ក្រុងហ្វ្រេងហ្វើត អេមមេន៖ ក្រុមហ៊ុនផលិតសម្លៀកបំពាក់ និងស្បែកជើងកីឡាអាល្លឺម៉ង់ Adidas បានឲ្យដឹងពីថ្ងៃអង្គារថា បរិមាណជាងពាក់កណ្ដាលនៃក្រណាត់នីឡុង ដែលខ្លួនប្រើប្រាស់សម្រាប់ផលិតខោអាវ និងស្បែកជើងឆ្នាំនេះ មានប្រភពមកពីរបស់ច្នៃប្រើប្រាស់ដូចជាសំរាមប្លាស្ទិកជាដើមឡើងវិញ។
យោងតាមសេចក្ដីថ្លែងការណ៍របស់ក្រុមហ៊ុនយក្សនេះ នៅឆ្នាំ ២០២០ នេះ ភាគរយនៃក្រណាត់នីឡុងក្នុងចង្វាក់ផលិតកម្ម Adidas នឹងបង្កើនលើសពី ៥០ ភាគរយ ជាលើកដំបូង។
សម្រាប់ឆ្នាំ ២០២៤ ក្រុមហ៊ុនរំពឹងថា នឹងអាចប្រើសំរាមប្លាស្ទិក និងច្នៃរបស់បោះចោលយកមកប្រើប្រាស់ឡើងវិញទាំងស្រុង ក្នុងការផលិតខោអាវ ស្បែកជើង កាបូប និងឧបករណ៍ពាក់ការពារជើង។
នៅឆ្នាំ ២០២០ Adidas រំពឹងថា នឹងអាចប្រើប្រាស់សំរាមប្លាស្ទិកប្រមូលពីឆ្នេរខ្សាច់ និងតំបន់ឆ្នេរ សម្រាប់ការផលិតស្បែកជើងពី ១៥ ទៅ ២០ លានគូ។
កាលពីឆ្នាំមុន ក្រុមហ៊ុនយក្សអាល្លឺម៉ង់មួយនេះបានបញ្ចេញលក់ស្បែកជើង ១១ លានគូ ជាផលិតផលច្នៃចេញពីរបស់គេបោះចោល ដែលចំនួននេះស្មើនឹងមួយចំណែកតូចនៃបរិមាណផលិតស្បែកជើង Adidas ៤០០ លានគូ ជារៀងរាល់ឆ្នាំ។
ក្រុមហ៊ុនក៏បានបង្ហាញជំហរថានឹងបេសកកម្មរួមចំណែកកាត់បន្ថយការបំពុលមហាសមុទ្រដោយសំរាមប្លាស្ទិក តាមរយៈការច្នៃស្បែកជើងឈ្មោះថា Futurecraft Loop ដែលផលិតពីសំរាមប្លាស្ទិកទាំងស្រុង ត្រៀមសម្រាប់ចេញលក់នៅទីផ្សារនាឆ្នាំ ២០២១ ខាងមុខនេះ។
ចាប់តាំងពីឆ្នាំ ២០១៥ មក Adidas បានផ្ដើមសហការជាមួយអង្គការបរិស្ថាន Parley ការពារមហាសមុទ្រ ដោយប្រើប្រាស់សំរាមច្នៃធ្វើជាអាវកីឡាបាល់ទាត់ឲ្យក្លិប Real Madrid និង Bayern Munich៕ AFP