ទិដ្ឋភាពទឹកធ្លាក់អន្លង់ស្វាយ មានខ្សែទឹកវែងនៅតំណាក់ទី ៨។ រូបថត យូសុះ អាប់ឌុលរ៉ាស់ហ៊ីម
.jpg)
កំពង់ឆ្នាំង៖ សំឡេងស្រែករន្ថើនយ៉ាងស្រុះគ្នាផ្ដល់ជាកម្លាំងចិត្ដ លាយឡំនឹងសំណើចសើចក្អាកក្អាយពេលបានឃើញទឹកហូរចេញពីបំពង់ទុយោដែលកំពុងត្រូវបានតភ្ជាប់គ្នាបន្ដិចម្ដងៗកាន់តែខិតជិតភូមិឋានរបស់ខ្លួន អង្គុយដកដង្ហើមមួយសន្ទុះ បុរសវ័យខ្ទង់ជិត ៥០ ឆ្នាំ បាននិយាយប្រាប់ថា ទឹកស្អាតជិតបានទៅដល់អ្នកភូមិហើយ។
ទឹកដ៏ថ្លាឈ្វេង និងត្រជាក់ស្រេងនេះ ត្រូវបានបង្ហូរតាមទុយោដែលត្រូវបានតភ្ជាប់គ្នាម្ដងមួយៗដោយមានចម្ងាយជាង ៣ គីឡូម៉ែត្រ បានមកពីប្រភពទឹកនៃទឹកធ្លាក់អន្លង់ស្វាយ ជាតំបន់អេកូទេសចរណ៍ដ៏មានសក្ដានុពលមួយរបស់ខេត្ដកំពង់ឆ្នាំង។
ចម្ងាយប្រមាណ ៥៧ គីឡូម៉ែត្រ ពីទីរួមខេត្ដកំពង់ឆ្នាំង ទឹកធ្លាក់អន្លង់ស្វាយ បានរំលេចនូវសម្រស់ទឹកធ្លាក់ ៩ ដំណាក់ខុសៗគ្នា ដែលផ្ដល់នូវភាពសម្បូរបែបដល់ភ្ញៀវនិយមចូលចិត្ដលេងទឹកជ្រោះ ត្រឹមស្រុកទឹកផុសនេះ។
ក្រោយពីសម្រាកបានបន្ដិច លោក នុត ហេង ជាប្រធានសហគមន៍អេកូទេសចរណ៍ទឹកធ្លាក់អន្លង់ស្វាយ និងជាអ្នកដឹកនាំក្រុមប្រជាសហគមន៍រៀបចំតបណ្ដាញទឹកស្អាត បានប្រាប់ភ្នំពេញ ប៉ុស្ដិ៍ ថា៖ «នៅតាមផ្លូវអូរហូរធ្លាក់ យើងមានកន្លែងកម្សាន្ដទឹកធ្លាក់ជាច្រើនដោយមានរហូតដល់ ៩ ដំណាក់។ ល្បាក់នីមួយៗមានលក្ខណពិសេសខុសៗគ្នា ដោយភ្ញៀវខ្លះនិយាយថា ល្បាក់ទី ៣ និងទី ៤ ល្អ ហើយអ្នកប្រាប់ថា ល្បាក់ទី ៦ និងទី ៧ ល្អ ទៅតាមចំណូលចិត្ដ។ អ្នកខ្លះទៀតអះអាងថា ជាន់ទី ៨ និងទី ៩ ស្អាតល្អជាងគេ»។
ទឹកធ្លាក់អន្លង់ស្វាយដំណាក់ទី ៣ មានកម្ពស់ទាប តែទេសភាពស្អាត។ ហុង មិនា
ទឹកធ្លាក់ត្រជាក់ចិត្ដល្បាក់ទី ៣ រំលេចនូវសណ្ឋានទឹកហូរជម្រាលដូចជណ្ដើរត្រឹម ៨ កាំធ្លាក់ចូលហាងតូចជ្រកក្រោមម្លប់ឈើត្រជាក់ចិត្ដ។ ទឹកធ្លាក់ជាន់ទី ៨ ហូរធ្លាក់កម្ពស់ប្រមាណ ១០ ម៉ែត្រ បត់ចេញជារាងអក្សរ ‘L’ មុនពេលធ្លាក់ចូលអាងដ៏តូចមួយ។ ចំណែកឯល្បាក់ទី ៩ មានសណ្ឋានទឹកហូរជម្រាលប្រមាណ ៥ ម៉ែត្រ ដែលធ្លាក់ចូលអាងធំមួយ។
លោកបាននិយាយថា សហគមន៍ត្រូវបានបង្កើតឡើងក្នុងឆ្នាំ ២០០៤ បំណងអភិរក្សព្រៃឈើទំហំ ១ ៦៦៣ ហិកតា របស់សហគមន៍ និងការផ្សព្វផ្សាយតំបន់អេកូទេសចរណ៍ទឹកធ្លាក់»។
លោក នុត ហេង បានឲ្យដឹងថា៖ «ចំពោះការលើកស្ទួយវិស័យអេកូទេសចរណ៍ក្នុងតំបន់ យើងទើបបានដំណើរការដោយចាប់ផ្ដើមកសាងទីចាត់ការមួយ និងដើរបោះស្លាកសញ្ញានៅតាមជាន់នៃទឹកធ្លាក់នីមួយៗ ព្រមទាំងបន្ទប់ផ្លាស់សម្លៀកបំពាក់បន្ដិចបន្ដួច»។
និយាយបណ្ដើរ ដៃក្បង់ទឹកកំពុងហូរបាចសាចពីបំពង់ទុយោមកលប់មុខបណ្ដើរ លោក ហេង អាយុ ៤៧ ឆ្នាំ បានបន្ដថា សហគមន៍មានពលរដ្ឋចូលរួមចំនួន ៤ ភូមិនៃឃុំក្បាលទឹក តែចំនួនអ្នកប្រើប្រាស់ទឹកស្អាតនេះ មាន ៥ ភូមិ។
មេអំបៅហើរឆ្វែលឆ្វាត់គួរជាទីគយគន់នៅតាមផ្លូវទៅកាន់ទឹកធ្លាក់។ ហុង មិនា
ឈរនៅម្ខាង មិនឆ្ងាយប៉ុន្មានពីប្រធានសហគមន៍ បុរសពាក់អាវក្រហមម្នាក់ក៏បានតាមដានសកម្មភាពក្រុមប្រជាសហគមន៍តបណ្ដាញទឹកដែលបានចម្ងាយជាងពាក់កណ្ដាលទៅហើយ បានបន្ទរដោយសម្ដីឡើងថា ចំពោះកិច្ចការជាមួយសហគមន៍នៅមានគោលបំណងចម្បងមួយនោះ គឺការរៀបចំបណ្ដាញទឹកស្អាតដល់ភូមិឋានពលរដ្ឋ។
លោក ជី បុព្វតា ប្រធានអង្គការបរិស្ថាន និងសង្គមមូលដ្ឋាននៅរាជធានីភ្នំពេញបាននិយាយថា «អង្គការជួយលើទឹកស្អាតដោយចង់កាត់បន្ថយការប្រើប្រាស់អុសឈើដុតដាំទឹក។ ក្នុងមួយគ្រួសារ ពួកគេប្រើប្រាស់អុសដុតប្រហែលជា ១ តោន កាបូនក្នុង ១ ឆ្នាំ»។
ទឹកស្អាតសម្រាប់ប្រជាសហគមន៍នៅខាងក្រោមជួរភ្នំនៃតំបន់ទឹកធ្លាក់បានរួមចំណែកលើកស្ទួយវិស័យអេកូទេសចរណ៍មួយផ្នែកជាមួយនឹងការផ្ដល់ប្រភពទឹកដល់ប្រជាជន ក៏ដូចជាភ្ញៀវទេសចរបានប្រើប្រាស់ផងដែរ។
លោក នុត ហេង បាននិយាយថា «ថ្ងៃនេះ យើងកំពុងតែតបណ្ដាញទឹកស្អាតសម្រាប់ការប្រើប្រាស់ក្នុងភូមិខាងក្រោម។ ពេលយើងមានទឹកនេះទៅ យើងអាចដាក់ឲ្យប្រើប្រាស់ក្នុងបន្ទប់បង្គន់ជូនភ្ញៀវទេសចរ»។
ផ្លូវលំឡើងភ្នំទៅកាន់តំបន់ទឹកធ្លាក់អន្លង់ស្វាយ ទើបត្រូវបានកសាងក្នុងឆ្នាំ ២០១៨ ដោយមូលនិធិឃុំ ដែលខាងសហគមន៍បានចំណាយពេលបញ្ចុះបញ្ចូលពីអត្ថប្រយោជន៍ហេដ្ឋារចនាសម្ព័ន្ធមួយនេះ។
ប្រធានសហគមន៍អេកូទេសចរណ៍លោក នុត ហេង។ហុង មិនា
ទោះបីជាផ្លូវលំឆ្ពោះទៅកាន់តំបន់ទឹកធ្លាក់ ដែលផ្ដល់ភាពងាយស្រួលដល់ការធ្វើដំណើរ និងបានកាត់បន្ថយពេលវេលាដើរឡើងភ្នំសម្រាប់ភ្ញៀវ លោក នុត ហេង បានអះអាងថា វាមិនទាន់គ្រប់គ្រាន់ក្នុងការទាក់ទាញភ្ញៀវទេសចរជាដុំកំភួននៅឡើយ។
ប្រធានសហគមន៍រូបនេះ បានប្រាប់ថា «វានៅមានចំណុចខ្សោយទៀតដែរ ដោយវាមិនទាន់ល្អគ្រប់គ្រាន់នោះទេ ទោះបីជាភ្ញៀវនៅតែមានវត្ដមានក៏ដោយ។ ទី ១ តំបន់នេះ ការលក់ដូរ គឺនៅខ្សោយដោយយើងអត់មានក្យូស ហើយសេវាកម្មម្ហូបអាហារនៅមានបញ្ហាខ្វះខាត។ ដូច្នេះ ភ្ញៀវត្រូវវេចខ្ចប់អាហារផ្ទាល់ខ្លួនមក ឬទាក់ទងក្រុមការងារសហគមន៍ជាមុន ទើបសេវាកម្មម្ហូបអាចផ្គត់ផ្គង់បាន។
ថ្វីដ្បិតតែលោកមើលឃើញពីកំណើនភ្ញៀវទេសចរមកលេងតំបន់ទឹកធ្លាក់អន្លង់ស្វាយច្រើន ក៏លោកមិនឃើញប្រជាពលរដ្ឋសហគមន៍ទទួលបានចំណូលពីវិស័យទេសចរណ៍នៅឡើយទេ។
លោក នុត ហេង បាននិយាយមុនពេលក្រោកឈរ និងទាញយកអន្លូងជួយវាយបញ្ចូលតំណទុយោទឹកថា «ពលរដ្ឋ យើងបានលក់ដូរនៅតែខាងក្រោមជើងភ្នំនោះទេ ដូចជា ចេក ក្រូច និងផ្លែឈើអនុផលធម្មតា។ យើងមិនបានលក់សំបុត្រចូលលេងតំបន់ទឹកធ្លាក់នោះទេ ដោយយើងគ្រាន់តែគិតថ្លៃលើសេវាកម្មភាស៊ីយានយន្ដប៉ុណ្ណោះ។ យើងមិនទាន់យកកម្រៃពីមនុស្សនៅឡើយទេ»។
លោកបានបញ្ជាក់ថា «យើងមិនទាន់បានអភិវឌ្ឍអ្វីគួរឲ្យកត់សម្គាល់ ដែលឈានដល់ការលក់សំបុត្រចូលលេងនោះទេ។ យើងត្រូវផ្ដោតលើការកសាងបង្គន់អនាម័យ ក្យូស និងអាហារដ្ឋាន»។
ប្រធានសហគមន៍អេកូទេសចរណ៍អន្លង់ស្វាយរូបនេះ បានឲ្យដឹង ថា «នៅថ្ងៃបុណ្យធំៗ យើងឃើញមានវត្ដមានភ្ញៀវទេសចរទៅលេងទឹកធ្លាក់អន្លង់ស្វាយចន្លោះពី ២០០ ទៅ ៣០០ នាក់ ក្នុង ១ ថ្ងៃ។ នៅថ្ងៃធម្មតា ចំនួនភ្ញៀវមានត្រឹមប្រមាណ ៣០ ទៅ ៤០ នាក់អ៊ីចឹងទៅ។
ប្រជាពលរដ្ឋសើចសប្បាយពេលដែលឃើញទឹកបែកខ្ចាយចេញពីបំពង់ទុយោ។ហុង មិនា
ទៅដល់ដែនដីតំបន់អភិរក្សរបស់ក្រសួងបរិស្ថាននៅមានទឹកធ្លាក់ខ្ពស់ៗជាច្រើនទៀត ដែលលោកបានអះអាងថា វាមានកម្ពស់ពី ៥០ ទៅ ១០០ ម៉ែត្រ ដូចជា ជ័យតោង និងអូរទៀមរះ ស្ថិតក្នុងដែនអភិរក្សផ្នែកខាងលើនៃតំបន់ការពារជួរភ្នំឱរ៉ាល់របស់ក្រសួងបរិស្ថាន។
លោក នុត ហេង បានប្រាប់ឲ្យដឹងចំពោះភ្ញៀវដែលមានបំណងចង់បន្ដដំណើរឡើងភ្នំវែងឆ្ងាយទៀតថា «ដើម្បីសុវត្ថិភាពភ្ញៀវ យើងត្រូវមានប្រជាការពារ ឧទ្យានុរក្ស និងសហគមន៍ ពីព្រោះបងប្អូនមកពីភ្នំពេញ ភាគច្រើនអត់សូវយល់ពីទំនៀមទម្លាប់នៃការដើរព្រៃនោះទេ។ ជាក់ស្ដែង យើងត្រូវការដឹងថា ទីណាមានសត្វទាក ទីណាត្រូវមានការត្រណមមាត់កដែលអាចប៉ះពាល់ដល់សភាវងងឹត»។
ប៉ុន្ដែជាទូទៅ ភ្ញៀវភាគច្រើនទៅលេងទឹកធ្លាក់ត្រឹមដំណាក់ខ្ពស់ទី ៩ ប៉ុណ្ណោះ ដោយពួកគេមិនចង់ចំណាយពេលវេលា និងកម្លាំងដើរច្រើនម៉ោងទៅកាន់ដំណាក់ទឹកខ្ពស់ៗ ដែលត្រូវប្រើពេលចូលដេកព្រៃនោះឡើយ។
ទឹកធ្លាក់អន្លង់ស្វាយ ស្ថិតក្នុងភូមិដូងស្លា ឃុំក្បាលទឹក ស្រុកទឹកផុស ខេត្ដកំពង់ឆ្នាំង ដែលភ្ញៀវអាចធ្វើដំណើរពីភ្នំពេញតាមផ្លូវជាតិ ៥ បត់ឆ្វេងត្រង់ម្ដុំផ្សារឧដុង្គនៃផ្លូវ ១៣៦ ដោយភ្ជាប់ជាមួយផ្លូវ ១៣២ រួចបត់ស្ដាំទៅកាន់ផ្លូវ ៥៣ ឆ្ពោះទៅស្រុកទឹកផុស និងបន្ដជិះតាមផ្លូវបំបែកពីចំណុចប្រសព្វរូបសំណាករមាស ៣ ក្បាល ចម្ងាយប្រមាណជាង ១០០ គីឡូម៉ែត្រ ពីភ្នំពេញ។ ដល់ចំណុចរូបសំណាក អ្នកដំណើរត្រូវបន្ដបើកបរលើផ្លូវលំ ៦ គីឡូម៉ែត្រថែមទៀត ទៅតាមស្លាកសញ្ញាចង្អុលផ្លូវ មុនពេលទៅចតយានយន្ដនៅគោលដៅចុងនៃចង្កេះ និងដើរថ្មើរជើងបន្ដិចទៀតតាមល្បាក់ទឹកធ្លាក់នីមួយៗ៕
វីដេអូ៖
