ស្ងាត់ៗ តារាចម្រៀង វ៉ាន់ នីឡា ប្រកាសលក់ផ្ទះវីឡាបន្ទាន់
ភ្នំពេញ៖ រសាត់ពីវិថីសិល្បៈមកស្វិតស្វាញនឹងជំនួញលក់សម្លៀកបំពាក់ម៉ូដបស្ចិមប្រទេស អតីតតារាចម្រៀងជ្រកនៅទ្រនំភ្លេងរីខត ដែលមានឈ្មោះពិត សុខ ចិន្តា ហៅ វ៉ាន់ នីឡា នៅសុខៗស្រាប់តែប្រកាសលក់ទ្រព្យសម្បត្តិ ជាផ្ទះវីឡាប្រណីត ទាំងរូបនាងពុំធ្លាប់បង្ហោះបង្អួតភ្នែកនរណាសោះនោះ។
ភ្ជាប់នឹងរូបថតសំណង់ផ្ទះដ៏ស្រស់ស្អាតអតីតតារាចម្រៀងកញ្ញា វ៉ាន់ នីឡា បានប្រកាសលក់ផ្ទះបង្ហើរតាមហ្វេសប៊ុកខ្លួនដោយសារថា៖ «ផ្ទះលក់ និយាយពិត» ដែលធ្វើឱ្យមិត្តបណ្តាញសង្គមភ្ញាក់ផ្អើលនឹងរឿងនេះមិនតិចឡើយ។
ក្រោយពីបង្ហោះរឿងលក់ផ្ទះនោះមកក៏មានប្រិយមិត្តចូលទៅសួរនាំច្រើន ដោយមានការជជីកសួរថា៖ «លក់ផ្ទះនេះ ដើម្បីទិញផ្ទះវីឡាធំជាងហ្នឹងមែន? ហើយមានទីតាំងនៅឯណា? តម្លៃប៉ុន្មានដែរ?»។
យ៉ាងណាព័ត៌មានលម្អិតរឿងលក់ផ្ទះនេះ ជាការពិតមែន ឬយ៉ាងណា ភ្នំពេញប៉ុស្តិ៍មិនអាចទំនាក់ទំនងកញ្ញា វ៉ាន់ នីឡា បានតាមទូរស័ព្ទឡើយ ដោយទូរស័ព្ទចូលច្រើនដង តែគ្មានអ្នកលើកទទួល។
ចំណែកឯទីតាំងផ្ទះលក់នោះ ទំនងជាការពិត ដោយឃើញកញ្ញា វ៉ាន់ នីឡា បានតបសារថា៖ «ផ្ទះនោះមានទីតាំងនៅផ្លូវជាតិ ៦A នៅបាក់ខែង។ ហើយចង់ដឹងតម្លៃអាចឆាតសួរ ឬ Inbox »។
ក្រោយព្យុះជីវិតជុំវិញបណ្ដឹងក្ដីក្ដាំជាមួយអតីតសង្សារជុំវិញការចែកចាយរូបភាពឯកជន ទោះជាអតីតតារាចម្រៀង វ៉ាន់ នីឡា ពុំទាន់ក្ដាប់ឱកាសកាន់ក្បាលមេក្រូបង្ហើរសំនៀងក្នុងស្ទូឌីយោ ឬឆាកតន្ត្រីដូចគ្រាកំពុងល្បីខ្លាំងក៏ពិតមែន ប៉ុន្តែគេសង្កេតឃើញថា តារាស្រីរូបនេះបានងាកមកសស្រោកសស្រាំនឹងការងារជំនួញសម្លៀកបំពាក់ ស្របពេលដែលដងខ្លួនដ៏ស្លីមរបស់នាងក៏អំណោយផលក្នុងការធ្វើជាម៉ូដែលឱ្យផលិតផលរបស់ខ្លួនឯងស្រាប់ហើយនោះ។
គេនៅចាំបានថា កាលពីដើមឆ្នាំ ២០២១ នេះ កញ្ញា វ៉ាន់ នីឡា ហាក់មានភាពផុសផុលនឹងការថតស្ប៉តពាណិជ្ជកម្ម ជាជាងការនឹកចង់វិលមកប្រឡូកក្នុងសិល្បៈចម្រៀងវិញ ខណៈកញ្ញាធ្លាប់បានអះអាងថា នឹងមិនបោះបង់ចោលឡើយ ក្រោយពីបាត់មុខមួយរយៈធំមកនោះ។
អតីតជាតារាចម្រៀងជ្រកនៅទ្រនំភ្លេងរីខត ជាបុត្រសម្ព័ន្ធផលិតកម្មហង្សមាស បានព្រលយសារកាលដើមឆ្នាំថ្មី ២០២១ មួយឃ្លាថា៖ «ការងារដំបូងជាមួយបងប្រុស» ដែលនេះជាសារអមនឹងរូបថតស្ប៉តពាណិជ្ជកម្ម ជាមួយនឹងតារាសម្តែងប្រុសម្នាក់មានត្រេមុខដូចកូនកាត់បរទេស៕
