អ្នកនាង សុន ស្រីពេជ្រ តារាចម្រៀងស្រី ម៉ៅដាច់វិស័យទេសចរណ៍។ ភ្នំពេញប៉ុស្តិ៍, សុន ស្រីពេជ្រ តែងតែបង្ហោះសារអរគុណដល់មិត្ត-សិល្បៈដែលជួយបរិច្ចាគប្រាក់។ រូបថត ហ្វេសប៊ុក
.jpg)
ភ្នំពេញ៖ ក្រោយពីដាច់ចិត្តបង្ហោះសារទាំងកាត់ក្តីអាម៉ាស់ ដោយសារស្ថានភាពទ្រទ្រង់ជីវភាពកាន់តែដុនដាបខ្លាំង នៅក្នុងគ្រាពេលកំពុងតែមានវិបតិ្តជំងឺកូវីដ ១៩ ហើយត្រូវការប្រាក់បន្ទាន់ដើម្បីបង់ថ្លៃព្យាបាលប្អូនប្រុសបង្កើតជំងឺខូចខួរឆ្អឹងខ្នង និងខ្វះគ្រាប់ឈាមនោះ ទើបតារាចម្រៀងស្រីម៉ៅដាច់ខាងវិស័យទេសចរណ៍អ្នកនាង សុន ស្រីពេជ្រ ប្រកាសសុំជំនួយពីមិត្តភក្តិក្នុងវិស័យសិល្បៈ និងសប្បុរសជននានា។
តារាចម្រៀងអ្នកនាង សុន ស្រីពេជ្រ ជួបរឿងពិបាកចិត្តផ្ទួនៗ ដោយលោកឪពុកនាង គឺតារាកំប្លែងជើងចាស់ នាយ សង់ស៊ីស មានជំងឺប្រចាំកាយមិនអាចនិយាយបាន ហើយពេលនេះ ប្អូនបង្កើតក៏មានសភាពជំងឺធ្ងន់ ត្រូវការសង្គ្រោះបន្ទាន់ពីគ្រូពេទ្យ តែនាងបានជួបបញ្ហាវិបត្តិសេដ្ឋកិច្ចក្នុងគ្រួសារ នៅចំពេលដែលរាល់ប្រភពចំណូលពីសិល្បៈរបស់ខ្លួនក៏ត្រូវបានបិទផ្លូវដោយសារតែជំងឺកូវីដ ១៩។
តែយ៉ាងណា បន្ទាប់ពីអ្នកនាង សុន ស្រីពេជ្រ ប្រកូកប្រកាសមិនខ្លាចអន់ឈ្មោះជាតារាមានគេស្គាល់ច្រើនរួចមក ឃើញមនុស្សជាច្រើនសង្វេគអាណិតអាសូរជួយសម្រួលទុក្ខភ័យនេះ និងត្រូវបានក្រុមមិត្តអ្នកសិល្បៈបានផ្ញើថវិកាជួយសង្គ្រោះប្អូនប្រុសនាងជាហូរហែ អាចជួយបន្ធូរភាពតានតឹងរបស់ សុន ស្រីពេជ្រ និងសាច់ញាតិផងដែរ។ កាន់តែពិសេសនោះ ក៏មានការយកចិត្តទុកដាក់ពីសំណាក់សមាគមគ្រូពេទ្យស្ម័គ្រចិត្តសម្តេចតេជោ។
ពីគណនីហ្វេសប៊ុកខ្លួនអ្នកនាង សុន ស្រីពេជ្រ បានសរសេរសាររៀបរាប់ជាថ្មីថា៖ «នាងខ្ញុំ សុន ស្រីពេជ្រ តំណាងឲ្យក្រុមគ្រួសារ និងប្អូនប្រុស ដែលសព្វថ្ងៃកំពុងតែសម្រាកព្យាបាលនៅមន្ទីរពេទ្យ សូមគោរពថ្លែងអំណរគុណ និងអរគុណយ៉ាងជ្រាលជ្រៅដល់សមាគមគ្រូពេទ្យស្ម័គ្រចិត្តសម្តេចតេជោ ដែលតែងតែយកចិត្តទុកដាក់ និងខ្នះខ្នែងដល់ប្អូននាងខ្ញុំ និងគ្រប់បងប្អូនអ្នកជំងឺដោយឥតគិតថ្លៃ និងអរគុណដល់មន្ទីរពេទ្យផងដែរ បានយកចិត្តទុកដាក់ថែទាំ និងព្យាបាលគ្រប់អ្នកជំងឺ។ នាងខ្ញុំ សូមលើកម្រាមដៃដប់ ជូនពរដល់សមាគមគ្រូពេទ្យស្ម័គ្រចិត្ត និងក្រុមលោកគ្រូពេទ្យសូមឲ្យទេវតាតាមថែរក្សាឃុំគ្រង សូមឲ្យមានសុខភាពល្អជានិច្ចនិរន្តរ៍»។
លើសពីនេះ តារាចម្រៀងស្រី សុន ស្រីពេជ្រ ក៏បានសរសេរសារ ថ្លែងអំណរគុណទៅគ្រប់ពេលរាល់ការមានការជួយបរិច្ចាគប្រាក់ ជាហូរហែតាមទឹកចិត្តនៃក្រុមមិត្តអ្នកសិល្បៈ និងសប្បុរសជនផ្សេងៗផងដែរ ខណៈក្រៅពីនោះក៏ខំ live ហ្វេសប៊ុកលក់ផលិតផលនានាដូចជា ម៉ាស់ជាដើមនោះ ដើម្បីផ្សំប្រាក់ខ្លះជួយបង់ថ្លៃព្យាបាលជំងឺប្អូនប្រុសនាង ដែលកំពុងតែសម្រាកព្យាបាលនៅមន្ទីរពេទ្យនោះ៕
