ក្រុងតូក្យូ: ក្រុមមន្ដ្រីបានឲ្យដឹងកាលពីថ្ងៃចន្ទថា ភ្នំហ្វូជិ ឬ Mount Fuji និម្មិតរូបប្រទេសជប៉ុន នឹងត្រូវបិទអំឡុងពេលរដូវឡើងភ្នំឆ្នាំនេះ ដើម្បីទប់ស្កាត់ការរីករាលដាលនៃវីរុសកូរ៉ូណាថ្មី។
ខេត្ដស៊ីហ៊្សូអូកា ជាទីតាំងភ្នំហ្វូជិស្ថិតនៅបានប្រកាសថា ពួកគេបានបិទវិថីសំខាន់ចំនួន ៣ ក្នុងចំណោម ៤ ដែលឆ្ពោះទៅកាន់កំពូលភ្នំ។
មន្ដ្រីខេត្ដ ស៊ីហ៊្សូអូកា បានប្រាប់ AFP ថា៖ «វិថីនានាតែងតែបើកស្វាគមន៍ភ្ញៀវសម្រាប់វិស្សមកាលរដូវក្ដៅ តែឆ្នាំនេះ យើងនឹងបិទទាំងអស់ចាប់ពីថ្ងៃទី ១០ ខែកក្កដា ដល់ថ្ងៃទី ១០ ខែកញ្ញា ជារដូវស័ក្ដិសមក្នុងការឡើងភ្នំហ្វូជិ បំផុត»។
មន្ដ្រី ដដែលបានបន្ដថា៖ «យើងជ្រើសរើសយកវិធានការបិទផ្លូវនេះ ដើម្បីទប់ស្កាត់ការរីករាលដាលនៃជំងឺរាតត្បាតសកល»។
នេះគឺជាលើកដំបូងដែលភ្នំភ្លើងប្រវែង ៣ ៧៧៦ ម៉ែត្រ ត្រូវបានបិទ បើគិតចាប់តាំងពីឆ្នាំ ១៩៦០ នៅពេលខេត្ដនេះចាប់ផ្ដើមកសាងផ្លូវ។
ការសម្រេចចិត្ដនេះត្រូវបានធ្វើឡើងក្រោយពីខេត្ដក្បែរខាង យ៉ាម៉ាណាស៊ិ បានឲ្យដឹងថា ខ្លួននឹងបិទផ្លូវយ៉ូស៊ីដា ជាវិថីឡើងភ្នំដ៏ពេញនិយមបំផុតក្នុងចំណោម ផ្លូវឡើងភ្នំទាំង ៤។
សាលាឆទានតាមផ្លូវឡើងភ្នំ នឹងបន្ដបិទផងដែរ។ ភ្នំហ្វូជិ ដែលចុះក្នុងបញ្ជីបតិកភណ្ឌពិភពលោក UNESCO ស្ថិតនៅចម្ងាយ ១០០ គីឡូម៉ែត្រ ពីទីក្រុងតូក្យូ និងអាចមើលឃើញយ៉ាងច្បាស់ពីទីក្រុងធំរបស់ជប៉ុននេះ។
យោងតាមវិបសាយផ្លូវការ Mount Fuji បានបង្ហាញថា កាលពីឆ្នាំមុន ភ្នំហ្វូជិ ទទួលស្វាគមន៍ភ្ញៀវប្រមាណ ២៣៦ ០០០ នាក់។
ទោះបីជាភ្នំហ្វូជិ រំលេចនូវភាពអស្ចារ្យយ៉ាងណាក៏ដោយ ក៏អ្នកឡើងភ្នំជាច្រើនបានត្អូរត្អែរអំពីបទពិសោធនៃការឡើងភ្នំនេះដោយផ្ទាល់ ដោយចោទលើវត្ដមានមនុស្សច្រើន និងសណ្ឋានដីពិបាក។
ភាពលំបាកនេះហើយ ទើបសុភាសិតជប៉ុនមួយបានលើកឡើងថា «មួយជីវិត បើមិនបានឡើងភ្នំហ្វូជិ ម្ដង គឺមនុស្សភ្លើហើយ។ ប៉ុន្ដែបើឡើង ២ ដង អ្នកក៏ជាមនុស្សភ្លើដែរ»។
ការផ្ទុះវីរុសកូរ៉ូណានៅជប៉ុនមានអត្រាទាបបើធៀបនឹងតំបន់អឺរ៉ុប និងសហរដ្ឋអាមេរិក ដោយមានមនុស្សជាង ១៦ ០០០ នាក់បានឆ្លង និង ៧៤៩ នាក់បានស្លាប់។
កាលពីសប្ដាហ៍មុន ជប៉ុនបានលើកបម្រាមរដ្ឋក្នុងគ្រាអាសន្ន ដែលដាក់ឲ្យអនុវត្ដនៅតាមតំបន់ជាច្រើនក្នុងប្រទេស តែបន្ដរក្សាដដែលចំពោះទីក្រុងធំៗមួយចំនួន ដូចជា តូក្យូ និងអូសាកា៕ AFP/HR