ភ្ញៀវទេសចរជាតិ និងអន្ដរជាតិដើរកម្សាន្ដក្នុងឧទ្យានជាតិកែបដ៏ស្រស់ត្រកាល។ ហុង មិនា
.jpg)
ក្រុងកែប៖ ផ្សារក្ដាមច្បាស់ជាគោលដៅអាទិភាពដំបូងរបស់ភ្ញៀវទេសចរជាតិ និងអន្ដរជាតិ ដែលមិនភ្លេចរសជាតិឈ្ងុយឆ្ងាញ់របស់គ្រឿងសមុទ្រស្រស់ៗ នៅពេលពួកគេធ្វើដំណើរមកដល់ខេត្ដកែប ដ៏តូចបំផុតរបស់កម្ពុជា។ ក្រៅពីឆ្ងាញ់នឹងគ្រឿងសមុទ្រ ការងូតទឹកសមុទ្រ ក៏ដូចជាសម្រាកនៅរីសតមាត់សមុទ្រ នៅអែបជើងភ្នំ ក៏ជាសកម្មភាពវិស្សមកាលនៅលើដែនដីស្ងប់ស្ងាត់មួយនេះផងដែរ។
មិនមានភ្ញៀវច្រើននោះទេ ជាពិសេសទេសចរក្នុងស្រុក បានដឹង និងបានដើរកម្សាន្ដលេងលើភ្នំនៃឧទ្យានជាតិកែប ដែលនៅជិតបង្កើយនឹងផ្សារក្ដាមដ៏ពេញនិយម។
មន្ដ្រីអនុរក្សព្រៃឈើលើឧទ្យានជាតិកែប របស់មន្ទីរបរិស្ថាន ដែលសុំមិនបញ្ចេញឈ្មោះបានឲ្យដឹងថា៖ «ចំពោះភ្ញៀវខ្មែរ ភាគច្រើនជាកូនសិស្ស ដែលពេលណាអត់រៀន ឃើញមានជិះដើរលេង។ ភ្ញៀវបរទេសមានចំនួនអត់ទៀងទាត់ ជួនណា ៣០ នាក់ ហើយជួនណាអត់។ បើនៅរដូវភ្លៀង អត់មានតែម្ដង»។
ឧទ្យានជាតិកែប ត្រូវបានបង្កើតឡើងក្នុងឆ្នាំ ១៩៩៣ ដោយគ្របដណ្ដប់ផ្ទៃដី ៦៦,៦៤ គីឡូម៉ែត្រការ៉េ ផ្ដុំឡើងពីជួរភ្នំតូចមួយដែលរំលេចជាផ្លូវដើរភ្នំសម្រាប់អ្នកនិយមឡើងភ្នំត្រឹមកម្ពស់ជាង ១៤០ ម៉ែត្រ នៃចំណុចកំពូល។ ទេសចរអាចគយគន់ផ្ទៃសមុទ្រជួរភ្នំបូកគោនៅភាគខាងត្បូង ក៏ដូចជាកោះត្រល់ផងដែរ។
ទេសចរខ្លះជ្រើសរើសការជិះម៉ូតូលើឧទ្យានជាតិកែប ដែលមានផ្លូវធំទូលាយ។ហុង មិនា
ដើរចុះក្នុងដំណើរមួយយ៉ាងរំភើយ ដែលមិនបង្ហាញនូវភាពនឿយហត់ខ្លាំង ក្រោយចំណាយពេលប្រមាណ ១ ម៉ោងដើរក្នុងឧទ្យានជាតិកែប ប្ដីប្រពន្ធបារាំង ១ គូ បាននិយាយថា ផ្លូវដើរបរិវេណជុំវិញភ្នំមានលក្ខណៈធំទូលាយ ដែលបង្កភាពងាយស្រួលដើរគយគន់ទេសភាពផ្ទៃសមុទ្រ និងខេត្ដកំពត។
អ្នកស្រី អានណា និងលោក សៃម៉ុន បានប្រាប់ភ្នំពេញប៉ុស្ដិ៍ថា៖ «យើងឡើងទៅឈប់ត្រឹមចំណុចទស្សនាខេត្ដកំពតចម្ងាយ ២ គីឡូម៉ែត្រ ពីច្រកចូល រួចយើងសម្រេចចិត្ដដើរត្រឡប់វិញ។ យើងមិនបានដើរជុំវិញភ្នំនោះទេ ពីព្រោះវាអាចចំណាយពេលយូរ»។
កាន់ឈើតូចមួយក្នុងដៃ អ្នកស្រី អានណា បានឲ្យដឹងថា៖ «ចំណុចគយគន់ទេសភាពល្អបំផុត គឺនៅហាងកាហ្វេ Led Zep ដែលយើងអាចអង្គុយលេង និងទទួលទានភេសជ្ជៈត្រជាក់ៗ ព្រមទាំងការដើរក្រោមម្លប់ឈើទស្សនាសត្វផងដែរ»។
ចំពោះផ្លូវដើរធំទូលាយ ភ្ញៀវទេសចរមានជម្រើសជាច្រើនក្នុងការត្រាច់ចរលើឧទ្យានជាតិកែប រួមទាំងការដើរ ជិះកង់ ម៉ូតូ ខណៈភ្ញៀវមួយចំនួនតូចថែមទាំងបររថយន្ដឡើងទៀតផង។
លោក ប៉ុក ទាង ប្រធានមន្ទីរទេសចរណ៍ខេត្ដកែប បាននិយាយថា៖ «នៅផ្លូវជុំវិញភ្នំ យើងអាចជិះកង់ អ្នកខ្លះជិះម៉ូតូ។ មានផ្លូវដើរ ឬ trekking trail ពីកំពូលភ្នំ ១ ទៅកំពូលភ្នំ ១ លើចម្ងាយផ្លូវ ៨ គីឡូម៉ែត្រ និង ៣០០ ម៉ែត្រនៃផ្ទៃដីប្រមាណ ៩ ០០០ ហិកតា។ អ្នកខ្លះដើរតាមផ្លូវធំនៅខាងក្រោមអ៊ីចឹងទៅ ហើយអ្នកដើរឡើងលើកំពូលភ្នំ ដើម្បីមើលទេសភាពផ្សេងៗ»។
ដើរបញ្ច្រាស់ពីទិសដៅភ្ញៀវដទៃ លោក ឡៅ អិនណារិទ្ធិ ជាមគ្គុទេសក៍ប្រចាំខេត្ដកំពត និងកែប តាំងពីឆ្នាំ ២០០៧ នាំភ្ញៀវជនជាតិអង់គ្លេសជាប្ដីប្រពន្ធ ១ គូ ដើរជុំវិញឧទ្យានជាតិកែប មុននឹងទៅចម្ការម្រេច រូបភ្នំ និងវាលស្រែ។
អ្នកដើរភ្នំនាំគ្នាឈររង់ចាំទិញភេសជ្ជៈពីហាងកាហ្វេ Leb Zep តែមួយគត់លើឧទ្យានជាតិកែប។ហុង មិនា
លោកនិយាយថា៖ «ខ្ញុំនាំភ្ញៀវដើរតាមគោលដៅបញ្ច្រាស់វិញ ដែលមានចម្ងាយត្រឹម ៥ គីឡូម៉ែត្រ។ បើយើងចាប់ផ្ដើមដើរពីត្រជាក់នៃច្រកឡើងដោយឆ្លងកាត់ហាងកាហ្វេ យើងនឹងបញ្ចប់ទៅកន្លែងក្ដៅ តែបើខ្ញុំចាប់ផ្ដើមដើរពីកន្ទុយវិញ ដែលវាអាចក្ដៅតិចៗ យើងនឹងបញ្ចប់នៅហាងកាហ្វេក្រោមម្លប់ឈើត្រជាក់វិញ»។
ខណៈទេសចរបរទេសភាគច្រើនជ្រើសរើសការដើរជាការកម្សាន្ដ ដោយខ្លះមានតែម្នាក់ឯង ខ្លះមាន ២ នាក់ និងខ្លះទៀតមាន ៣ ទៅ ៤ នាក់ នាំគ្នាបោះជំហានឡើងភ្នំជាបន្ដបន្ទាប់ ភ្ញៀវក្នុងស្រុកភាគច្រើនចាប់យកជម្រើសជិះរថយន្ដ និងម៉ូតូលាន់សំឡេងម៉ាស៊ីនទ្រហឹងពេញព្រៃ។ សកម្មភាពប្រើប្រាស់យានយន្ដបំបោលឡើងភ្នំក្នុងឧទ្យានកែប មិនត្រូវបានសាទរពីសំណាក់ភ្ញៀវដើរ និងម្ចាស់ហាងកាហ្វេប៉ុន្មានឡើយ។
ស្ថិតក្នុងសម្លៀកបំពាក់បែបថមប៊យ កន្សែងជួតក្បាល ស្រីពៅ ឈ្មោះហៅក្រៅដែលប្រើប្រាស់ទូទៅ ជាម្ចាស់ហាងកាហ្វេ Led Zep តែមួយគត់លើឧទ្យានជាតិកែប បាននិយាយថា៖ «ខ្ញុំក៏មិនគាំទ្រឲ្យភ្ញៀវខ្លះបើកឡាន និងជិះម៉ូតូឡើងភ្នំនោះដែរ។ កាលពីខែមុន ពេលខ្ញុំជិះម៉ូតូចូលមក ភ្ញៀវជនជាតិបរទេសសម្លក់ខ្ញុំចង់ជ្រុះគ្រាប់ភ្នែកហើយ។ ពួកគាត់ងឿងឆ្ងល់ថា ហេតុអ្វីក្នុងឧទ្យានមានម៉ូតូជិះ តែពេលឃើញខ្ញុំធ្វើការនៅហាងកាហ្វេ គាត់ក៏លែងខឹង»។
ផែនទីបានបង្ហាញអំពីចំណុចគន់ខេត្ដកំពត ទឹកធ្លាក់ស្រីតាល់ ចំណុចកំពូលភ្នំ ទេសភាពឆ្នេរអង្កោល ស្រះតូច មជ្ឈមណ្ឌលតាំងសមាធិ កន្លែងគន់ថ្ងៃលិច និងសេះថ្មជាដើម។
ផ្លូវឡើងឧទ្យានជាតិកែប ស្ថិតនៅក្បែររីសតវេរ៉ង់ដា ចម្ងាយប្រមាណ ៧,៦ គីឡូម៉ែត្រ ពីរង្វល់មូលរូបសំណាក់សេះសក្នុងក្រុងកែប នៃខេត្ដកែប៕
វីដេអូ៖
