ក្រុងម៉ូស្គូ: អស់រយៈពេលជាច្រើនទសវត្សរ៍ ធម្មជាតិបានប្រែក្លាយអំបែងកែវចម្រុះពណ៌ដែលត្រូវបានចាក់លើខ្សែឆ្នេរទៅជាគោលដៅទេសចរណ៍ដ៏ទាក់ទាញ។ ប៉ុន្ដែបច្ចុប្បន្ននេះវារងនូវការគំរាមកំហែងយ៉ាងខ្លាំង។
វីដេអូមួយដែលបង្ហាញស្ដ្រីទេសចរចិន ២ នាក់នៅទីកម្សាន្ដឲ្យឈ្មោះថា Glass Bay ដើររើសអំបែង រួចដាក់ច្រកថង់ប្លាស្ទិក។
ស្ដ្រីអ្នកស្រុកម្នាក់ដែលបានថតវីដេអូនោះបាននិយាយថា៖ «ឡានក្រុងចេញចូលៗមកទីនេះ ហើយទេសចរម្នាក់ៗតែងតែនាំយកអំបែងទាំងនោះត្រឡប់ទៅតាមខ្លួនវិញ»។
ឆ្នេរដ៏ប្លែកនេះត្រូវបានអភិរក្ស តែទោះយ៉ាងណាអំបែងកែវកាន់តែបាត់បង់បន្ដិចម្ដងៗ ហើយក្រុមអ្នកជំនាញបានព្រមានរួចហើយថា វាអាចរលត់រលាយនៅរយៈពេល ២០ ឆ្នាំទៀត។
បាតុភូតធម្មជាតិដ៏កម្រលើឆ្នេរប៉ាស៊ីហ្វិកនៃប្រទេសរុស្ស៊ីនេះត្រូវបានបង្កើតឡើងក្រោយគ្រវែងចោលនូវដបវុដកា ដបស្រាទំពាំងបាយជូរ និងស្រាបៀរ រួមទាំង ក្រឡកែវ និងសេរ៉ាមិកអំឡុងសម័យសូវៀតអស់រយៈពេលជាច្រើនឆ្នាំ។
ខ្សែទឹក និងរលកនៅលើឆកអ៊ូស៊ូរី (Ussuri Bay) បានវាយបំបែកអំបែងដបរួចដុសរុសគែមមុខស្រួចឲ្យទៅជាទាលរលោងចម្រុះពណ៌។ យ៉ាងណាមិញការបោះចោលសម្បកដបនៅតំបន់ឆ្នេរទេសចរណ៍នាពេលនេះត្រូវបានហាមឃាត់។
ឆ្នេរក្បែរច្រាំងថ្មបានក្លាយជាគោលដៅទេសចរណ៍ដ៏សំខាន់មួយក្នុងទីក្រុង Vladivostok ប្រទេសរុស្ស៊ី។
សាស្ដ្រាចារ្យ Pyotr Brovko មកពីសាកលវិទ្យាល័យ Far Eastern Federal University (FEFU) បានព្រមានថា គ្រីស្ដាល់ចម្រុះពណ៌លើឆ្នេរនេះនឹងរលាយបាត់ក្នុងរយៈពេល ២០ ឆ្នាំ ខណៈអំបែងកែវនាបច្ចុប្បន្ននេះកាន់តែខើចបន្ដិចម្ដងៗ។
លោកនិយាយថា៖ «វាជាភ័ស្ដុតាងថា អំបែងកែវនេះសល់ត្រឹមមួយជំនាន់នេះប៉ុណ្ណោះ តែក្រោយពីនេះវានឹងប្រែទៅជាឆ្នេរខ្សាច់លាយក្រួសធម្មតាវិញ មិនខុសពីតំបន់ Primorsky នោះទេ»៕ HR