ដោយមិនចាំបាច់ចំណាយប្រាក់ ភ្ញៀវឈរថតរូបនឹងបាឡុងហោះ។ រូបថត AFP
.jpg)
ក្រុងហាណូយ: បាឡុងហោះចម្រុះពណ៌បាននាំភ្ញៀវទេសចរទស្សនាទីក្រុងបុរាណ ហ៊ួ របស់វៀតណាមកាលពីថ្ងៃអាទិត្យក្នុងឱកាសដែលក្រុមអ្នករៀបចំពិធីបុណ្យរំពឹងថានឹងបង្កើនសក្ដានុពលទេសចរណ៍បន្ថែម។
បាឡុងហោះជាច្រើនរួមទាំង បាឡុងមួយរូបរាងដូចមឹក និងមួយទៀតរូបបេះដូងបានផ្ដល់នូវទស្សនីយភាពលើវេហាស៍លើប្រាសាទបន្ទាយថ្មនៃអតីតក្រុងដែលធ្លាប់ជាទីស្នាក់ការធំរបស់អធិរាជវៀតណាម។
ទេសចរ ហា អាញង៉ុក បានប្រាប់ AFP ថា៖ «ពេលបាឡុងចាប់ផ្ដើមហោះឡើង ខ្ញុំមានអារម្មណ៍រំជើបរំជួលហើយខ្ញុំអាចគយគន់ទិដ្ឋភាពទាំងស្រុងនៃទីក្រុងបុរាណ ហ៊ួ»។
បាឡុងហោះទាបៗតម្លៃម្នាក់ ៦ ដុល្លារ និងបាឡុងខ្ពស់ ២៨០ ដុល្លារ។ រូបថត AFP
ហ៊ួ ជាគោលដៅទេសចរណ៍ដ៏ពេញនិយមបំផុតមួយរបស់វៀតណាមដោយអាចទាក់ទាញភ្ញៀវប្រមាណ ៤,៣ លាននាក់កាលពីឆ្នាំមុន។ ភ្ញៀវភាគច្រើនធ្វើដំណើរដោយជើង ឬជិះរ៉ឺម៉កដើម្បីទស្សនាអារាមបុរាណ ផ្នូរអធិរាជ និងប្រាសាទបន្ទាយនានាដែលចាស់ទ្រុឌទ្រោមដោយបន្សល់ពីសម័យសង្គ្រាមវៀតណាម។
អ្នកនិយមបាឡុងហោះសង្ឃឹមនឹងកាន់តែជក់ចិត្ដចំពោះការទស្សនាទីក្រុងបុរាណនេះ។
លោក វ៉ូ ង៉ុកហា ជាអ្នករៀបចំព្រឹត្ដិការណ៍បុណ្យប្រចាំឆ្នាំលើកទី ៣ ម្នាក់បាននិយាយថា៖ «ខ្ញុំពិតជារំពឹងថាដំណើរកម្សាន្ដលើបាឡុងហោះនឹងកាន់តែពេញនិយម និងកាន់តែស្និទ្ធជាមួយពលរដ្ឋវៀតណាម»។
ក្នុងតម្លៃ ២៨០ ដុល្លាររយៈពេល ៤០ នាទីលើផ្ទៃមេឃ ការជិះបាឡុងហោះនៅតែមានតម្លៃខ្ពស់ចំពោះភ្ញៀវភាគច្រើន។ ភ្ញៀវខ្លះចាប់យកជម្រើសជិះបាឡុងទាបៗតម្លៃ ៦ ដុល្លារ។ រីឯខ្លះទៀតគ្រាន់តែថតរូបសែលហ្វ៊ី ខណៈបាឡុងហោះលើក្បាល។
ពីឡុតជាតិហូឡង់ វោត បេកឃ័រ ដែលមកចូលរួមពិធីបុណ្យនេះរាល់ឆ្នាំបានថ្លែងថា៖ «វៀតណាមមានសក្ដានុពលល្អពីព្រោះទេសចរកាន់តែច្រើនមកទីនេះហើយពួកគេមានប្រាក់កម្សាន្ដលើអាកាស»៕ HR
