ក្រុមតារាចម្រៀងស្រីប្រុសល្បីៗនៅហង្សមាសប្រមូលនៅក្នុងកុនខ្នាតធំថ្មីរឿង«ខ្ញុំមានញាណលើស»។ ហ្វេសប៊ុក
.jpg)
ភ្នំពេញៈ បង្កការភ្ញាក់ផ្អើលពីមហាជន ដោយតារាចម្រៀងស្រីមេម៉ាយក្តៅស្រួយទាំងក្មេងខ្ចី សម្រស់កាន់តែស្រស់ស្អាត ផូរផង់ អ្នកនាង សុខ ស្រីនាង ពិតជាឡើងក្រឺតៗ បន្ទាប់ពីបានចូលទ្រនំផលិតកម្មថ្មី ក៏ឆក់ឱកាសធ្វើជាតួឯកស្រី ខណៈតារាចម្រៀងប្រុសម្ចាស់ពាន Cambodian Idol រដូវកាលទី ៣ លោក គ្រី ថៃពៅ ជាតួឯកប្រុសថតកុនដុំឲ្យផលិតកម្មហង្សមាស រឿង «ខ្ញុំមានញាណលើស»។ នេះបើតាមរៀបចំពិធីសែនក្រុងពលីរឿងកុនថ្មីនេះនៅស្ទូឌីយ៉ូខ្លួននៅព្រែកឯង កាលពីព្រឹកថ្ងៃទី ២០ ខែ សីហា ឆ្នាំ២០១៨ ដែលសុទ្ធតែប្រមូលផ្តុំដោយក្រុមតារាចម្រៀងល្បីៗរបស់ហង្សមាស។
សម្រាប់តារាចម្រៀងស្រីមានសំឡេងស្រាល ពីរោះជាទីពេញនិយមរបស់យុវវ័យ អ្នកនាង សុខ ស្រីនាង ជាលើកទី ២ ហើយ ក្នុងការទទួលបាននូវទីផ្សារសិល្បៈភាពយន្តបន្ថែមពីលើអាជីពចម្រៀងចាប់តាំងពីបានចាកចេញពីទ្រនំចាស់សាន់ដេ មកជ្រកកោននៅទ្រនំថ្មីហង្សមាស ខណៈឱកាសថតកុនដំបូងគឺកុនភាគរឿង «រាជិនីភូមិគ្រឹះ» ហើយខ្សែភាពយន្តទី២ ជាកុនដុំរឿង«ខ្ញុំមានញាណលើស» ជាតំណែងតួឯកស្រី ជាមួយតួឯកប្រុសមានរូបសង្ហាលោក គ្រី ថៃពៅ គឺជាម្ចាស់ពាន Cambodian Idol រដូវកាលទី ៣ ស្របពេលទីផ្សាយចម្រៀងរបស់លោកហាក់ដូចនៅទ្រឹងនៅឡើយនោះ។
នាពេលកន្លងមកតារាចម្រៀងស្រីសាច់សខ្ចីល្វក់ដូចជាពងមាន់បក សុខ ស្រីនាង ធ្លាប់បង្ហើបប្រាប់ថា៖ «នាងខ្ញុំក៏ត្រៀមថតច្រើនបទដោយមានទាំងបទបែបមនោសញ្ចេតនា បទញាក់ បទច្រៀងឆ្លើយឆ្លងជាមួយបង ហ្សូណូ បង នៅ ស៊ីនឿន ដែលបទទាំងអស់នេះ សុទ្ធតែមានទំនុកច្រៀងថ្មីៗទាំងអស់។ ទោះបីការមមាញឹកថតបទទាំងនេះ លំបាកយ៉ាងណាក្តី តែជាការងារធ្វើឲ្យខ្ញុំសប្បាយចិត្តព្រោះទាំងអស់គ្នាចង់បានគុណភាព»។
ចំណែកលោក គ្រី ថៃពៅ បេក្ខជនមកពីខេត្តកំពង់ចាម ទើបលើកពានរង្វាន់ជយលាភីនៃកម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី ៣ នេះ ក៏បានឱកាសថតកុនដំបូងរបស់ខ្លួនដែរ ខណៈតារាសម្តែងដទៃទៀតគឺសុទ្ធសឹងតែជាក្រុមតារាចម្រៀងស្រីប្រុសប្រចាំផលិតកម្មហង្សមាសរួមមានដូចជាលោក ណុប បាយ៉ារិទ្ធិ លោក នីកូ លោក ឆន សុវណ្ណារាជ លោក សយ រតនៈ កញ្ញា ប៉ាច គឺមមួយ អ្នកនាង ស៊ិន ឧត្តមផល្លា និងតារាប្រុសស្រីផ្សេងៗទៀត៕
