តារាសម្តែងលោក អេដវីន និងអតីតប្រពន្ធចាងហ្វាងផលិតកម្ម LD។ រូបថត ហ្វេសប៊ុក
.jpg)
ភ្នំពេញៈ ថ្មីៗនេះបង្កការភ្ញាក់ផ្អើលយ៉ាងខ្លាំងដោយសារមានលេចចេញបណ្តុំរូបបែបស្និទ្ធស្នាលខ្លាំងរវាងតារាសម្តែងប្រុសរូបសង្ហាឈ្មោះពិត យិត មាសឧស្សាហ៍ ហៅ អេដវីន និងស្ត្រីអតីតជាភរិយាម្ចាស់ផលិតកម្ម LD។
ក្រោយពីឃើញរូបភាពស្អិតល្មួតប្រៀបដូចជាគូស្នេហ៍ថ្មោងថ្មីរវាងលោក អេដវីន និងអ្នកនាង នាង សុទ្ធ បញ្ចកា ដែលអតីតគឺជាប្រពន្ធរបស់លោក លៀក លីដា ជាចាងហ្វាងផលិតកម្មភាពយន្ត LD ជាច្រើនសន្លឹកនោះក៏ក្លាយជាប្រធានបទលើកយកមកជជែកគ្នាយ៉ាងក្តៅគគុកចេញជាផ្សែងពាក្យថា៖ «អីយ៉ា!តារាសម្ដែង អែដវីន កំពុងតែតាមសុំស្នេហ៍នឹងអតីតភរិយាលោក លៀក លីដា ទេតើនៀក?» និងសារមួយទៀតថា៖ «តារាសម្ដែងប្រុស អែដ វីន កំពុងតែតាមស្រឡាញ់អ្នកនាង សុទ្ធ បញ្ចកា តាំងពីនាងមិនទាន់រៀបការនឹងម្ចាស់ផលិតកម្ម LD មកម្ល៉េះគឺនៅពេលអ្នកទាំង ២ រៀនវិទ្យាល័យជាមួយគ្នា!»។
ខណៈព័ត៌មាននេះក៏បានលេចឮពេញបណ្តាញសង្គមតែម្តង រឿងអតីតភរិយាលោក លៀក លីដា ម្ចាស់ផលិតកម្ម LD គឺអ្នកនាង សុទ្ធ បញ្ចកា ហាក់ស្និទ្ធស្នាលប្លែកជាមួយនឹង អែដវីន ដែលធ្វើឲ្យប្រិយមិត្តសង្ស័យថាអ្នកទាំង ២ កំពុងមានទំនាក់ទំនងស្នេហាជាមួយគ្នានោះ បើតាមការសង្កេតលើសកម្មភាពស្និទ្ធស្នាល និងការបង្ហាញមុខទៅណាមកណាជាគូហាក់ដូចជាគូស្នេហ៍នឹងគ្នាតែម្តង។
បើតាមប្រភពអ្នកសិ្នទ្ធក្នុងសង្គមសិល្បៈនោះ បង្ហើបថាបុរសសង្ហាជាតារាសម្ដែងកំពុងតែឡើងកូដ អែដវីន នេះតែងតាមយកចិត្តអ្នកនាង បញ្ចកា ខ្លាំងណាស់តាំងពីពេលនៅរៀនវិទ្យាល័យមកគឺតារារូបនេះខំតាមព្យាយាមសុំស្នេហ៍នាង ម្ដងហើយម្ដងទៀត តែពុំបានសម្រេចឡើយ ដោយសារនាងមានទំនាក់ទំនងជាមួយលោក លៀក លីដា ដែលជាម្ចាស់ផលិតកម្ម LD។
ប្រភពដដែលក៏លួចប្រាប់ទៀតថា៖ «និយាយទៅ អែដវីន ជាសុភាពបុរស មានស្នេហ៍ស្មោះណាស់ គ្រាន់តែឮថា មនុស្សស្រីដែលខ្លួនធ្លាប់ស្រឡាញ់ខូចចិត្តក្រោយពីលែងលះជាមួយនឹងលោក លៀក លីដា ដែលពាក់ព័ន្ធរឿងរ៉ាវប្តីលួចលាក់ស្នេហាជាមួយនឹងតារាសម្ដែងស្រី កញ្ញា សាឡាត់ ស្រីឡាង។
ភ្លាមៗនោះកំលោះរូបសង្ហាមានក្តីអាណិតនាង ហើយចង់ទៅលួងលោមមនុស្សស្រីដែលខ្លួនធ្លាប់ស្រឡាញ់កុំឲ្យគិតច្រើន»។
ចំពោះរឿងបានបែកធ្លាយថា មានសម្ព័ន្ធស្នេហ៍នឹងអតីតភរិយារបស់ថៅកែផលិតកម្ម LD នោះ តារាសម្តែងប្រុសលោក យិតមាស ឧស្សាហ៍ហៅលោក អែដវីន បានបកស្រាយយ៉ាងខ្លីប្រាប់ភ្នំពេញប៉ុស្តិ៍ថា៖ «អូ!បង តាមពិតរឿងមិនពិតទេ!ខ្ញុំ និងគាត់ [អ្នកនាង សុទ្ធ កញ្ចកា អតីតប្រពន្ធលោក លៀក លីដា] គ្រាន់តែជាមិត្តភក្តិគ្នាកាលនៅរៀនតែប៉ុណ្ណោះ»៕
