នៅសង្គមដ៏អភិរក្សនិយមនៃមីយ៉ាន់ម៉ា សិចដោយមិនបានរៀបការគឺជារឿងខុសឆ្គងធ្ងន់។ រូបថត AFP
.jpg)
ក្រុងយ៉ាំងហ្គូន៖ យុវវ័យទំនើង គូកនខ្ទើយ និងនារីរកស៊ីផ្លូវភេទជាតួប្រឌិតក្នុងកម្មវិធីសិក្សាថ្មីរបស់មីយ៉ាន់ម៉ា ជាសៀវភៅកំពុងបង្កប៉ះពាល់ជីវិតពិតក្នុងប្រទេសដ៏សែនអភិរក្សនិយមមួយនេះ។
នៅមីយ៉ាន់ម៉ា សិចក្រៅចំណងអាពាហ៍ពិពាហ៍ ជាទង្វើខុសក្រឹត្យក្រម។ ស្នេហាយុវវ័យមិនគាប់ភ្នែកចាស់ទុំ ហើយចំណងស្នេហ៍ភេទដូចគ្នាកាន់តែខុសគន្លងថែមទៀត។ ប៉ុន្ដែការអប់រំផ្លូវភេទនៅតែចាំបាច់ត្រូវធ្វើ។
មនុស្សជិត ៨ ពាន់នាក់បានស្លាប់ក្នុងឆ្នាំ ២០១៨ ព្រោះតែជំងឺទាក់ទងនឹងអេដស៍ ក្នុងប្រទេសដែលមានអត្រាមរណៈមាតុភាពខ្ពស់បំផុតលំដាប់ទី ២ នៅតំបន់អាស៊ីបន្ទាប់អាហ្វហ្គានីស្ថាន ហើយក្រុមសិទ្ធិស្ដ្រី IPAS បានប៉ាន់ប្រមាណថា ការរំលូតកូនអសុវត្ថិភាពប្រមាណ ២៥ ម៉ឺនករណី ត្រូវបានធ្វើឡើងរៀងរាល់ឆ្នាំ។
យុវវ័យទើបតែទទួលការអប់រំផ្លូវភេទអំឡុងឆ្នាំ ២០១៦ នៅពេលរដ្ឋាភិបាលថ្មីរបស់លោកស្រី អ៊ុងសាន ស៊ូជី បានប្ដេជ្ញាធ្វើឲ្យប្រសើរឡើងនូវកម្មវិធីសិក្សាដ៏ហួសសម័យរបស់ប្រទេស។
ប៉ុន្ដែគ្រូដ៏មានការអៀនខ្មាស់តែងតែរំលងប្រធានបទរសើបចាប់ពីបញ្ហាការមករដូវ និងការពន្យារកំណើតរហូតដល់ជំងឺឆ្លងពីការរួមភេទជាដើម។
សៀវភៅមានសាច់រឿងអប់រំយុវវ័យងប់ស្នេហាជាងការសិក្សា និងគូស្នេហ៍ភេទដូចគ្នាជាដើម។ រូប AFP
សៀវភៅអំណានថ្មីសម្រាប់ឆ្នាំសិក្សានេះ ដែលគ្រោងចាប់ផ្ដើមក្នុងខែកក្កដា រួមទាំងសេណារីយ៉ូមួយចំនួនដូចជាយុវវ័យផ្ដោតលើស្នេហាសំខាន់ជាងការសិក្សា គូស្នេហ៍ខ្ទើយដែលធ្វើឲ្យបែកស្រោម និងភ្ញៀវនៅហាងខារ៉ាអូខេឲ្យលុយនារីរត់តុជាថ្នូរនឹងសិចជាដើម។
កម្មវិធីអប់រំផ្លូវភេទនេះ ធ្លាប់ត្រូវបានក្រុមអ្នកអភិរក្សក្នុងប្រទេសប្រណិប័តន៍ព្រះពុទ្ធសាសនាមួយនេះមានការខឹងសម្បាយ៉ាងខ្លាំង។
អ្នកប្រើប្រាស់ហ្វេសប៊ុក Aung Pho Min បានសរសេរសំដៅរូបថតក្របសៀវភៅសម្រាប់សិស្សវ័យ ១៦-១៧ ឆ្នាំ ដែលបង្កឲ្យមានជជែកគ្នាបែកផ្សែងតាមអនឡាញថា៖ «តើនេះជាសៀវភៅរៀន ឬជាសៀវភៅអាសអាភាស?»។
យុវវ័យដែលទីភ្នាក់ងារ AFP សាកសួរបានផ្ដល់សញ្ញាមេដៃល្អចំពោះការសិក្សាអប់រំផ្លូវភេទ ដោយបានសារភាពថា ពួកគេបានព័ត៌មានទាំងនេះតែពីហ្វេសប៊ុក និងមិត្ដភក្ដិ។
Yoon Shwe Bhon អាយុ ១៦ ឆ្នាំនិយាយថា៖ «ខ្ញុំបានអានបញ្ហាផ្លូវភេទនេះ តែនៅលើអនឡាញប៉ុណ្ណោះ។ ដូច្នេះវាពិតជាសំខាន់ណាស់»។
PhyuPhyu Thin ជាអ្នកបង្កើតយុទ្ធនាការ និងសមាជិកសភាមកពីគណបក្សសម្ព័ន្ធជាតិ ដើម្បីប្រជាធិបតេយ្យបាននិយាយថា៖ «អ្នកដែលប្រឆាំងនឹងកម្មវិធីសិក្សាទាំងនេះ ជាមនុស្សមិនរស់នៅក្នុងសង្គមពិតឡើយ»៕ AFP/HR
