ភ្នំពេញៈ ស្របពេលដែលស្ងប់ស្ងាត់ការបណ្តើរគ្នាយ៉ាងត្រសងចូលរួមនៅក្នុងកម្មវិធីតូចធំ និងការសម្តែងកុនរួមគ្នាមួយរយៈមកនោះ តារាចម្រៀង និងតារាសម្តែងស្រី រូបស្រស់ កញ្ញា គាត សុវណ្ណាឡាង បង្ហើបជាសាធារណៈថានាងមិនធ្លាប់មានទំនាក់ទំនងស្នេហាជាមួយនឹងតារាសម្តែងប្រុស រាងខ្ពស់ស្រឡះ លោក លឹម ជាឡាយ នោះឡើយ។
តាមរយៈការសម្តែងកុនជាមួយគ្នាជាច្រើនរឿង និងវត្តមានដឹកដៃគ្នាចូលរួមកម្មវិធីជប់លៀងផ្សេងៗ យ៉ាងល្អូកល្អឺន ដូចជាគូស្នេហ៍ថ្មីថ្មោង ហើយក៏ត្រូវបានមហាជនគិតថា ស្រីស្រស់ គៀត សុវណ្ណាឡាង និងប្រុសស្អាត លឹម ជាឡាយ ពិតជាមានទំនាក់ទំនងស្នេហា ក្រៅឆាកអស់រយៈពេលច្រើនឆ្នាំមកហើយដែរ។ ដោយសារតែភាគីសងខាងមិនដែលបកស្រាយការពិត ក្រៅពីនិយាយថា៖ «នៅពេលនេះ មិនមែនជាគូស្នេហ៍ទេ ចំពោះថ្ងៃមុខក៏មិនប្រាកដដែរ» ដែលធ្វើឲ្យអ្នកគាំទ្រតារាសម្តែងមួយគូនេះកាន់តែមានភាពភ័ន្តច្រឡំផងដែរ។
ជំនួបក្នុងថ្ងៃសម្ភោធរឿង «ជួបស៊យវគ្គ២» របស់ផលិតកម្ម LD Picture កាលថ្មីៗនេះ តារាសម្តែងស្រី ដែលកំពុងទទួលបានប្រជាប្រិយភាពខ្លាំងពីមហាជនកញ្ញា គៀត សុវណ្ណាឡាង បានបកស្រាយពីបញ្ហានេះមកកាន់បណ្តាអ្នកសាព័ត៌មានឲ្យដឹងថា៖ «ខ្ញុំ និងបង ជាឡាយ ពិតជាមិនធ្លាប់បានស្រលាញ់គ្នាពិតមែន គ្រាន់តែជាអ្នករួមការងារធម្មតាទេ ប៉ុន្តែអ្នកគាំទ្របានឃើញពួកយើង សម្តែងរួមគ្នាច្រើនរឿង ទើបធ្វើឲ្យពួកគាត់ផ្គូផ្គងតែម្តងទៅ»។
តារាស្រីមានភាពលេចធ្លោក្នុងអាជីពសម្តែងជាងចម្រៀងរូបនេះ បានបញ្ជាក់បន្ថែមថា៖ «ពួកយើងមិនដែលបាននិយាយទេថា បានស្រលាញ់គ្នា។ កាលដែលនិយាយថា រឿងថ្ងៃមុខមិនប្រាកដនោះ ដោយសារតែថ្ងៃមុខទៅអ្នកណាក៏មិនដឹងថា មានរឿងអីកើតឡើងដែរត្រូវអត់? ប៉ុន្តែសំខាន់ម្តងមានគេថា ខ្ញុំបានក្បត់ចិត្តបង ជាឡាយ ម្តងថាបង ជាឡាយ ក្បត់ចិត្តខ្ញុំ ក្បត់អីបើពួកខ្ញុំ មិនដែលស្រលាញ់គ្នាផង! បើធ្លាប់មានចិត្តស្រលាញ់គ្នាតែបន្តិច ហើយមានគេនិយាយមកចឹងក៏អស់ចិត្តដែរ តែនេះគ្មានអ្វីពាក់ព័ន្ធគ្នាផងហ្នឹង!»។
តារាសម្តែងស្រីរូបនេះ បង្ហើបទៀតថា៖«ខ្ញុំធ្លាប់បាន Post រូប ហើយដាក់ថា ជាគូដណ្តឹងជាមួយគាត់ (លោក លឹម ជាឡាយ)មែន ប៉ុន្តែវាជាសាច់រឿងតាស! ហើយភាពស្និទ្ធិស្នាលរបស់ពួកខ្ញុំ កន្លងមក គឺដូចបងប្អូន និងអ្នករួមការងារតែប៉ុណ្ណឹង រឿងដែលយល់ច្រឡំកន្លងមក គឺជាចាប់គូពីអ្នកគាំទ្រតែប៉ុណ្ណោះ ហើយអ្នកគាំទ្រខ្ញុំខ្លះទៀតគាត់បានបង្កើតផេកដាក់ឈ្នោះខ្ញុំ និងបង ជាឡាយ រួមគ្នាទៀត ធ្វើឲ្យគេកាន់តែយល់ច្រឡំផងដែរ»៕