ភ្នំថ្ម​រលំ​អំណោយ​ទេសភាព​ដ៏ប្លែក​ភ្នែក​ពី​ធម្មជាតិ​

ក្រុងវែលីងតុន: ខេហ្សល់​ហ៊ីល គឺ​តំបន់​ភ្នំថ្ម​រលំ​មួយ​ដែល​មាន​ទីតាំង​ចម្ងាយ​ប្រមាណ​១២០​គីឡូម៉ែត្រ​ភាគ​ខាង​លិច​ក្រុង​គ្រីសឆឺច ចន្លោះ​តំបន់​ដាហ្វីលដ៍ និង​អាក់ទ័រ​នៃ​កោះ​សៅត៍​អាយឡេនដ៍ ប្រទេស​នូវែលសេឡង់។

ទី​នេះ​គឺជា តំបន់​មាន​ផ្ទាំង​ថ្ម​ធំៗ​រាយប៉ាយ​ពី​ធម្មជាតិ​ច្រើន​ជាង​គេ​បំផុត​នៅលើ​ពិភពលោក​។ ដុំថ្ម​រាប់ពាន់​ផ្ទាំង​ដែល​មាន​រូបរាង​ប្លែកៗ​ពី​ធម្មជាតិ​ហ៊ុមព័ទ្ធ​ទៅ ដោយ​វាលស្មៅ​ពណ៌​បៃតង​ស្រងាត់។

ភ្នំ​ថ្ម​រលំ​មាន​សណ្ឋាន​ដូច​ផ្ទាំង​ថ្ម​បន្សល់​ពី​ការ​បាក់​បែក​នៃ​ប្រាសាទ។
ភ្នំ​ថ្ម​រលំ​មាន​សណ្ឋាន​ដូច​ផ្ទាំង​ថ្ម​បន្សល់​ពី​ការ​បាក់​បែក​នៃ​ប្រាសាទ។

តាំងពី​ដើម​មក តំបន់​នេះ ត្រូវ​បាន​ក្រុម​ភ្ញៀវ​មកពី​តំបន់​ប៉ែក​អឺរ៉ុប​បាន​ដាក់​ឈ្មោះ​ថា ភ្នំ​ប្រាសាទ​រលំ​(ខេហ្សល់ហ៊ីល)​ដោយសារ​តែ​មាន​ដុំថ្ម​ធម្មជាតិ​ទាំងនោះ ហាក់បី​ដូចជា​បន្សល់​ទុក​ពី​ការ​បាក់បែក​នៃ​ប្រាសាទ​ដ៏ធំ​មួយ​ដូច្នោះ ដែរ​។

រូបរាង​ផ្ទាំងថ្ម​ទាំងអស់​មាន​លក្ខណៈ​ប្លែកៗ​បែប​នេះ​ដោយសារ តែ​សំណឹក​សឹក​រេចរឹល​នៃ​តំណក់​ទឹកភ្លៀង​ធ្លាក់​ពី​លើ​រាប់​លាន​ឆ្នាំ។ អ្នក​ស្រាវជ្រាវ​បាន​សន្និដ្ឋាន​ថា ការ​កកើត​តំបន់​ភ្នំ​ថ្ម​រលំ​នេះ​អាច​ស្ថិត​នៅក្នុង​យុគសម័យ​៣០​ទៅ ៤០​លាន​ឆ្នាំ​មុន​ដែល​រំលេច​រូបរាង​រហូត​មក​ដល់​ពេល​បច្ចុប្បន្ន​នៅ ប្រទេស​នូវែលសេឡង់។

បច្ចុប្បន្ន​ទី​នេះ​បាន​ក្លាយ​ជា​ទីកន្លែង​កម្សាន្ត និង​ទស្សនា​ដ៏​ពេញនិយម​របស់​ទេសចរ​ដែល​មក​ថតរូប ឬ​ដើរ​ឡើង​ផ្ទាំងថ្ម​នានា។

បរិវេណ​ជុំវិញ​តំបន់​ភ្នំថ្ម​រលំ​នេះ ក៏​មាន​បង្កប់​នូវ​អាថ៌កំបាំង​ផ្នែក​វប្បធម៌ និង​ប្រវត្តិសាស្រ្ត​នៃ​ក្រុម​ជនជាតិ​កុលសម្ព័ន្ធ​ដើម​ឈ្មោះ​ង៉ៃ​តាហ៊ូ ។ រយៈពេល​ថ្មីៗ​នេះ គេ​ឃើញ​មាន​ក្រុម​ភ្ញៀវទេសចរ​យ៉ាងច្រើន​កកកុញ និង​មាន​បណ្តា​ក្រុមហ៊ុន​ផលិត​ភាពយន្ត​នានា​បាន​ប្រើ​ទីតាំង​នៃ​តំបន់ ភ្នំថ្ម​រលំ​ខេហ្សល់ហ៊ីល​នេះ​ដើម្បី​ថត​ខ្សែភាពយន្ត​ជាច្រើន​ទៀត​ផង៕ PR

ព័ត៌មានថ្មីៗ