក្មេង ដែលមកសង្កាត់នេះ ពិតជាស្រឡាញ់វប្បធម៌កូរ៉េប្រាកដមែន»។
ពលរដ្ឋកូរ៉េខាងត្បូងជាច្រើនចាប់ផ្ដើមយុទ្ធនាការលែងប្រើផលិតផលជប៉ុន ចាប់ពីស្រាបៀរ សម្លៀកបំពាក់ និងគ្រឿងសម្អាងរហូតដល់បារី តែនៅជប៉ុន អ្នកគាំទ្រផលិតផលកូរ៉េខាងត្បូង ហាក់មិនប្រែប្រួលទំនោរទេ។
វប្បធម៌កូរ៉េខាងត្បូង បានសាបព្រោះទូទាំងពិភពលោកនាពេលប៉ុន្មានឆ្នាំចុងក្រោយ ដែលកើតឡើងដោយភាពជោគជ័យនៃតារា K-pop ល្បីៗ ដូចជា PSY ជាដើម ដែលចម្រៀងរបស់លោកទទួលបានប្រជាប្រិយភាពខ្លាំងបំផុតក្នុងឆ្នាំ ២០១២ (Gangnam Style) ដោយវាបានក្លាយជាវីដេអូដំបូងបំផុតមានអ្នកទស្សនា ១ ពាន់លានដងលើយូធូប ហើយ BTS ឈរលើកំពូលតារាងនៅអាមេរិក និងចក្រភពអង់គ្លេសនាដើមឆ្នាំនេះ៕ AFP/HR