ក្រុងសែនមនោរម្យ៖ កាមេរ៉ាតាមដានបានបង្ហាញរូបភាពសត្វព្រៃជាច្រើនប្រភេទនៅក្នុងដែនជម្រកសត្វព្រៃស្រែពក។
ទិដ្ឋភាពជ្រូកព្រៃបណ្ដើរកូន សត្វទន្សោងទាំងហ្វូងនាំគ្នាស៊ីស្មៅព្រេចដ៏សម្បូរបែប ឈ្លូស រត់ប្រសាចកាត់វាលស្មៅដុះជ្រំព្រៃរបោះ រមែងស្ថិតក្នុងក្ដីប្រាថ្នារបស់ភ្ញៀវដែលស្រឡាញ់ធម្មជាតិ និងសត្វព្រៃកម្រ។
ទាំងនេះជាលទ្ធភាព ដែលក្រសួងបរិស្ថានមានបំណងប្រែក្លាយតំបន់ខ្លះនៃដែនជម្រកសត្វព្រៃទៅជាតំបន់ទេសចរណ៍ធម្មជាតិដ៏មានសក្ដានុពលសម្រាប់ទស្សនាសត្វព្រៃ។
ស្ថិតនៅតំបន់ស្នូលនៃដែនជម្រកសត្វស្រែកពកក្នុងដំណើរដឹកនាំក្រុមអ្នកសារព័ត៌មានទៅកាន់តំបន់ព្រៃទេសភាពខ្ពង់រាបភាគខាងកើតលោក នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងថា៖ «តាមគោលការណ៍របស់រាជរដ្ឋាភិបាលកម្ពុជា គឺយើងមានគោលបំណងក្នុងការប្រែក្លាយតំបន់មួយចំនួនដែលមានសក្ដានុពលទេសចរណ៍នៅក្នុងតំបន់ការពារធម្មជាតិមួយចំនួនទៅជាតំបន់ទេសចរណ៍ធម្មជាតិ»។
បរិវេណតំបន់ការពារធម្មជាតិមួយចំនួន ត្រូវបានសម្រេចដាក់ជាតំបន់ទេសចរណ៍សហគមន៍ ដើម្បីឱ្យពលរដ្ឋបង្កើតចំណូលពីវិស័យទេសចរណ៍ជាថ្នូរនឹងកិច្ចការពារសម្បត្ដិធម្មជាតិ។
លោកលើកឡើងថា៖ «កន្លងទៅយើងបានធ្វើជាទេសចរណ៍សហគមន៍មួយចំនួន ដូចជាទេសចរណ៍សហគមន៍ច្រកល្អៀង ហើយត្មាតប៉ើយ ជាតំបន់ទេសចរណ៍ធម្មជាតិ។ ភ្ញៀវស្នាក់នៅក្នុងសហគមន៍នេះ អាចមើលសត្វត្រយងយក្ស ត្រយងចង្កំ ក ស»។
បំណងបង្កើតតំបន់ទេសចរណ៍ធម្មជាតិនេះ ជាការរួមចំណែកជួយជ្រោមជ្រែងជីវភាពប្រជាពលរដ្ឋមូលដ្ឋាន និងជាកិច្ចការអភិរក្សសត្វព្រៃ និងព្រៃឈើផងដែរ។
លោក នេត្រ ភក្ដ្រា បន្ដថា៖ «ការបង្កើតទេសចរណ៍ធម្មជាតិជាការបង្កើតសេដ្ឋកិច្ចមូលដ្ឋានឲ្យប្រជាពលរដ្ឋ ដែលបង្កើនចំណូល ដើម្បីឱ្យជីវភាពរបស់ពួកគាត់រឹងមាំ ហើយពួកគាត់នឹងអាចមានជម្រើសថ្មី ដោយអត់ចូលព្រៃកាប់ឈើ និងអត់ចូលព្រៃបរបាញ់»។
ទិដ្ឋភាពព្រៃរបោះ រំលេចដើមឈើតូចៗអាយុកាលរាប់សិបឆ្នាំ ដុះរង្វើលៗមិនញឹកដូចម្រាមដៃ ដែលបង្កើតបានជាបរិវេណស្រឡះអំណោយផលដល់ការគយគន់ហ្វូងសត្វព្រៃ។ វាលស្មៅព្រេចកម្ពស់ត្រឹមចង្កេះ ជាចំណីឆ្ងាញ់មាត់ដល់ពពួកសត្វស៊ីស្មៅ ជាពិសេស អម្បូរសត្វក្រចកជើងចម្ពាម។ ខ្សែទឹកខ្វាត់ខ្វែងបង្កើតបានជាសរសៃអូរ និងទន្លេពុះជ្រែកព្រៃឈើធំល្វឹងល្វើយ។
លោក នេត្រ ភក្ដ្រា បានឱ្យដឹងថា៖ «ស្ថិតក្នុងតំបន់ព្រៃរបោះនេះ យើងអាចមើលឃើញសត្វងាយស្រួល»។
សក្ដានុពលទេសចរណ៍ធម្មជាតិក្នុងតំបន់អភិរក្សក៏ត្រូវបានសម្គាល់ឃើញដោយលោក សេង ទៀក នាយកអង្គការអន្ដរជាតិ ដែលសហការជាមួយក្រសួងបរិស្ថានក្នុងការអភិរក្សធនធានធម្មជាតិនៅព្រះរាជាណាចក្រកម្ពុជា ផងដែរ។
លោកបាននិយាយថា៖ «យើងមិនទាន់ឃើញភ្ញៀវបន្ដការស្នាក់នៅ ៣ ឬ ៤ យប់បន្ថែមទៀតទេ។ ប្រទេសយើងជាគោលដៅទេសចរណ៍រួចហើយ ផ្នែកវប្បធម៌ ដូចជា អង្គរវត្ដជាដើម។ យើងអាចទាញត្រឹមតែ ៥ ទៅ ១០ ភាគរយ ដើម្បីឱ្យពួកគេបន្ដសម្រាក ៣ យប់ទៀត»។
លោកបន្ដថា៖ «បើយើងគណនាមើលវាអាចបង្កើតការងារបានច្រើនណាស់។ ដូច្នេះ រាជរដ្ឋាភិបាលក៏ដូចជាក្រសួងបរិស្ថានខិតខំប្រឹងប្រែងធ្វើការអភិវឌ្ឍ ផលិតផលទេសចរណ៍ ហើយផលិតផលទេសចរណ៍មួយដ៏សំខាន់គឺសត្វព្រៃ។ ជាក់ស្ដែង ទន្លេស្រែពក ពិតជាស្រស់ស្អាត ហើយនៅមានសត្វមួយទៀត ដែលយើងចូលមក ចាំបាច់ត្រូវតែឃើញ»។
អ្នកនិយមធម្មជាតិ អាចធ្វើដំណើរតាមដងទន្លេស្រែពក ដែលជាអាងត្រីធម្មជាតិដ៏ច្រើនសន្ធឹកសន្ធាប់ គយគន់ទេសភាពដ៏ស្រស់ត្រកាលនៃជីវចម្រុះ និងទស្សនាសត្វព្រៃដ៏សម្បូរបែប ដូចជា ស្វាកន្ទុយស កេងកង និងក្រពើភ្នំជាដើម។
ទោះជាយ៉ាងណា ថ្វីដ្បិតតែដែនជម្រកសត្វព្រៃស្រែពកបានផ្ដល់អាហារ ទឹក និងទីជម្រកដ៏សមគួរសម្រាប់ពពួកសត្វព្រៃសោយសុខក្នុងដែនដីអភិរក្សមួយនេះយ៉ាងណាក៏ដោយ ក៏ដំណើរការចុះបញ្ជីជាតំបន់ទេសចរណ៍ធម្មជាតិ នៅមិនទាន់ស្ថិតក្នុងចំណុចអាទិភាពរបស់រដ្ឋាភិបាលក្នុងពេលឆាប់ៗទេ។
យោងតាមរបាយការណ៍ស្រាវជ្រាវរយៈពេល ១០ ឆ្នាំចុងក្រោយរបស់អង្គការ WWF និងក្រសួងបរិស្ថានបានឱ្យដឹងថា ចំនួនសត្វព្រៃក្នុងដែនជម្រកសត្វព្រៃស្រែពក បានធ្លាក់ចុះគួរឱ្យព្រួយបារម្ភ ដូចជា ទន្សោង ឈ្លូស និងជ្រូកព្រៃ ព្រមទាំងប្រើស រម៉ាំង និងខ្ទីង ដែលកាន់តែខ្សត់ខ្សោយ។
លោក នេត្រ ភក្ដ្រា បាននិយាយសំដៅទៅលើលទ្ធភាពអំណោយផលចំពោះទេសចរណ៍ធម្មជាតិ និងសត្វព្រៃថា៖ «បច្ចុប្បន្នយើងគិតថា ធ្វើដូចម្ដេចឱ្យមានសុវត្ថិភាពសម្រាប់សត្វព្រៃសិន។ យើងត្រូវតែការពារឱ្យបានពីព្រោះវាជាតំបន់ស្នូល ហើយបន្ទាប់ទៅថា តើយើងត្រូវធ្វើម៉េចទៀត»។
លោកបានអះអាងថា លទ្ធភាពប្រាកដជាមាន ប្រសិនបើមានការបង្កើនចំនួនសត្វព្រៃ តាមរយៈមធ្យោបាយផ្សេងៗ ដូចជា ការព័ទ្ធរបង ឬការការពារឱ្យបាននូវតំបន់នេះពីការដាក់អន្ទាក់ ការបរបាញ់ ឬការបំផ្លាញជម្រករបស់ពួកវា។
នាយក WWF ប្រចាំប្រទសកម្ពុជា លោក សេង ទៀក ក៏បានពន្យល់ថា៖ «បើអាចកសាងរបងដែលបង្កើតជាកន្លែង save heaven សម្រាប់សត្វព្រៃ យើងអាចកៀរគរសត្វព្រៃពីក្រៅរបងចូលក្នុងរបង ដើម្បីឱ្យមានការបន្ដពូជលឿន»។
លោកថា៖ «សត្វមួយចំនួននឹងមិនអាចផុតពូជទេ ជាពិសេស ពពួកសត្វដែលមន្ដ្រីរបស់យើងពិបាកតាមដាន ដូចជា រម៉ាំង ប្រើស និងពពួកខ្លា»។
លោក សេង ទៀក បានបញ្ជាក់ថា៖ «ការរៀបចំទេសចរណ៍ high-end ចាំបាច់ត្រូវតែមានសត្វព្រៃសម្រាប់ឱ្យភ្ញៀវមើល»។
ដោយមានវិធានការយ៉ាងហ្មត់ចត់ក្នុងការស្ដារចំនួនសត្វព្រៃ ដែលកំពុងតែធ្លាក់ចុះយ៉ាងគំហុកនៅក្នុងដែនជម្រកសត្វព្រៃស្រែពក [ផ្ទៃដី ៣៧២ ៩៧១ ហិកតា] រដ្ឋលេខាធិការក្រសួងបរិស្ថាន បានថ្លែងប្រកបដោយជំនឿចិត្ដពីតំបន់សក្ដានុពលមួយនេះ។
លោកបាននិយាយថា៖ «យើងជឿជាក់ថា វានឹងមានកំណើន ហើយវាមានកំណើន យើងឃើញថា តំបន់នេះមានទេសភាពល្អស្អាតណាស់។ តើមនុស្សប៉ុន្មាននាក់ ដែលបានមកឃើញទិដ្ឋភាពនៅទីនេះ។ អ៊ីចឹង យើងចង់បង្កើននូវទិសដៅទេសចរណ៍ថ្មីបន្ថែមទៀតក្នុងតំបន់មួយចំនួន ដែលមានសក្ដានុពល»៕