ក្យូសជាប់មាត់ទឹកមានចំនួន ១០ រចនាដោយប្រក់ស្បូវនឹងវាំងននស្បៃស្អាតមួយបែប។ រូបថត យូសុះ អាប់ឌុលរ៉ាស់ហ៊ីម
.jpg)
ភ្នំពេញ: ធ្វើដំណើរឆ្លងស្ពានច្បារអំពៅតាមបណ្តោយផ្លូវជាតិលេខ ១ ឆ្ពោះទៅត្រង់ប្រមាណជាង ១០ គីឡូម៉ែត្រហួសវត្តវិវិត្តារាម ត្រង់ស្លាកព្រំប្រទល់ខេត្តកណ្តាលប្រមាណជាង ២០ ម៉ែត្រ ភោជនីយដ្ឋាន «ម្លប់ត្នោតកៀនស្វាយ និងស្ទូចត្រីកម្សាន្ត» ស្ថិតនៅខាងឆ្វេងដៃជាប់នឹងផ្លូវជាតិគឺជាទីលម្ហែកាយថ្មីសន្លាងតម្រូវចិត្តអ្នកគ្មានពេលដើរលេងផ្លូវឆ្ងាយ។
ស្ថិតលើទីតាំងផ្ទៃដីសណ្ឋានវែងជ្រៅ ភោជនីយដ្ឋានម្លប់ត្នោត កៀនស្វាយ និងស្ទូចត្រីកម្សាន្តមានក្យូសលម្ហែនៅលើទឹកមានចំនួន ១០ និងក្យូសនៅលើដីចំនួន ៤។
ក្យូសនីមួយៗមានដំបូលប្រក់ស្បូវ និងមានរចនាវាំងននពណ៌សស្អាតប្លែកដែលអាចទទួលភ្ញៀវមកកម្សាន្តបានចំនួន ១០ នាក់។
ភោជនីយដ្ឋាននេះត្រូវបានរចនាតុបតែងឡើងដោយលោក ស៊ឹង វុទ្ធី ជាម្ចាស់ហាងផ្ទាល់ដែលជាអ្នកមានចំណង់ចំណូលចិត្តស្ទូចត្រី ហើយបានសិក្សាពីវិធីបង្កើតប្លង់តុងជាអាហារធម្មជាតិសម្រាប់ត្រី និងការដាក់កំប្លោកដើម្បីឲ្យទឹករងថ្លា។
ក្យូសតម្រៀបជាជួរជាប់មាត់ទឹកនៅម្លប់ត្នោត កៀនស្វាយ និងស្ទូចត្រីកម្សាន្ត មើលពីខាងលើ។ រូបថត យូសុះ អាប់ឌុលរ៉ាស់ហ៊ីម
ម្ចាស់ភោជនីយដ្ឋាន ម្លប់ត្នោត កៀនស្វាយ និងស្ទូចត្រីកម្សាន្តបានឲ្យដឹងថា៖ «ខ្ញុំចូលចិត្តស្ទូចត្រី រៀងរាល់ថ្ងៃសៅរ៍ អាទិត្យ ទំនេរពីការងារ ខ្ញុំតែងតែដើរលេងកម្សាន្តទៅតាមក្យូសរបស់គេ ហើយពេលទៅក្យូសរបស់គេ វាអត់មានបរិយាកាសប្លែកវាដដែលៗ។ អ៊ីចឹងខ្ញុំនឹកឃើញបង្កើតកន្លែងកម្សាន្ត និងចង់បង្កើតអ្វីដែលប្លែកពីគេ ពិសេសតម្លៃសមរម្យ»។
ភោជនីយដ្ឋាននេះចាប់បើកពីម៉ោង ៩ ព្រឹករហូតដល់ម៉ោង ៩ យប់ដោយមានដើមឈើធំៗផ្ដល់ម្លប់ត្រជាក់កាយ។ រីឯតាមដងផ្លូវដើរមានដាំស្មៅបៃតងខ្ចី លាយជាមួយថ្មចម្រុះពណ៌ បង្កើតបានជាសោភណភាពស្អាតមួយបែប សម្រាប់ភ្ញៀវដែលមកអង្គុយក្យូសជាប់មាត់ទឹក។
ផ្ទៃស្រះទ្រវែងមានបណ្តោយ ៨០ ម៉ែត្រ និងទទឹង ១៥ ម៉ែត្រជាជម្រកត្រីសរុបជាង ១ តោនដូចជាត្រីឆ្ពិន ត្រីប្រា ត្រីទីឡាបយ៉ា ត្រីអណ្តែង និងត្រីជាច្រើនប្រភេទទៀត។
ម្ហូបអាហារមានតម្លៃពី ៨ ពាន់ ដល់ ៥ ម៉ឺនរៀល។ រូបថត យូសុះ អាប់ឌុលរ៉ាស់ហ៊ីម
ភ្ញៀវអាចស្ទូចត្រីលេងបានដោយសន្ទូចមានតម្លៃ ៤ ពាន់រៀលភ្ជាប់ជាមួយនុយស្ទូចត្រី។ ចំណែកត្រីដែលស្ទូចបានមានតម្លៃ ១ គីឡូក្រាម ១ ម៉ឺនរៀល។ ប្រសិនបើភ្ញៀវចង់ភ្លក្សរសជាតិត្រីដោះចេញពីសន្ទូចរបស់ខ្លួន ភោជនីយដ្ឋានគិតតម្លៃ ៨ ពាន់រៀលសម្រាប់ការចម្អិន។
ក្រៅពីទទួលស្គាល់ថានៅមានចំណុចខ្វះខាតខ្លះៗក្នុងដំណើរការទើបតែបានប្រមាណជាង ១ ខែនោះ ម្ចាស់ភោជនីយដ្ឋានម្លប់ត្នោត កៀនស្វាយវ័យ ២៩ ឆ្នាំ ក៏បានកត់សម្គាល់នូវការគាំទ្រពីភ្ញៀវយ៉ាងដូច្នេះថា៖ «ក្នុងមួយថ្ងៃទទួលបានភ្ញៀវជាង ១០០ នាក់ហួសពីការរំពឹងទុក។ ខ្ញុំគិតថាពេលបើកដំបូងភ្ញៀវប្រាកដជាមកមួយៗទេ តែនេះគឺផ្ទុះខ្លាំងនៅក្នុងហ្វេសប៊ុកពេលខ្លះភ្ញៀវសឹងតែអត់មានក្យូសអង្គុយ»។
ភោជនីយដ្ឋានមានចុងភៅអាចធ្វើម្ហូបបាន ៥ សាសន៍ទាំងម្ហូបបែបស្រុកស្រែ និងបែបទីក្រុងដែលមានតម្លៃចាប់ពី ៨ ពាន់រៀលដល់ ៥ ម៉ឺនរៀល។ ម្ហូបពិសេសប្រចាំភោជនីយដ្ឋានម្លប់ត្នោតកៀនស្វាយមានដូចជា មាន់ម្លប់ត្នោត (តម្លៃ ៥ ម៉ឺនរៀល) ប្រហុកខ្ទិះ (តម្លៃ ២ ម៉ឺនរៀល) ត្រីដុតម្លប់ត្នោត (តម្លៃ ២៨០០០ រៀល) ភ្លាប្រពន្ធចុងប្រពន្ធដើម (តម្លៃ ២ ម៉ឺនរៀល)។
ស្រះមានត្រីច្រើនប្រភេទសម្រាប់ភ្ញៀវស្ទូចលេង។ រូបថត យូសុះ អាប់ឌុលរ៉ាស់ហ៊ីម
ក្រៅពីអាហារតម្លៃសមរម្យ និងទីតាំងស្ទូចត្រីលម្ហែជាទីមនោរម្យនោះលោក ស៊ឹង វុទ្ធី ក៏បានបញ្ជាក់ថា៖ «ខ្ញុំនឹងបង្កើតជាក្រុមចម្រៀង និងមានបន្ថែមគ្រឿងលម្អជាច្រើនទៀត ហើយទៅថ្ងៃអនាគតគឺខ្ញុំនឹងពង្រីកដីខាងក្រោយបង្កើតជាបន្ទប់គេងកម្សាន្តមានសួន និងវេរ៉ង់ដា (រានហាល) ដើម្បីឲ្យភ្ញៀវលេងកម្សាន្តរំសាយអារម្មណ៍ ចិញ្ចឹមបង្កងអាចស្ទូចបង្កងលេងបានហើយគាត់មិនបាច់ទៅណាឆ្ងាយនៅតែជិតៗភ្នំពេញក៏មាន»។
ភោជនីយដ្ឋាន ម្លប់ត្នោត កៀនស្វាយ និងស្ទូចត្រីកម្សាន្តអាចទំនាក់ទំនងទូរស័ព្ទលេខ ០១៥ ៧៧៧ ០១៥ ឬទំព័រហ្វេសប៊ុក ម្លប់ត្នោត កៀនស្វាយ នឹងស្ទូចត្រីកម្សាន្ត៕
វីដេអូ៖
