ក្រុងញូវយ៉ក: លោក អេរិក ហ្វីនមេន ជាមហាសេដ្ឋី Bitcoin ក្មេងបំផុតក្នុងលោក ទើបបានបង្កើតកិត្ដិនាមល្បីល្បាញចំពោះការបង្កើតដៃសិប្បនិម្មិត ៤ រចនាប័ទ្មឈុតវេជ្ជបណ្ឌិត មឹក ដែលមានមុខងារ និងដំណើរការប្រក្រតីសម្រាប់ឲ្យអ្នកគាំទ្រភាពយន្ត Marvel វ័យក្មេង ដែលបានកើតរោគរឹងសន្លាក់។
យុវជន ហ្វីនមេន អាយុ ១៩ ឆ្នាំ ដែលទ្រព្យសម្បត្ដិប្រមាណ ៣ លានដុល្លារ បានចូលរួមនឹងគម្រោងជាច្រើន រហូតដល់កិច្ចសហការ ជាមួយអង្គការ NASA តែសមិទ្ធផលដ៏គួរឲ្យមោទនៈបំផុតរបស់លោកគឺការប្រែកាឡាអ្នកគាំទ្រសៀវភៅរឿង Marvel អាយុ ១០ ឆ្នាំទៅជាសត្វចម្លែក Dr. Octopus ដោយមានជំនួយពីអវយវៈសិប្បនិម្មិត។
រូបរាងអវយវៈដ៏ចម្លែកនោះ មានដៃ ៤ ដែលគ្រប់គ្រងដោយឧបករណ៍បញ្ជាតូចៗបំពាក់នៅផ្នែកខាងក្រោយ ដែលផ្ដល់ថាមពល ដោយម៉ូទ័រតូចៗចំនួន ៨ គ្រាប់ ប្រើថាមពលដោយអាគុយម៉ូតូ ៤ ប្រអប់។ វាពិតជាតូច និងមានទម្ងន់ ៥,៦០ គីឡូក្រាម សម្រាប់ក្មេងប្រុសអាយុ ១០ ឆ្នាំ មានជំងឺសន្លាក់ អារីស្ដូ មីហាន។
ជាលទ្ធផល ឈុត Dr. Octopus ដ៏អស្ចារ្យរបស់កុមារា អារីស្ដូ គ្រាន់តែជាគំរូបឋមដែលមានសមត្ថភាពត្រឹមលើកវត្ថុស្រាលៗ និងធ្វើឲ្យកុមារាមានរូបរាងឡូយនៅចំពោះមុខមិត្ដភក្ដិតែវាក៏ជាជំហានអភិវឌ្ឍន៍ដំបូងផងដែរ។
លោកអេរិក ហ្វីនមេន ជឿថា ថ្ងៃណាមួយ ឈុតមឹកនេះអាចកាន់លើកវត្ថុធ្ងន់ៗ ដូចជា រថយន្ដ និងប្រើប្រាស់ក្នុងមុខងារឧស្សាហកម្ម ដូចជា ការដ្ឋានសំណង់ ឬវេជ្ជសាស្ដ្រ៕HR