ក្ដាររំអិលមានប្រវែងជាង ១ គីឡូម៉ែត្រ ព័ទ្ធពេនចន្លោះព្រៃព្រឹក្សា។ រូបថត AFP
.jpg)
ក្រុងគូឡាឡាំពួ៖ យោងរំអិលទឹកវែងបំផុតមួយក្នុងលោកបានផុសឡើងនៅប្រទេស ម៉ាឡេស៊ី កាលពីថ្ងៃពុធ ដោយមានក្ដាររំអិលប្រវែង ១ គីឡូម៉ែត្រ ដែលចាប់ផ្ដើមចេញដំណើរពីលើកំពូលភ្នំ រួចបត់បែនឆ្លងកាត់ព្រៃក្រាស់ និងមុននឹងអ្នករំអិលទម្លាក់ខ្លួនក្នុងអាងទឹកមួយ។
យោងរំអិលពណ៌ខៀវ និងលឿងនៅឧទ្យានកម្សាន្ដ ESCAPE មានប្រវែង ១ ១១១ ម៉ែត្រ បានចូលកំណត់ត្រាហ្គីនណេសពិភពលោកសម្រាប់ជាយោងរំអិលវែងបំផុត ដែលអ្នកជិះរំអិលប្រើពោងខ្យល់។
វាមានប្រវែងវែងជាងកំណត់ត្រាចាស់ ៣ ដង ដែលគ្រងក្នុងប្រទេស អាល្លឺម៉ង់។ យោងរំអិលទឹកនៅភាគខាងជើងរដ្ឋប៉េណាងចាប់ផ្ដើមចេញដំណើរពីកំពូលភ្នំ កម្ពស់ ៧០ ម៉ែត្រ ដោយអ្នកជិះត្រូវបានដឹកជញ្ជូនទៅទីនោះ ដោយកៅអីយោងពិសេស។
ការរំអិលពីលើកំពូលភ្នំរហូតដល់អាងទឹកមានរយៈពេល ៤ នាទី ដែលឆ្លងកាត់ព្រៃជាទីជម្រកសត្វកម្រនានា ចាប់ពីបក្សីរហូតដល់ស្វា មុនពេលបង្ហូរកាត់ផ្លូវមួយខ្សែ និងបញ្ចប់ក្នុងអាងទឹកនៃឧទ្យាន។
ក្រោយពីរំអិលខ្លួន ៤ នាទី ពីកម្ពស់ ៧០ម៉ែត្រ អ្នកជិះមកដល់អាងទឹក។ រូបថត AFP
លោក ស៊ី ឆូឃេង ជាម្ចាស់ប្រតិបត្ដិករឧទ្យាន Sim Leisure Group បានឲ្យដឹងថា៖ «គំនិតបង្កើតយោងរំអិលកើតឡើងដោយការខកចិត្ដដែលសកម្មភាពកម្សាន្ដរំអិលភាគច្រើនប្រើរយៈពេលតែប៉ុន្មានវិនាទី ហើយយោងរំអិលនេះចាប់ផ្ដើមចេញពីកំពូលភ្នំកម្ពស់ ៧០ ម៉ែត្រ ប្រាកដជាធ្វើឲ្យអ្នកជិះរីករាយ»។
វានឹងត្រូវដាក់ឲ្យដំណើរការសម្រាប់សាធារណជននៅខែក្រោយ។ ការកសាងក្ដាររំអិល ៤៨៨ បន្ទះ ភាគច្រើនធ្វើឡើងដោយដៃ ដោយគ្មានជំនួយពីគ្រឿងចក្រដើម្បីបញ្ចៀសការប៉ះពាល់ដល់បរិស្ថានធម្មជាតិ។
យ៉ាងណាមិញ ចិនគឺជាទីតាំងមានយោងរំអិលទឹកធំជាងនេះ ជាមួយប្រវែង ៨ ៩០០ ម៉ែត្រដែលរំអិលចុះពីកំពូលភ្នំក្នុងទីក្រុង Lishui។ ឯតទគ្គកម្មហ្គីនណេសពិភពលោកនៅខែនេះ បានហៅវាជារំអិលទឹកពីភ្នំដ៏វែងបំផុតក្នុងលោក៕ AFP/HR
