សិស្សានុសិស្សនៃសាលា Liger Leadership Academy ទទួលបានការអប់រំភាពជាសហគ្រិន។ រូបថត The Straits Times
.jpg)
ភ្នំពេញ: កុមារី អ៊ុម បុប្ផា អាយុ ១៣ ឆ្នាំកំពុងគិតថា នាងគួរចំណាយពេលបន្ថែមនៅឆ្នាំសិក្សាបន្ទាប់មកពង្រីកសមត្ថភាពកម្មវិធីទូរស័ព្ទដើម្បីផ្សព្វផ្សាយពីវប្បធម៌ដែលខ្លួន និងមិត្ដរួមថ្នាក់ខិតខំបង្កើតឡើងរហូតដល់ឈ្នះពាន។
កុមារី បុប្ផា បាននិយាយជាភាសាអង់គ្លេសនូវលទ្ធភាពនាពេលអនាគតថា៖ «វាជាការវិនិយោគដែលយើងគួរតែហ៊ានពុះពារ»។
បុប្ផាគឺជាសិស្សម្នាក់នៅ Liger Leadership Academy ជាសាលាផ្ដល់ការស្នាក់នៅ និងអាហារឯជាយក្រុងភ្នំពេញបានសម្ពោធក្នុងឆ្នាំ ២០១២ ដើម្បីផ្ដល់ការអប់រំនូវអ្វីដែលហៅថា «អ្នកគិតពីសហគ្រាស» បំណងផ្លាស់ប្ដូរកម្ពុជា។
បង្កើតឡើងដោយសហគ្រិនអាមេរិក Trevor Gile និងភរិយា Agnieszka Tynkiewicz-Gile សាលានេះបានសម្រិតសម្រាំងសិស្សមួយចំនួនពីបេក្ខភាពរាប់ពាន់នាក់រៀងរាល់ ៣ ឆ្នាំម្ដង និងផ្ដល់ឲ្យពួកគេនូវអាហារូបករណ៍ពេញលេញសម្រាប់ការសិក្សាថ្នាក់វិទ្យាល័យ ៣ ឆ្នាំដោយផ្ដោតលើការដោះស្រាយបញ្ហាជាក់ស្ដែង។
ក្រៅពីកម្មសិក្សាគោលដែលផ្ដោតលើភាសាខ្មែរ អង់គ្លេស គណិតវិទ្យា និងវិទ្យាសាស្ដ្រ សិស្សទាំង ១១០ នាក់របស់ Liger អាយុចន្លោះពី ១២ ទៅ ១៨ ឆ្នាំក៏ចេះច្នៃបង្កើតគម្រោងជម្រើសផ្ទាល់ខ្លួនដឹកនាំដោយក្រុមអ្នកសម្របសម្រួលរបស់សាលា។
កុមារីរាងតូចច្រឡឹង បុប្ផា គឺជាសមាជិកម្នាក់ចំណោមក្មេងស្រី ៥ នាក់ដែលទទួលបានពានលេខ ១ ផ្នែកកុមារនាឆ្នាំនេះលើគម្រោង Tech-novation Cambodia ជាការប្រកួតសម្រាប់កុមារីដើម្បីបង្ហាញពីស្នាដៃបច្ចេកវិទ្យាក្នុងការផ្លាស់ប្ដូរសង្គម។
ក្រុមរបស់ បុប្ផា បានច្នៃកម្មវិធីទូរស័ព្ទមួយដែលអនុញ្ញាតឲ្យអ្នកប្រើកក់សំបុត្រទស្សនាការសម្ដែងនានារបស់ក្រុមសិល្បករផ្នែកបុរាណ។
យ៉ាងណាមិញបំណងថ្ងៃអនាគតរបស់កុមារីរូបនេះរឹតតែវែងឆ្ងាយដោយនាងបានបង្ហើបថា៖ «ខ្ញុំចាប់អារម្មណ៍អវកាស និងចង់ដឹងថា តើមនុស្សអាចទាញពេលវេលាទៅមុខ ទៅក្រោយបានទេ។ ខ្ញុំនឹងស្រាវជ្រាវតាមដែលអាចធ្វើទៅបាន»។
ក្រៅពី បុប្ផា សិស្សមួយក្រុមកំពុងស្រាវជ្រាវពីរបៀបនៃដំណើរការផ្កាយរណបណាណូដំបូងរបស់កម្ពុជាដោយមានការណែនាំពីអ្នកជំនាញបរទេស តាមរយៈការរៃអង្គាសមូលនិធិ និងសិក្សាពីវិធីស្នើសុំអាជ្ញាប័ណ្ណសម្រាប់មហិច្ឆតាផ្កាយរណបនេះ។
មួយក្រុមទៀតបាននិងកំពុងបន្ដគម្រោងមុខរបរទេសចរណ៍ជិះកង់ជាមួយសិស្សៗដទៃដោយការដើរតួជាមគ្គុទេ្ទសក៍ទេសចរណ៍ដែលណែនាំអំពីវប្បធម៌ខ្មែរជូនភ្ញៀវក្នុងសកម្មភាពស្និទ្ធស្នាល និងរាក់ទាក់។
លោក Trevor Gile ស្ថាបនិកសាលាបានប្រាប់ថា៖ «សិស្សទាំងនេះត្រូវបានជ្រើសរើសមិនមែនដោយសារពួកគេឆ្លាតបំផុតនោះទេ តែភាពជាអ្នកដឹកនាំមានសុទិដ្ឋិនិយម និងឧស្សាហ៍ព្យាយាម»។
មូលនិធិសិក្សារបស់សិស្សម្នាក់ក្នុង ១ ឆ្នាំមានតម្លៃ ១៥ ០០០ ដុល្លារ។ សិស្សម្នាក់ៗទទួលបានកុំព្យូទ័រយួរដៃ ១ និងលម្ហែទាំសុខភាព ការបង្ហាត់បង្រៀន និងការស្នាក់នៅ។
លោកបានបន្ដថា៖ «ដោយប្រើវិធីអប់រំភាពជាសហគ្រិន ការសិក្សាបែបនេះអាចមានឥទ្ធិពលលើគ្រប់ប្រទេសគ្រប់ស្ថានភាពសេដ្ឋកិច្ចសង្គម»៕ The Straits Times (Singapore)/ Asia News Network/HR
