ភ្ញៀវទេសចរភាគច្រើនដែលមកទីនេះ គ្រាន់តែថតរូបរួចក៏ចាកចេញ។ រូបថត AFP
.jpg)
ក្រុងកៀវ៖ រឿងភាគទូរទស្សន៍ដ៏ល្បីល្បាញ «Chernobyl» បានទាក់ទាញភ្ញៀវទេសចរជំនាន់ថ្មីមកលេងតំបន់ជួបគ្រោះមហន្ដរាយអាវុធនុយក្លេអ៊ែរ តែមគ្គុទ្ទេសក៍បាននិយាយថា មនុស្សជាច្រើនចាប់អារម្មណ៍មកថតរូបសែលហ្វ៊ីជាជាងការសិក្សាអំពីឧប្បត្ដិហេតុបានកើតឡើង។
យេវហ្គេន ហ្គូនឆារ៉េនកូ មគ្គុទេ្ទសក៍ផ្លូវការនាំភ្ញៀវទៅកាន់តំបន់រោងចក្រថាមពលប្រវត្ដិសាស្ដ្រនោះ បាននិយាយថា៖ «ពួកគេមិនត្រូវការដឹងព័ត៌មានអីទៀតទេ។ ពួកគេចង់តែថតរូបសែលហ្វ៊ីលេងប៉ុណ្ណោះ»។
លោកបានប្រាប់ AFP ថា បច្ចុប្បន្នភ្ញៀវទេសចរគ្រាន់តែចង់ឃើញទិដ្ឋភាពដូចក្នុងភាពយន្ដ HBO។
សារធាតុវិទ្យុសកម្មដែលភាយចេញលើតំបន់អឺរ៉ុប និងតំបន់ប៉ះពាល់ ៣០ គីឡូម៉ែត្រ នៅតែរក្សាបម្រាមហាមឃាតដដែល លើកលែងជាតំបន់តូចមួយដែលបើកទទួលភ្ញៀវទេសចរ។
សេវាកម្សាន្តជិះទូកកាយ៉ាក់នៅអតីតតំបន់វិនាសកម្មនៅអ៊ុយក្រែន។ រូបថត AFP
ទីតាំងដែលត្រូវបានបោះបង់ក៏បានក្លាយជាគោលដៅទេសចរណ៍ងងឹត ប៉ុន្មានឆ្នាំចុងក្រោយ តាំងពីមុនកម្មវិធីទូរទស្សន៍ថតរឿងភាគនេះម្ល៉េះ។
តែទីភ្នាក់ងារទេសចរណ៍អ៊ុយក្រែនមួយចំនួន បានកែសម្រួលកញ្ចប់ទេសចរណ៍ទៅតាមគោលដៅដូចក្នុងឈុតឆាកភាពយន្ដ «Chernobyl» និងបន្ថែមសេវាកម្មពិសេស ដូចជាការជិះទូកកាយ៉ាក់តាមដងទន្លេជុំវិញតំបន់ហាមឃាត់ថែមទៀត។
លោក ល្វីស កាឡូស អាយុ ២៧ ឆ្នាំ មកពីប្រេស៊ីល បាននិយាយថា លោកមិនដឹងច្បាស់អំពីគ្រោះមហន្ដរាយអីពីមុនមកទេ មុនពេលបានមើលរឿងលើកញ្ចក់ទូរទស្សន៍ HBO។
លោក កាឡូស បាននិយាយ ខណៈមិត្ដភក្ដិថតរូបឲ្យឈរក្បែរស្ថានីយរោងចក្រនុយក្លេអែរថា៖ «បើភ្ញៀវមកទីនេះ ដើម្បីស្វែងយល់រឿងរ៉ាវបានកើតឡើង និងព្យាយាមសិក្សា វាពិតជារឿងល្អ។ វាជាប្រវត្ដិសាស្ដ្រមួយ»។
ចំនួនភ្ញៀវទេសចរបានកើនឡើងជាលំដាប់ ហើយកាលពីឆ្នាំមុន មនុស្ស ៧២ ០០០ នាក់ និងអាចកើនដល់ ១០ ម៉ឺននាក់ មកកាន់រោងចក្រនុយក្លេអែរ Chernobyl៕ AFP/HR
