សារធាតុផ្សំថ្នាំវីយ៉ាក្រាស្ទួយផ្លូវភេទបុរស កម្រិតខ្ពស់ត្រូវបានរកឃើញក្នុងប្រព័ន្ធទឹកកខ្វក់ក្រុងសេអ៊ូល
ក្រុងសេអ៊ូល: ថ្នាំ Viagra និងឱសថផ្សេងៗទៀតសម្រាប់ព្យាបាលបញ្ហាអសមត្ថភាពផ្លូវភេទក្នុងបរិមាណដ៏ច្រើន ត្រូវបានរកឃើញក្នុងទឹកកខ្វក់ក្រុងសេអ៊ូល ហើយវត្ដមានសារធាតុទាំងនេះនៅបរិវេណក្នុងក្រុងរំពឹងថានឹងមានការកើនឡើង។ នេះបើយោងតាមក្រុមស្រាវជ្រាវកូរ៉េខាងត្បូង។
ការសិក្សាថ្មីមួយបានបង្ហាញថា វត្ដមានសារធាតុគីមីប្រើក្នុងឱសថ ដូចជា ពពួក Phosphodiesterase-5 inhibitors (PDE-51) មានបរិមាណច្រើននាចុងសប្ដាហ៍ និងកន្លែងកែច្នៃទឹកកខ្វក់នៅហ្គាងណាមដែលជាប្រភពទីតាំងក្លិបរាត្រីបារ៍ និងតំបន់ផ្ទះបន។
ក្រុមអ្នកស្រាវជ្រាវបានឱ្យដឹងក្នុងឯកសារស្រាវជ្រាវដែលធ្វើឡើងដោយរបាយការណ៍វិទ្យាសាស្ដ្រកាលពីដើមខែថា៖ «យើងបានប៉ាន់ប្រមាណថាបរិមាណការប្រើប្រាស់ឱសថ PDE-5i មានការកើនឡើង ៣១ ភាគរយក្នុងតំបន់ដែលសម្បូរទីតាំងក្លិបរាត្រីតិចតួច»។
ក្រុមអ្នកជំនាញបានសិក្សាពីវត្ដមានសារធាតុគីមីនៅរោងចក្រកែច្នៃទឹកកខ្វក់ (STPs) ទាំងពេលហូរចូល និងហូរចេញក្នុងទីក្រុងរបស់ប្រទេសកូរ៉េខាងត្បូង ព្រមទាំងការហូរចូលនៃប្រភពទឹកនានា។
ការស៊ើបអង្កេតរបស់ពួកគេបានបង្ហាញថា រោងចក្រកែច្នៃទឹកកខ្វក់ដែលមានស្រាប់ មិនអាចកម្ចាត់សារធាតុគីមីដ៏ច្រើនសន្ធឹកសន្ធាប់នោះបានទេ។
ឯកសារស្រាវជ្រាវបានឱ្យដឹងថា៖ «វត្ដមានសារធាតុគីមី PDE-5i ក្នុងទឹកកខ្វក់មិនសុទ្ធតែអាចសម្អាតដោយប្រព័ន្ធកែច្នៃ និងត្រូវបានបញ្ចេញទៅប្រភពទឹកធម្មជាតិ។ ដោយមើលឃើញពីកំណើនទីផ្សារច្បាស់ណាស់ថា PDE-5i កាន់តែច្រើននឹងត្រូវបានបញ្ចេញទៅកាន់តំបន់ទីក្រុង»។
ការសិក្សាជាច្រើនបានបង្ហាញថាបុរសកូរ៉េខាងត្បូងអាយុចន្លោះពី ៣០ ទៅ ៣៩ ឆ្នាំប្រមាណ ២៣ ភាគរយកំពុងរងទុក្ខព្រោះបញ្ហាអសមត្ថភាពផ្លូវភេទហើយការលក់ឱសថស្ទួយផ្លូវភេទ PDE-5iនៅតាមក្រុមហ៊ុនឱសថកូរ៉េកំពូលទាំង ២០ បានកើនដល់ទំហំទឹកប្រាក់ ១៣៣ លានដុល្លារក្នុងឆ្នាំ ២០១៩។
ដោយសារតែប្រសិទ្ធភាពជួយថាមពលផ្លូវភេទបុរស សារធាតុគីមីទាំងនេះរមែងត្រូវបានប្រើខុសច្បាប់ក្នុងការលាយជាឱសថប៉ូវកម្លាំង អាហារបំប៉ន និងផលិតផលផ្សំពីរុក្ខជាតិនៅតាមបណ្ដាប្រទេសជាច្រើន។
ការសិក្សាថ្មីមួយបានរកឃើញថា PDE-5i និងឱសថប្រភេទតែមួយក្នុងចំណីអាហារ និងអាហារបំប៉ន ៨០ ចំណោម ១៨៨ លក់នៅក្នុងប្រទេសកូរ៉េខាងត្បូង។
អ្នកជំងឺប្រមាណ ៣២២ លាននាក់ទទួលរងនូវវិបត្ដិជំងឺអសមត្ថភាពផ្លូវភេទក្នុងឆ្នាំ ២០២៥ ដោយគ្រាន់តែបុរសៗនៅតំបន់អាស៊ីមានតួលេខហក់ឡើងពី ៨៧ លាននាក់ក្នុងឆ្នាំ ១៩៩៥ ទៅដល់ ២០០ លាននាក់ក្នុងឆ្នាំ ២០២៥ ខាងមុខដោយសារកំណើនប្រជាជនវ័យចំណាស់៕ HR
