ក្រុងបាងកក: ដំណើរព្យុហយាត្រាជាក្បួនខាងក្រៅព្រះបរមរាជវាំងនៃតំបន់ប្រវត្ដិសាស្ដ្ររបស់ក្រុងបាងកក ដំរី ១១ ក្បាលបានក្រាបថ្វាយបង្គំ និងបញ្ចេញសំឡេងថ្វាយព្រះពរព្រះមហាក្សត្រថ្មី ព្រះមហា វ៉ាជីរ៉ាឡុងកន កាលពីថ្ងៃអង្គារពោលគឺ ១ ថ្ងៃក្រោយពីពិធីឡើងគ្រងរាជ្យដែលប្រព្រឹត្ដទៅរយៈពេល ៣ ថ្ងៃ។
ព្រឹត្ដិការណ៍ក្បួនដង្ហែដ៏ធំនេះបានធ្វើឡើងកាលពីថ្ងៃចន្ទដោយព្រះមហាក្សត្រថ្មីព្រះជន្ម ៦៦ វស្សាបានបង្ហាញព្រះភក្ដ្រស្វាគមន៍ប្រជានុរាស្ដ្រពីយ៉រាជដំណាក់ Grand Palace ដែលប្រជាជនរាប់ពាន់នាក់សម្លឹងមើលព្រះអង្គ និងបក់ទង់ជាតិរវិចៗ។
ប៉ុន្ដែក្រុមអ្នកបង្វឹកដំរី ឬហ្មដំរីនាំយកក្រុមថ្វាយព្រះពរមកយ៉ាងវិសេសដើម្បីអបអរពិធីឡើងគ្រងរាជ្យកាលពីថ្ងៃអង្គារ បើទោះបីជាមហាក្សត្រមិនបង្ហាញព្រះភក្ដ្រយ៉ាងណាក៏ដោយ។
គ្រងសំពត់រុំសូត្រពណ៌លឿង និងពាក់កម្រងផ្កាពណ៌រមៀត ដំរីលាបពណ៌ស ជាសត្វតំណាងជាតិថៃ សម្ដែងក្បាច់រាំហ្សាក់ ១០ ជំហានតំណាងឲ្យការគ្រងរាជ្យរបស់រាមាទី ១០។
ហ្មដំរី រាងថុងបាត មីផន ដែលមកពី Ayutthaya Elephant Palace ជាមជ្ឈមណ្ឌលទេសចរណ៍ដែលសត្វដំរីជាគោលដៅទាក់ទាញនិយាយថា៖ «ដំរីបានលុតជង្គង់ និងស្រែក ខណៈវាចង់និយាយពាក្យថា សុំឲ្យព្រះមហាក្សត្រមានព្រះជន្មយឺនយូរជាភាសាដំរី»។
ទេសចរណ៍ដំរី ជាឧស្សាហកម្មកាក់កបមួយក្នុងប្រទេសថៃដែលរងនូវការរិះគន់ខ្លាំងពីក្រុមអភិរក្សសិទ្ធិសត្វកាលពីប៉ុន្មានឆ្នាំចុងក្រោយនេះ។
ពិធីឡើងគ្រងរាជ្យដ៏អធិកអធមជាពិធីលើកដំបូងនៅថៃរយៈពេល ៦៩ ឆ្នាំបន្ទាប់ពីអតីតព្រះមហាក្សត្រ សោយទិវង្គតក្នុងឆ្នាំ ២០១៦៕ HR