សកម្មភាពក្រុមការងារផ្ទះដីលឿត ឆ្លាក់ដីជារូបបន្ទប់គេងរំលេចក្បាច់ក្បូរបុរាណ។ រូបថត សហការី
.jpg)
ក្រុងសៀមរាប៖ ប្រសិនបើលែងមានការរីករាលដាលដោយជំងឺឆ្លងកូវីដ ១៩ ឬស្ថានភាពមានសុវត្ថិភាពសម្រាប់ការចូលទស្សនានោះ ភ្ញៀវទេសចរពិតជាអាចនឹងមានឱកាសចូលថតរូបសែលហ្វ៊ីតាមចិត្តចង់មិនខានឡើយនៅក្នុងតំបន់រមណីយដ្ឋានកែច្នៃ ១ កន្លែង ជាបណ្តុំសិល្បៈចម្លាក់ដីមានវិសាលភាពលើផ្ទៃដីសហគមន៍ទំហំ ៥ ហិកតាឯណោះ ស្ថិតនៅភូមិគោកតឹង ឃុំចាន់ស ស្រុកសូទ្រនិគម ខេត្តសៀមរាប។
ការបង្កើតសំណង់ប្រាសាទដី មានក្បាច់ក្បូរបែបចម្រុះរចនាប័ទ្មខ្មែរបុរាណ។ រូបថត សហការី
បណ្តុំរូបភាពចម្លាក់ដោយការជីកដី ១ កន្លែង មានទម្រង់ជាបន្ទប់គេងមានគ្រែគេង តុ កៅអី ឧទ្យានមានកំពែងបែបបុរាណ សំណង់ប្រាសាទដី និងរូបចម្លាក់ផ្សេងៗទៀត ត្រូវបានក្រុមការងារបង្កើតវីដេអូប្លែកៗមានឈ្មោះ Channel ថា Leurt Wilderness និង Building Technology ទើបរកបានកន្លែងថ្មី និងកំពុងតែបង្កើតក្បាច់ចម្លាក់ជីកដីនោះបានចំនួន ១២-១៣ កន្លែងកម្សាន្តហើយ នៅលើផ្ទៃដីមួយភាគប្រមាណ ១ ហិកតា តែដោយសារស្ថានភាពនៃការឆ្លងជំងឺកូវីដ ១៩ មិនទាន់ធូរស្បើយនោះ ទើបមិនទាន់អនុញ្ញាតឱ្យទេសចរចូលទស្សនានាពេលនេះឡើយ។
លោក ពាញ សេដ្ឋា ដែលពីមុនមានមុខរបរជាគ្រូបង្រៀន ហើយក៏ដូរមកជាអ្នករចនា និងដឹកនាំកែច្នៃ បង្កើតវីដេអូ (Video Creator) បង្ហោះតាម Channel ទាំង ២ ខាងលើបានបង្ហើបថា៖ «កុំតែស្ថានភាពនៃការរីករាលដាលជំងឺកូវីដ ១៩ មិនទាន់បានស្បើយនោះ កន្លែងកម្សាន្តជាបណ្តុំចម្លាក់ជីកដី ដែលបច្ចុប្បន្នយើងបានធ្វើរួចរាល់សម្រាប់គម្រោងដំបូងនៅលើផ្ទៃដី ១ ហិកតា មាន ១២-១៣ កន្លែង សម្រាប់កម្សាន្តនោះនឹងបើកឱ្យបងប្អូនខ្មែរ ឬទេសចរនានា ចូលទស្សនាក្នុងឱកាសបុណ្យចូលឆ្នាំខ្មែរជាបណ្តើរៗមិនខានឡើយ។ តែស្ថានភាពពេលនេះ យើងត្រូវចូលរួមការពារការរីករាលដាលនៃជំងឺកូវីដ ១៩ ទាំងអស់គ្នាសិន ហើយនៅពេលស្ថានភាពបានល្អប្រសើរ និងទទួលបានការអនុញ្ញាតពីខាងអាជ្ញាធរនោះ យើងនឹងបើកជូនទៅដល់បងប្អូនខ្មែរ ឬទេសចរចូលទស្សនាភ្លាម»។
ក្រុមផ្ទះដីលឿត ក៏ធ្វើចម្លាក់រូបសត្វនានា មានក្នុងរឿងគំនូរជីវចលផងដែរ។ រូបថត សហការី
គួររំឭកផងដែរថា ក្រុមបង្កើតវីដេអូប្លែកៗ ជាមួយ Channel ឈ្មោះថា Leurt Wilderness (ផ្ទះដីលឿត) នេះ មានគម្រោងភាគច្រើនជាប្រភេទវីដេអូបង្ហាញពីការសង់លំនៅឋានរបស់សត្វ ដោយក្រុមមនុស្សព្រៃ ឬមនុស្សបុរាណ តាមរយៈ Channel ២ ផ្សេងគ្នាដែលលោក ពាញ សេដ្ឋា បានបញ្ជាក់ថា មាន ២ គឺ Channel ធំមានឈ្មោះ Building Technology ដែលមានស្នាដៃចំនួនជាង ៧០ វីដេអូ និង Channel តូចឈ្មោះថា Leurt Wilderness មានចំនួនជាង ៣០ វីដេអូ។ ចំណែកឯការបង្កើតនូវភាពល្បីល្បាញនៃគម្រោងចម្លាក់ជីកដី នៅក្នុងខេត្តសៀមរាបរបស់លោក ពេញ សេដ្ឋា ជាមួយនឹងប្អូនថ្លៃប្រុសលោក តាន់ ម៉ូលី ជាអ្នកជំនាញផ្នែកព័ត៌មានវិទ្យាបានបង្កើតអស់ពេលជិត ៤ ឆ្នាំមកហើយផងដែរ៕
តំបន់ឧទ្យានកម្សាន្តដែលមានប្រាសាទបុរាណខាងក្នុង និងកំពែងព័ទ្ធជុំវិញ។ រូបថត សហការី
