របាំង​ទំនប់​ទឹក​ដ៏ធំ​ផលិត​ពី​ដែកថែប​ការពារ​ទឹកជំនន់

របាំង​ទំនប់ទឹក​ធ្វើ​ពី​ដែក​ថែប​នៅ​ពេល​គេ​បើក​ឲ្យ​ចរាចរណ៍​តាម​ផ្លូវ​ទឹក​។
របាំង​ទំនប់ទឹក​ធ្វើ​ពី​ដែក​ថែប​នៅ​ពេល​គេ​បើក​ឲ្យ​ចរាចរណ៍​តាម​ផ្លូវ​ទឹក​។

ក្រុងឡុងដ៍ៈ សាមស៍បារៀ​គឺជា​របាំង​ទំនប់​ឃាំង​ទឹកជំនន់​មួយ​ស្ថិត​នៅ​ចំកណ្តាល​ទីក្រុង​ឡុងដ៍​ប្រទេស​អង់គ្លេស​ខណៈ​វា​ត្រូវ​បាន​គេ​សង់​ឡើង​នៅ​ទន្លេ​សាមស៍ ភាគ​ខាង​កើត​នៃ​ទីក្រុង​វូលវីច។ វា​ជា​របាំង​ទំនប់​ទឹក​ធំ​ទី​២​លើ​លោក បន្ទាប់ពី​របាំង​ទំនប់​ទឹក​អូស្ទឺរឆែលដេឃឹរីង​នៅឯ​ប្រទេស​ហូឡង់។

របាំង ទំនប់​ទឹក​សាមស៍បារៀ​នេះ​សម្ពោធ​ប្រើប្រាស់​នៅ​ឆ្នាំ​១៩៨៤​ដើម្បី​ការពារ​និង​ទប់ទល់​នីវ៉ូ​ទឹក​ឡើង​ខ្លាំង​នៃ​តំបន់​ទន្លេ​ក្នុង​ប្រទេស អង់គ្លេស​ជាពិសេស​ពេល​មាន​ជំនោរ​ទឹកសមុទ្រ ឬ​ទឹកជំនន់​នានា​ដែល​តែង​បោកបក់​ដោយ​ខ្យល់​ព្យុះ​នៅឯ​តំបន់​ភាគ​ខាង​ជើង ។

ទិដ្ឋភាព​របាំង​ទឹក​ជំនន់​ដ៏​ធំ​នៅ​ទីក្រុង​ឡុងដ៍​ អង់​គ្លេស​ពេល​រាត្រី។
ទិដ្ឋភាព​របាំង​ទឹក​ជំនន់​ដ៏​ធំ​នៅ​ទីក្រុង​ឡុងដ៍​ អង់​គ្លេស​ពេល​រាត្រី។

ទំនប់​ទឹក​សាមស៍បារៀ​ត្រូវ​បាន​គេ​ប្រើ​ដែកថែប​ធ្វើ​ជា​របាំង​ដោយ មាន​ប្រវែង​សរុប​៥២០​ម៉ែត្រ​ឆ្លងកាត់​ពេញ​ទទឹង​ទន្លេ​សាមស៍​នោះ​តែ​ម្តង ដោយ​មាន​ចំនួន​៩​របាំង​ឬ​ទ្វារ។ ពេល​ទ្វារ​ឬ​របាំង​ដែកថែប​នោះ​បើក​ទឹក​នឹង​ហូរ និង​អាច​ឲ្យ​នាវា​ចរាចរណ៍​ទៅ​មក​បាន។ ពេល​គេ​បិទ​របាំង​នោះ​វា​នឹង​លាត​បន្ត​គ្នា​ក្លាយ​រនាំង​ទំនប់​ទឹក​ដ៏រឹងមាំ​អាច​ទប់​ចរន្ត​ទឹក​មិន​ឲ្យ​ហូរ​បាន​។ ចំពោះ​របាំង​ដែកថែប​នោះ​មាន​កម្រាស់​១,៦​អ៊ិញ​ខណៈ​មួយ​ផ្ទាំង​មាន​ប្រវែង ៦១​ម៉ែត្រ​និង​មាន​ទម្ងន់​៣២០០​តោន។

គួរ​បញ្ជាក់​ថា​គ្រោះ​ទឹកជំនន់​ក៏ ជា​បញ្ហា​មួយ​បាន​បន្ត​កើត​មាន​នៅឯ​ទីក្រុង​ឡុងដ៍​ប្រទេស​អង់គ្លេស​ជាច្រើន​សតវត្សរ៍​មក​ហើយ​ដែរ។ ដូច្នេះ​ហើយ​បាន​ជា​នៅ​ឆ្នាំ​១៩៧៤​អាជ្ញាធរ​ក្រុង​ឡុងដ៍​បាន​សាង​របាំង ទំនប់​សាមស៍បារៀ​នេះ​ឡើង​និង​បាន​បើក​សម្ពោធ​នា​រយៈពេល​១០​ឆ្នាំ​ក្រោយ បន្ទាប់ពី​សាងសង់​ចប់​។

យោងតាម​អ្នក​ជំនាញ​ខាង​សំណង់​ឲ្យ​ដឹង​ថា របាំង​ទំនប់​ទឹក​ធ្វើ​ពី​ដែកថែប​នោះ​អាច​ប្រើប្រាស់​បាន​រហូត​ដល់ ឆ្នាំ២០៣០​ឯណោះ តែ​ថ្មីៗ​នេះ​ក្រុម​អ្នក​ជំនាញ​បាន​វិភាគ​ហើយ​បញ្ជាក់​ថា​របាំង​ដែកថែប​នោះ នឹង​មាន​ប្រសិទ្ធភាព​ដល់​ឆ្នាំ​២០៦០​ឬ​២០៧០៕

ព័ត៌មានថ្មីៗ