រូងថ្ម​មាន​សសរ​ថ្ម​បាសាល់​ធម្មជាតិ​ហ៊ុមព័ទ្ធ​ដោយ​សាគរ​

កោះ​ដែល​មាន​រូង​ភ្នំ​ហ៊ុម​ព័ទ្ធ​ដោយ​ផ្ទៃ​សាគរ​នៅ​ប្រទេស ស្កុតឡេន។
កោះ​ដែល​មាន​រូង​ភ្នំ​ហ៊ុម​ព័ទ្ធ​ដោយ​ផ្ទៃ​សាគរ​នៅ​ប្រទេស ស្កុតឡេន។

ក្រុងក្លាសហ្គូ : ផុស​ចេញ​ពី​ផ្ទៃសមុទ្រ​ដ៏​ខៀវស្រងាត់​ដូចជា​ប្រាសាទ​ថ្ម​ដ៏​ធំ​ខ្ពស់ ស្កឹមស្កៃ កោះ​ស្តាហ្វា (Staffa) ដែល​ជា​កោះ​ដ៏ល្បី​ឈ្មោះ​មួយ​របស់​ប្រទេស​ស្កុតឡេន មាន​ទីតាំង​ស្ថិត​ភាគ​និរតី​នៃ​កោះ​អ៊ូលវ៉ា ហើយ​នៅ​ចន្លោះ​កោះ​រ៉ូសអហ្វ៍មូល និង​កោះ​ត្រេសនីស​។

ចំណុច​ពិសេស​ដែល ធ្វើឲ្យ​ទីតាំង​ភូមិសាស្ត្រ​នេះ​ល្បី​ខ្ទរខ្ទារ​គឺ​កោះ​ស្តាហ្វាមាន រូង​ភ្នំ​ហ្វីនហ្គាល់​ (Fingal's Cave) ដែល​មាន​កម្ពស់​២០​ម៉ែត្រ​ពី​ទឹកសមុទ្រ និង​មាន​ប្រវែង​៧៥​ម៉ែត្រ​។

រូងភ្នំ​នេះ​មាន​ជញ្ជាំង​ថ្ម​បាសាល់​ដែល​មាន​ទម្រង់​ដូចជា​សសរ ជ្រុងៗ​តម្រៀប​គ្នា​ពី​ធម្មជាតិ ខណៈ​ដែល​ខ្សែទឹក​ពណ៌​បៃតង​ថ្លា​ដូច​ត្បូង​មរកត​ហូរ​កាត់​ជញ្ជាំង​រូង ភ្នំ​បង្កើត​បាន​ជា​ទិដ្ឋភាព​មួយ​ដ៏​ប្លែក​ភ្នែក​ចម្លែក​អារម្មណ៍​តែ​ម្ដង។

Content image - Phnom Penh Post

ដើម​ឡើយ កោះ​នេះ​មាន​មនុស្ស​ទៅ​រស់​នៅ​ត្រឹម​តែ​១៦​នាក់​ប៉ុណ្ណោះ​តាំងពី ឆ្នាំ​១៧០០​មក ខណៈ​បច្ចុប្បន្ន​វា​ក្លាយ​ជា​ទី​ជម្រក​របស់​សត្វ​បក្សី​សមុទ្រ​និង​មាន ក្រុម​ភ្ញៀវ​ទេសចរ​ជាច្រើន​ទៅ​ទស្សនា​ហូរហែ។

មនុស្សម្នា​បាន​ចាប់ផ្ដើម ដឹងឮ​និង​ស្គាល់​កោះ​នេះ​នៅ​ចុង​សតវត្សរ៍​ទី​១៨​បន្ទាប់ពី​លោក សឺរចូសេប បេងក៍ និង​មិត្តភក្តិ​របស់​គាត់​ប្រទះ​ឃើញ​សម្រស់​ធម្មជាតិ​ដ៏​ស្រស់ស្អាត​នៃ ផ្ទាំង​សសរ​ថ្ម​បាសាល់​ដែល​ជា​អំណោយ​ពី​ធម្មជាតិ​នេះ​។ លោក​ក៏​បាន​ដាក់​ឈ្មោះ​វា​ថា រូងភ្នំ​ហ្វីនហ្គាល់​។ កោះ​ភ្នំថ្ម​នេះ​ហាក់​ដូចជា​រនាំង​ការពារ​ទឹក​នៅ​មាត់ច្រាំង​ផង​ដែរ។

លុះ ពីរ​សតវត្សរ៍​ក្រោយ​មក​ទៀត​គេ​ក៏​ឃើញ​មាន​ឥស្សរជន​ល្បីៗ​ជាច្រើន​បាន ធ្វើ​ដំណើរ​មក​ដល់​កោះ​នេះ​រួមមាន​ដូចជា​លោក សឺរវ៉លធើរ ស្កុត លោក​វីលៀម វ៉ដស្វត កវី​ជនជាតិ​អង់គ្លេស ព្រះនាង​វ៉ិចតូរៀ ព្រះអង្គម្ចាស់ អាល់ប៊ើត លោក​ជូលេស វែនី និង​លោក បណ្ឌិត​ដេវិដ លីវីងស្តុន ជាដើម។

សព្វថ្ងៃ​នេះ​មាន​នាវា​ទេសចរណ៍​ខ្នាត​តូច​ជាច្រើន​បាន​នាំ​ភ្ញៀវ​ទៅ​ទស្សនា​កោះ​រូងថ្ម​សសរ​បាសាល់​មួយ​នេះ៕ PR

ព័ត៌មានថ្មីៗ