ជាទូទៅការចេញច្បាប់អ្វីមួយតែងតែមានវត្ថុបំណងឱ្យស្ថាប័ន ឬអ្នកពាក់ព័ន្ធគោរពដោយឈរលើមូលដ្ឋានគតិយុត្ត។ ចុះច្បាប់ស្ដីពីម៉ាកពាណិជ្ជកម្ម និងអំពើនៃការប្រកួតប្រជែងមិនស្មោះត្រង់ត្រូវអនុវត្តទៅលើអ្វីខ្លះ? ជុំវិញចម្ងល់នេះភ្នំពេញ ប៉ុស្ដិ៍ បានសម្ភាសជាមួយលោកមេធាវី ខាន់ ច័ន្ទកូលិច ជាប្រធានការិយាល័យមេធាវីមហិ ស្សរា និងជាភ្នាក់ងារតំណាងស្របច្បាប់នៃម្ចាស់ម៉ាកដែលមានការិយាល័យផ្ទះលេខ ២២៩ បេផ្លូវ ២៧១ សង្កាត់ទឹកល្អក់ទី ១ ខណ្ឌទួលគោក រាជធានីភ្នំពេញដែលមានខ្លឹមសារដូចខាងក្រោម៖
តើច្បាប់ស្តីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ប្រើបានទៅលើជំនួញប្រភេទណាខ្លះ?
ច្បាប់ស្តីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ប្រើបានទៅលើគ្រប់ប្រភេទនៃជំនួញទាំងជំនួញខ្នាតតូច ខ្នាតមធ្យម និងខ្នាតធំ។
ប្រសិនបើកម្មសិទ្ធិបញ្ញាទាំងនោះមិនត្រូវបានការពារដោយច្បាប់នោះទេតក្កកម្មនឹងបាត់បង់ទៅគូប្រកួតប្រជែងធំៗដែលមានការប្រកួតប្រជែងក្នុងការធ្វើអាជីវកម្មលើផលិតផល ឬសេវាក្នុងតម្លៃទាបដែលធ្វើឱ្យតក្កករ ឬម្ចាស់ដើមមិនទទួលបានអត្ថប្រយោជន៍ ឬតម្លៃតបស្នងពីការបង្កើតថ្មីរបស់ខ្លួននោះទេ។
កិច្ចការពារកម្មសិទ្ធិបញ្ញាសមស្របសម្រាប់ពាណិជ្ជករ ឬវិនិយោគិនជាជំហានដ៏សំខាន់ក្នុងការកំណត់អំពីការរំលោភបំពាន និងការប្រែក្លាយ គំនិត ទៅជាទ្រព្យអាជីវកម្មដែលមានតម្លៃ។ ការទាញផលប្រយោជន៍ពេញលេញពីប្រព័ន្ធការពារកម្មសិទ្ធិបញ្ញាអាចធ្វើឱ្យពាណិជ្ជករ ឬវិនិយោគិនទទួលបានចំណូលពីការបង្កើតថ្មី និងការច្នៃប្រឌិតរបស់ខ្លួនដែលជាការលើកទឹកចិត្ត និងបង្កើនមូលធនដល់ការស្រាវជ្រាវ និង អភិវឌ្ឍន៍ដោយមានផលិតផល ឬសេវាថ្មីៗជាច្រើនដែលការពារក្រោមប្រភេទផ្សេងៗគ្នានៃកម្មសិទ្ធិបញ្ញា។
តើច្បាប់ស្តីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់បានការពារផលប្រយោជន៍ដល់ពាណិជ្ជករ ឬវិនិយោគិនបែបណា?
ច្បាប់នេះបានការពារផលប្រយោជន៍ដល់ពាណិជ្ជករ និងវិនិយោគិនដូចជា៖
- បង្ការគូប្រកួតប្រជែងពីការចម្លង និងធ្វើត្រាប់តាមផលិតផលរបស់ខ្លួន
- ចៀសវាងការចំណាយថវិកាខ្ជះខ្ជាយលើការស្រាវជ្រាវ និងការផ្សព្វផ្សាយលើទីផ្សារ
- បង្កើតអត្តសញ្ញាណសហគ្រាសតាមរយៈម៉ាក
- ក្នុងការផ្តល់អាជ្ញាប័ណ្ណ ឬការផ្ទេរសិទ្ធិផ្សេងៗនៃកម្មសិទ្ធិបញ្ញា
- បង្កើតតម្លៃទីផ្សាររបស់ខ្លួន
- ទទួលបានមូលធន និងហិរញ្ញប្បទាន
- អាចពង្រីកទៅកាន់ទីផ្សារថ្មី។
(សូមរង់ចាំអានវគ្គបន្ដនៅសប្ដាហ៍ក្រោយ)