អតិថិជនទទួលទានអាហារ Fast Food និងជក់កញ្ឆាក្នុងបំណងកម្សាន្ត។ រូបថត AFP
.jpg)
ក្រុងឡូសអេនជឺលេស៖ ភោជនីយដ្ឋានកញ្ឆាដំបូងនៅអាមេរិកបានបើកទ្វារក្នុងក្រុង West Hollywood ដោយបម្រើមុខម្ហូបផ្សំពីផលិតផលរុក្ខជាតិច្រើនប្រភេទ និងរំពឹងថា នឹងអាចប្រកួតប្រជែងជាមួយហាងកាហ្វេល្បីនៅហូឡង់ផងដែរ។
ឈ្មោះ Lowell Farms: A Cannabis Cafe ភោជនីយដ្ឋានមាន ២៤០ កៅអី បើកទទួលភ្ញៀវចាប់ពី ២១ នាក់ឡើង ដែលអាចកុម្ម៉ង់ពីតារាងកញ្ឆា ដូចអ្វីដែលពួកគេកុម្ម៉ង់ស្រាទំពាំងបាយជូរអ៊ីចឹង។
«Flower Hosts» ឬបុគ្គលិកផ្នែកកញ្ឆាវេជ្ជសាស្ដ្រ ជួយផ្ដល់ការណែនាំដល់ភ្ញៀវជ្រើសរើសលើតារាងដែលស័ក្ដិសមនឹងកញ្ឆានីមួយៗ ព្រមទាំងអានុភាព និងរសជាតិផលិតផលខុសៗគ្នា។
នៅលើតារាងនោះ មានកញ្ឆារមូរ ១ ដុំ តម្លៃ ១៨ ដុល្លារ ផ្ដោតលើភាពខ្លាំង ដែលខ្លះអាចទទួលទានបាន ព្រមទាំងភ្ជាប់មកជាមួយនូវខ្សៀបំពង់ និងឧបករណ៍ជក់។
នាយិកាប្រតិបត្ដិ Andrea Drummer បាននិយាយខណៈអ្នកស្រីស្ទង់មតិភ្ញៀវពេលបើកសម្ពោធបណ្ដោះអាសន្នកាលពីថ្ងៃចន្ទថា៖ «ពិតជាអស្ចារ្យដែលយើងបានក្លាយជាផ្នែកមួយនៃប្រវត្ដិសាស្ដ្រ។ វាពិតជាសំខាន់ដែលយើងត្រូវមានទីកន្លែងជក់កញ្ឆាដែលពីមុនទាល់តែទៅក្រុងអាំស្ទែរដាំ ប្រទេស ហូឡង់»។
ហាងកាហ្វេមានបុគ្គលិកជំនាញរង់ចាំសួរនាំភ្ញៀវពីកម្រិតនៃការប្រើប្រាស់កញ្ឆារបស់ពួកគេ។ រូបថត AFP
អ្នកស្រីនិយាយថា អតិថិជនខំហោះមកតាំងពីគ្រប់ទិសទីនៃប្រទេស និងប្ដីប្រពន្ធ ១ គូ ថែមទាំងបានធ្វើដំណើរមកតាំងពីចក្រភពអង់គ្លេស។
ការបើកសម្ពោធហាងកាហ្វកញ្ឆាកាលពីសប្ដាហ៍មុននេះបានកើតឡើង ខណៈពេលរដ្ឋជាច្រើនរបស់សហរដ្ឋអាមេរិកបានអនុម័តសិទ្ធិស្របច្បាប់ចំពោះការប្រើប្រាស់កញ្ឆានាពេលថ្មីៗ ទាំងបំណងវេជ្ជសាស្ដ្រ និងការកម្សាន្ដ។ យ៉ាងណាមិញ ឱសថនេះនៅតែខុសច្បាប់ក្នុងកម្រិតសហព័ន្ធ។
Drummer បាននិយាយថា បុគ្គលិកផ្នែកកញ្ឆាវេជ្ជសាស្ដ្រ ៤០ នាក់ ប្រចាំភោជនីយដ្ឋាន ត្រូវបានបណ្ដុះបណ្ដាលឲ្យតាមដានសកម្មភាពភ្ញៀវ ដើម្បីធានាថា ពួកគេអាចទទួលយកនូវអានុភាពកញ្ឆាដែលពួកគេកុម្ម៉ង់ និងមិនវង្វេងវង្វាន់។
អ្នកស្រីបានឲ្យដឹងថា៖ «បុគ្គលិករបស់យើងពិតជាមានជំនាញ និងបទពិសោធក្នុងការសាកសួរភ្ញៀវថា តើអានុភាពកញ្ឆាជ្រួតជ្រាបដល់កម្រិតណា»។
ចំពោះ Matt Kirschner ភោជនីយដ្ឋានថ្មី គឺជាតម្រូវការរបស់ប្រជាជនតាំងពីយូរ។
យុវសិស្សផ្នែកច្បាប់វ័យ ២២ ឆ្នាំ បាននិយាយខណៈលោកបានជក់បង្ហុយកញ្ឆាអមដោយនំឈីស និងសាំងវិចសាច់មាន់ជាមួយមិត្ដភក្ដិ Lowell''s ថា៖ «នេះ គឺជាឱកាសដ៏អស្ចារ្យ ដែលសហរដ្ឋអាមេរិកអនុវត្ដវប្បធម៌នេះក្នុងសករាជថ្មី»។
យុវជនរូបនេះបន្ដថា៖ «យើងបានទទួលបទពិសោធរសជាតិកញ្ឆាហើយជាតិនេះពិតជាមានសំណាងមែន»៕ AFP/HR
