ផ្ទះជំរំដែលផ្ដល់ផាសុកភាព និងបទពិសោធដ៏ទំនើបកណ្ដាលវាលខ្សាច់។ រូបថត AFP
.jpg)
ក្រុងឌូបៃ: តែជាង ១០០ គីឡូម៉ែត្រពីអគារកប់ពពកក្រុងឌូបៃ មូហាមេដ អាល់ កាប៊ី ដើរកាត់វាលខ្សាច់ដ៏ស្ងប់ស្ងាត់ជាមួយមិត្ដភក្ដិពេលព្រះសុរិយាផ្ដើមអស្ដង្គត។
លោក ក្រាប៊ី អាយុ ២៧ ឆ្នាំ មានឈាមជ័រជាពលរដ្ឋអេមីរ៉ាតអារ៉ាប់រួម ជាអម្បូរមានទំនាក់ទំនងយ៉ាងស្អិតល្មួតទៅនឹងសមុទ្រខ្សាច់។ សព្វថ្ងៃយុវជនរូបនេះក្នុងចំណោមមនុស្សសម័យថ្មីជាច្រើនទៀត បែរជាមកចាប់អារម្មណ៍នឹងប្រពៃណីបោះជំរំលើវាលខ្សាច់ដ៏បុរាណទៅវិញ តែជាប្រភេទជំរំផាសុកភាព និងទំនើបទាន់សម័យ។
ដោយមានការជំរុញវិស័យទេសចរណ៍ចំពេលប្រេងធ្លាក់ថ្លៃ ក្រុងឌូបៃ បច្ចុប្បន្នបានផ្ដល់ការស្នាក់នៅក្នុងជំរំលើវាលខ្សាច់បែបទំនើប ផ្ទះស្នាក់តាមជ្រលង និងជំរំលើឆ្នេរ ដើម្បីទាក់ទាញភ្ញៀវទេសចរដែលប្រាថ្នាបទពិសោធប្លែកៗ។
សកម្មភាពកម្សាន្តនៅតំបន់វាលខ្សាច់ហាត់តាខាងកើតតំបន់ជួរភ្នំ។ រូបថត AFP
វាលខ្សាច់ ហាត់តា ភាគខាងកើតតំបន់ជួរភ្នំអាចបំពេញសេចក្ដីត្រូវការភ្ញៀវចំពោះដំណើរបែបផ្សងព្រេង តែក៏ជាផ្ទះស្នាក់ផ្ដល់ផាសុកភាពផងដែរ។
ស្ថិតនៅខាងក្រៅជំរំលោក ចាមីល ហ្វាមី ជាពលរដ្ឋក្រុងឌូបៃម្នាក់មកពីអារ៉ាប៊ីសាអ៊ូឌីត បាននិយាយថា ផ្ទះជំរំគឺជាមធ្យោបាយដ៏ល្អបំផុតក្នុងការគេចចេញពីទីក្រុងដ៏អាប់អួដោយជួបបញ្ហាអនាម័យ ។
លោកបានប្រាប់ AFP ថា៖ «វាពិតជារីករាយដោយមានគប់ភ្លើង និងលេងសើចជាមួយមិត្ដភក្ដិ តែខ្ញុំចង់គេងក្នុងបន្ទប់ដែលមានគ្រែ និងបន្ទប់ទឹកឯកជន។ នោះជាអ្វីដែលយើងមាននៅទីនេះ។ ពិតជាអស្ចារ្យដែលបានក្លាយជាអ្នកដើរផ្សងព្រេងម្នាក់ព្រមទាំងមានឱកាសរៀនស្វែងយល់ និងចេះចម្អិនម្ហូបដោយប្រើភ្លើង តែដល់ពេលចូលគេង យើងអាចសម្រាកក្នុងបន្ទប់ស្រស់ស្អាត»។
បើកដំណើរការពីខែតុលា ជំរំលំដាប់ផ្កាយ ៥ បំពាក់បរិក្ខារទំនើបៗរួមទាំង បន្ទប់ទឹក និងគ្រែដែលមានតម្លៃចាប់ពី ៤០០ ដឺហេម (ប្រមាណ ១១០ ដុល្លារ) ក្នុងមួយយប់។
គម្រោងជំរំហាត់តាដែលមានសេវាកម្មជិះខ្សែហ្ស៊ីប ៣៥០ ម៉ែត្រជាផ្នែកមួយនៃគម្រោងអភិវឌ្ឍន៍ទេសចរណ៍ ខណៈឌូបៃបានស្វាគមន៍ភ្ញៀវ ១៥,៩ លាននាក់ក្នុងឆ្នាំ ២០១៨ ដោយភាគច្រើនមកចូលផ្សារទំនើប សណ្ឋាគារនិងឆ្នេរលំដាប់៕ HR
