ភូមិ​ឥន្ទធនូ​តៃវ៉ាន់​មាន​ដើមកំណើត​ជា​បន្ទាយ​ទាហាន

រូប​គំនូរ​ចម្រុះ​ពណ៌​ដ៏​ស្រស់​ឆើត​នៅ​តាម​របង និង​ទីធ្លា​ភូមិ​ឥន្ទធនូ។
រូប​គំនូរ​ចម្រុះ​ពណ៌​ដ៏​ស្រស់​ឆើត​នៅ​តាម​របង និង​ទីធ្លា​ភូមិ​ឥន្ទធនូ។

ក្រុងតៃប៉ិ : ពេល​នេះ​យើង​ងាក​មើល​ភូមិឋាន​ចម្រុះ​ពណ៌​មួយ​ស្ថិត​នៅក្នុង​ក្រុង​តៃឈួង របស់​កោះ​តៃវ៉ាន់​ឯណោះ​មាន​ឈ្មោះ​ថា​ភូមិ​ឥន្ទធនូ។

សហគមន៍​មួយ​នេះ​ត្រូវ​បាន​បង្កើត​ឡើង​នៅ​ចុង​ឆ្នាំ​១៩៤០ និង​ដើម​ឆ្នាំ​១៩៥០​សម្រាប់​ជា​ទីកន្លែង​ស្នាក់នៅ​របស់​កងទាហាន​តែ​ក្រោយ​មក​វា​ក៏​បាន​ក្លាយ​ជា​លំនៅឋាន​អចិន្រៃ្តយ៍​របស់​ពួកគេ​តែ​ម្តង។

ក្នុង ចំណោម​អតីត​ទាហាន​ទាំង​នោះ បុរស​ម្នាក់​ដែល​មាន​ចំណូល​ចិត្ត​ផ្នែក​គូរ​គំនូរ​បាន​ប្រែ​ក្លាយ​របង ជញ្ជាំង និង​ទីធ្លា​គ្រប់​ជ្រុង​នៃ​ភូមិឋាន​ទៅ​ជា​វិចិត្រសាល​ដ៏​ស្រស់ស្អាត។

បច្ចុប្បន្ន លោក ហួង យុងហ្វូ​ដែល​ព្រឹទ្ធាចារ្យ​រស់​នៅក្នុង​ក្រុង​តៃឈួង​នេះ​មាន​វ័យ​៩២​ឆ្នាំ ហើយ តែ​លោក​នៅ​តែ​បន្ត​កាន់​ជក់​និង​ថ្នាំ​ពណ៌​កែកុន​លម្អ​ភូមិឋាន​នេះ​ជា​រៀងរហូត។

ស្នាដៃ​គំនូរ​រាង​តូចៗ​របស់​វិចិត្រករ​ចិន​តៃវ៉ាន់​ចំណាស់​នោះ​ភាគច្រើន​មាន លក្ខណៈ​ជា​ផ្ទាំង​គំនូរ​តារា​ទូរទស្សន៍​ល្បីៗ រូប​ដើមឈើ សត្វ​ស្លាប​សត្វ​ក្របី និង​ជនជាតិ​កុលសម្ព័ន្ធ​នានា​ជាដើម។

លោក ហួង យុងហ្វូ បាន​គូរ​គំនូរ​ទាំងនេះ​ដំបូង​នៅក្នុង​ឆ្នាំ​២០០៨​ដោយ​លោក​បាន​ចាប់ផ្តើម គូរ​ចេញ​ពី​អ្វី​ដែល​លោក​ចូលចិត្ត​មុន​គេ។

ក្រុម​និស្សិត​នៃ​សាកលវិទ្យាល័យ​តៃឈួង​ស្ថិត​ភាគ​ខាង​លិច​កោះ​តៃវ៉ាន់​បាន នាំ​ថតរូប​គំនូរ​ទាំងនេះ​បង្ហោះ​ពេញ​អ៊ីនធឺណិត ហើយ​ព័ត៌មាន​នេះ​បាន​នាំ​ទេសចរ​ម៉ាឡេស៊ី ជប៉ុន និង​កូរ៉េ​មក​ទស្សនា​ឈូឆរ​តែ​ម្ដង។

លោក ហួង យុងហ្វូ មិន​នឹក​ស្មាន​ថា​ស្នាដៃ​របស់​លោក​ត្រូវ​បាន​មនុស្សម្នា​នៅលើ​ពិភពលោក ចាប់​អារម្មណ៍ ហើយ​មក​ទស្សនា​ដល់​ទីកន្លែង​ច្រើន​សន្ធឹកសន្ធាប់​បែប​នេះ​ឡើយ។ សព្វថ្ងៃ​ភូមិ​ឥន្ទធនូ​បាន​ក្លាយ​ជា​តំបន់​ទេសចរណ៍​ដែល​មិន​គួរ​រំលង​នៅ តៃវ៉ាន់​៕ PR

ព័ត៌មានថ្មីៗ