ក្រុងបានលុងៈ ទោះបីជាចម្ងាយផ្លូវរាប់រយគីឡូម៉ែត្រឆ្ពោះទៅកាន់ទឹកដីភូមិភាគឦសាន ខេត្តរតនគិរីអាចធ្វើឲ្យអ្នកដំណើរនឿយហត់អស់កម្លាំងបន្តិចមែនក្តី តែអ្នកទេសចរក៏អាចឆ្លៀតទៅលម្ហែកាយស្រូបយកខ្យល់អាកាសបរិសុទ្ធងូតទឹកឲ្យត្រជាក់កាយ បំបាត់អស់នូវភាពនឿយណាយប៉ះប៉ូវបានវិញភ្លាម នៅឯតំបន់រមណីយដ្ឋានទឹកជ្រោះកាចាញ ដែលស្ថិតនៅក្បែរនឹងក្រុងបានលុង។
រមណីយដ្ឋានទឹកជ្រោះកាចាញស្ថិតនៅភូមិ ២ សង្កាត់កាចាញ ក្រុងបានលុង ខេត្តរតនគិរីមានចម្ងាយប្រមាណតែ ៦ គីឡូម៉ែត្រ ប៉ុណ្ណោះពីក្រុងបានលុងដែលមានប្រភពទឹកហូរមកពីបឹងយក្សឡោម។
ក្រៅពីដើរកម្សាន្តលេងថតរូប និងឡើងផ្ទះជនជាតិ និងចុះលេងទឹកហូររាក់ៗហូរជ្រែកផ្ទាំងថ្មនៅផ្នែកខាងលើមកនោះ ក្រុមទេសចរក៏អាចដើរឆ្លងតាមស្ពានយោលដើម្បីគយគន់ទេសភាពព្រៃប្រឹក្សា និងមើលឃើញយ៉ាងច្បាស់នៃចរន្តទឹកធ្លាក់សក្បុសកម្ពស់ប្រមាណជាង ១០ ម៉ែត្រនៅជាន់ក្រោម ហើយអាចឆ្លៀតថតរូបទុកជាអនុស្សាវរីយ៍បានទៀតផង។
ដោយសារតែស្ថិតនៅកៀកបង្កើយនឹងតំបន់ក្រុង ហើយផ្លូវធ្វើដំណើរចូលទៅក៏ងាយស្រួលទៀតនោះ ទើបធ្វើឲ្យតំបន់ទឹកធ្លាក់ធម្មជាតិមួយនេះមិនសូវខ្សត់ទេសចរមកកម្សាន្តឡើយគឺមានទាំងទេសចរក្នុងស្រុក និងក្រៅស្រុកមកលេងគ្រប់រដូវកាល និងរាល់ថ្ងៃតែម្តង។
បើតាមលោក ស៊ុន សំអូន បុគ្គលិកសហគមន៍នៃតំបន់រមណីយដ្ឋានទឹកជ្រោះកាចាញបានឲ្យដឹងពីចំនួនភ្ញៀវទេសចរមកលេងតំបន់ទឹកធ្លាក់នេះកាលពីឆ្នាំ ២០១៨ កន្លងមកនោះថា៖ «ក្រុមភ្ញៀវទាំងនៅក្នុងតំបន់ជិត និងឆ្ងាយតែងមកលេងនៅទីនេះមិនដាច់ឡើយ។ សម្រាប់ថ្ងៃបុណ្យធំៗវិញមានភ្ញៀវច្រើន ដូចជានៅថ្ងៃបុណ្យចូលឆ្នាំចិនមានភ្ញៀវមកលេងប្រមាណចន្លោះពី ៥០០ ទៅ ៧០០ នាក់ ខណៈរដូវបុណ្យចូលឆ្នាំខ្មែរវិញមានភ្ញៀវជិត ១០០០ នាក់ហើយនៅរដូវបុណ្យអុំទូកចំនួនភ្ញៀវចន្លោះពី ៤០០-៥០០ នាក់»។
សម្រាប់លំហូរភ្ញៀវមកកម្សាន្តនៅថ្ងៃធម្មតា និងចុងសប្តាហ៍វិញនោះហាក់ដូចជាមានភាពខុសគ្នាខ្លាំងតែនៅថ្ងៃបុណ្យទានខាងលើដោយលោក ស៊ុន សំអូន បានបន្តថា៖ «ប្រសិនបើនៅថ្ងៃសៅរ៍-អាទិត្យ ចុងសប្តាហ៍នោះភ្ញៀវមកកម្សាន្តអាចមានចន្លោះពី ៥០-៦០ នាក់ ខណៈនៅថ្ងៃធម្មតាវិញមានក្រុមភ្ញៀវបរទេសមកកម្សាន្តគឺក្នុងចំនួនប្រមាណពី ១០ ទៅ ២០ នាក់សឹងតែរាល់ថ្ងៃ»។
ដោយឡែកការចូលទស្សនានៅឯតំបន់រមណីយដ្ឋានទឹកជ្រោះកាចាញក៏តម្រូវឲ្យក្រុមទេសចរទាំងខ្មែរ និងបរទេសទិញសំបុត្រចូលទស្សនាផងដែរ។ ចំពោះថ្លៃសំបុត្រភ្ញៀវបរទេសម្នាក់តម្លៃ ១ ដុល្លារ ខណៈភ្ញៀវខ្មែរម្នាក់តម្លៃ ៥០០ រៀល និងតម្លៃសេវាកម្មលើយានជំនិះផ្សេងៗទៀតផងដែរមានដូចជាម៉ូតូ ១ គ្រឿងតម្លៃ ១៥០០ រៀល រ៉ឺម៉កកង់បីតម្លៃ ៤០០០ រៀលរថយន្តតូច ៥០០០ រៀលរថយន្តធំ ១៥ ០០០ ហើយរថយន្តទេសចរសាំងយ៉ុងវិញតម្លៃ ១ ម៉ឺនរៀល៕
វីដេអូ៖