ភ្នំពេញៈ ចំនួនគម្រោងសាងសង់ដែលត្រូវបានដាក់ស្នើដើម្បីសំការអនុញ្ញាតពីក្រសួងរៀបចំដែនដី នគរូបនីយកម្ម និងសំណង់ក្នុងរយៈពេល ២ ខែដើមឆ្នាំ ២០២០ បានកើនឡើងជិតទ្វេដង បើធៀបនឹងរយៈពេលដូចគ្នាកាលពីឆ្នាំ ២០១៩។ នេះបើយោងតាមអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់។
ថ្លែងក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងារបន្តរបស់ក្រសួងរៀបចំដែនដី នគរូបនីយកម្ម និងសំណង់» ដែលរៀបចំនៅទីស្តីការគណៈរដ្ឋមន្ត្រីកាលពីព្រឹកថ្ងៃចន្ទលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់បាននិយាយថា ទោះបីជាពិភពលោកកំពុងប្រឈមមុខនឹងការរីករាលដាលយ៉ាងខ្លាំងនៃជំងឺដែលបង្កឡើងដោយវីរុសកូវីដ ១៩ ក៏ដោយ ប៉ុន្តែចំនួននៃការដាក់ពាក្យស្នើសុំសាងសង់នៅកម្ពុជាមិនបានធ្លាក់ចុះទេក្នុងរយៈពេល ២ ខែដំបូងក្នុងឆ្នាំ ២០២០ នេះ។
លោកថ្លែងថា៖ «ចំនួននៃការដាក់ពាក្យស្នើសុំអនុញ្ញាតសាងសង់មកក្រសួងរៀបចំដែនដី នគរូបនីយកម្ម និងសំណង់ក្នុងរយៈពេល ២ ខែដំបូងក្នុងឆ្នាំ ២០២០ មានប្រមាណ ៥២៣ គម្រោង កើនពីជាង ៣០០ គម្រោងកាលពីរយៈពេល ២ ខែដំបូងក្នុងឆ្នាំ ២០១៩។ ចំណែកទុនវិនិយោគកើនឡើងជិតទ្វេដង»។
បើទោះបីយ៉ាងណាលោក សេង ឡូត លើកឡើងថា ចាប់ពីខែមីនានេះទៅមុខ លោកមិនហ៊ានអះអាងបែបណានោះទេ ដោយក្រុមការងារជំនាញរបស់ក្រសួងកំពុងរង់ចាំពិនិត្យមើលលើភាពជាក់ស្តែង។
កាលពីថ្ងៃទី ៦ ខែមីនា កន្លងមកក្រសួងសេដ្ឋកិច្ច និងហិរញ្ញវត្ថុបានចេញនូវសារាចរណែនាំមួយស្តីពី «ការធ្វើវិចារណកម្ម និងការពង្រឹងប្រសិទ្ធភាពចំណាយសម្រាប់អនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២០» ដែលសារាចរនេះមានគោលបំណងកាត់បន្ថយការចំណាយមិនចាំបាច់មួយចំនួន ដើម្បីយកថវិកាមកផ្តោតអាទិភាពទៅលើការប្រយុទ្ធប្រឆាំងនឹងការរីករាលដាលនៃជំងឺកូវីដ ១៩។ នៅក្នុងចំណុចមួយក៏បានបញ្ជាក់ពីការតម្រូវឲ្យផ្អាកគម្រោងសាងសង់ថ្មីលើកលែងតែការងារជួសជុលអគារដែលមានស្រាប់តែប៉ុណ្ណោះ។
លោក សំ សុខនឿន នាយកប្រតិបត្តិក្រុមហ៊ុនអចលនទ្រព្យ KW Sen Sok បានប្រាប់ភ្នំពេញប៉ុស្តិ៍កាលពីម្សិលមិញថា នៅមុនពេលវីរុសកូវីដ១៩ រីករាលដាលខ្លាំងទៅកាន់ប្រទេសជាច្រើនលើពិភពលោក លោកសង្កេតឃើញថា សកម្មភាពនៃការសាងសង់ និងការទិញ-លក់អចលនទ្រព្យនៅកម្ពុជាពិតជាមានភាពផុលផុសខ្លាំងមែន។
លោកបន្តថា ប៉ុន្តែចាប់ពីមានព័ត៌មានការផ្ទុះនៅប្រទេសជាច្រើននៅតំបន់អឺរ៉ុប និងកូរ៉េរួចមកសកម្មភាពវិស័យសំណង់ និងអចលនទ្រព្យនៅកម្ពុជាបានធ្លាក់ចុះជាបន្តបន្ទាប់។ លោកនិយាយថា៖ «ខ្ញុំគិតថា ចំនួនគម្រោងដែលបានដាក់ពាក្យស្នើសុំពិតជាមានច្រើននៅមុនពេលមានកូវីដ ១៩ ប៉ុន្តែពេលមានប្រធានស័ក្ត (វីរុសកូវីដ ១៩) កើតមានឡើងភ្លាមៗនេះវាក៏បានទាញទម្លាក់កំណើននោះឲ្យចុះមកលឿនផងដែរ»។
លោកលើកឡើងថា ជំងឺនេះនឹងធ្វើឲ្យប៉ះពាល់យ៉ាងខ្លាំងទៅដល់សេដ្ឋកិច្ចពិភពលោក ហេតុនេះផលអវិជ្ជមានសម្រាប់វិស័យសំណង់ និងអចលនទ្រព្យវិស័យសំណង់នៅកម្ពុជានឹងក្លាយជារឿងចៀសមិនផុតក្នុងឆ្នាំនេះ។ លោកថ្លែងថា៖ «ខ្ញុំគិតថា វិស័យសំណង់ និងអចលនទ្រព្យកម្ពុជាក្នុងឆ្នាំ ២០២០ នេះនឹងមិនល្អនោះទេ ដោយវាអាចស្ថិតនៅទ្រឹង ឬក៏ធ្លាក់ចុះផងបើធៀបនឹងឆ្នាំ ២០១៩»។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា កាលពីឆ្នាំ ២០១៩ ក្រសួងបានផ្តល់ការអនុញ្ញាតលើគម្រោងសាងសង់សរុប ៤ ៤៤៦ គម្រោង ដែលមានតម្លៃប្រមាណ ៩ ៣៥៣ លានដុល្លារ ខណៈកាលពីឆ្នាំ ២០១៨ មានគម្រោងសាងសង់សរុប ២ ៨៦៧ គម្រោង ដែលមានតម្លៃប្រមាណ ៥ ២២៨ លានដុល្លារកើនឡើង ៧៨,៨៨ ភាគរយ៕LA