ទិដ្ឋភាពអគារពាណិជ្ជកម្ម ខុនដូ លំនៅឋាននៅទីក្រុងបាងកក។ រូបថត AFP
ក្រុងបាងកកៈ ក្រសួងហិរញ្ញវត្ថុប្រទេសថៃនឹងធ្វើការបែងចែកប្រភេទនៃការបង់ពន្ធផ្ទះដែលវិធានការនេះគឺជាដំណឹងល្អសម្រាប់ម្ចាស់លំនៅឋានទិញដើម្បីជួលនៅក្នុងគម្រោងទាំងអគារទាប និងខ្ពស់ ព្រោះអចលនទ្រព្យទាំងនេះនឹងត្រូវបង់ពន្ធយោងទៅតាមប្រភេទលំនៅឋានទី ២ ក្នុងករណីដែលលំនៅឋានច្រើនជាងមួយត្រូវបានគ្រប់គ្រងស្ថិតក្រោមច្បាប់ និងពន្ធអគារថ្មី។
លោក Prasong Poontaneat លេខាធិការអចិន្ត្រៃយ៍ផ្នែកហិរញ្ញវត្ថុបានឲ្យដឹងថា លំនៅឋានទិញដើម្បីជួលនឹងត្រូវបានចាត់ទុកសម្រាប់គោលបំណងរស់នៅ។
ម្ចាស់លំនៅឋាន ពិសេសអ្នកដែលគ្រប់គ្រងខុនដូបារម្ភថា លំនៅឋានទី ២ របស់ពួកគេនឹងត្រូវចាត់ថ្នាក់សម្រាប់ការគោលបំណងផ្សេងទៀត និងទទួលខុសត្រូវលើតម្លៃពន្ធកាន់តែខ្ពស់។
ក្រសួងហិរញ្ញវត្ថុបានរៀបចំការពិភាក្សាជាមួយអ្នកពាក់ព័ន្ធ និងបានសន្និដ្ឋានថាលំនៅឋានបែបនោះសូម្បីតែលំនៅឋានសម្រាប់ជួលនឹងត្រូវស្ថិតក្រោមតម្លៃពន្ធលំនៅឋានទី ២។
លោក Prasong បន្តថា តម្លៃនេះនឹងត្រូវអនុវត្តចំពោះបុគ្គលដែលគ្រប់គ្រងលំនៅឋាន ឬខុនដូ ១ ផ្នែកខណៈអ្នកដែលគ្រប់គ្រងលើគម្រោងលំនៅឋានទាំងមូលសម្រាប់ជួលនឹងត្រូវស្ថិតក្រោមតម្លៃពន្ធអចលនទ្រព្យសម្រាប់ការប្រើប្រាស់ផ្សេងទៀត។
លំនៅឋានទី ២ នឹងត្រូវបង់ពន្ធ ០,០២ ភាគរយសម្រាប់លំនៅឋានដែលមានតម្លៃ ៥០ លានបាត។ សម្រាប់លំនៅឋានដែលបានចាត់ថ្នាក់សម្រាប់ការប្រើប្រាស់ផ្សេងទៀតម្ចាស់នឹងត្រូវស្ថិតក្រោមតម្លៃពន្ធ ០,៣ ភាគរយសម្រាប់លំនៅឋានដែលមានតម្លៃរហូតដល់ ៥០ លានបាត។
របបពន្ធអចលនទ្រព្យថ្មីនេះនឹងជំនួសពន្ធលំនៅឋាន ពន្ធដី និងពន្ធអភិវឌ្ឍន៍មូលដ្ឋានចាប់ផ្ដើមនៅថ្ងៃចូលឆ្នាំថ្មីតទៅ។
យោងតាមរចនាសម្ព័ន្ធពន្ធថ្មី ដី និងលំនៅឋានដែលបានប្រើប្រាស់សម្រាប់លំនៅឋានដែលមានតម្លៃរហូតដល់ ៥០ លានបាតគឺលើកលែងពន្ធសម្រាប់លំនៅឋានសំខាន់ៗ ខណៈលំនៅឋានដែលមានតម្លៃលើសពី ៥០ ទៅ ៧៥ លានបាតត្រូវបង់ពន្ធក្នុង ០,០៣ ភាគរយនៃការវាយតម្លៃលើសពី ៧៥ ទៅ ១០០ លានបាតត្រូវបង់ពន្ធចំនួន ០,០៥ ភាគរយ និងលើសពី ១០០ លានបាតត្រូវបង់ពន្ធ ០,១ ភាគរយ។
អ្នកដែលគ្រប់គ្រងលំនៅឋានតែ ១ មិនមែនដីត្រូវបានលើកលែងពន្ធសម្រាប់មូលដ្ឋានគិតពន្ធ ១០ លានបាតដំបូងនៃការវាយតម្លៃលំនៅឋានរបស់ពួកគេ។
លំនៅឋានដែលតម្លៃលើសពី ១០ ទៅ ៥០ លានបាតត្រូវបានគិតតម្លៃ ០,០២ ភាគរយជាង ៥០ ទៅ ៧៥ លានបាតត្រូវបានគិតតម្លៃ ០,០៣ ភាគរយ និងលើសពី ៧៥ ទៅ ១០០ លានបាតត្រូវបានគិតតម្លៃ ០,០៥ ភាគរយ និងលើសពី ១០០ លានបាតត្រូវបានគិត ០,១ ភាគរយ។
បើម្ចាស់មានលំនៅឋានលើសពី ១ លំនៅឋានទី ២ និងផ្ទះបន្តបន្ទាប់ត្រូវស្ថិតក្រោមពន្ធ ០,០២ ភាគរយសម្រាប់លំនៅឋានដែលមានតម្លៃរហូតដល់ ៥០ លានបាត និងតម្លៃពន្ធដូចគ្នានឹងលំនៅឋានសំខាន់ៗត្រូវបានអនុវត្តចំពោះលំនៅឋានជាមួយការវាយតម្លៃលើសពី ៥០ លានបាត។
ម្ចាស់ដីដែលជួលសម្រាប់គោលបំណងធ្វើកសិកម្មនឹងត្រូវបង់ពន្ធសម្រាប់គោលបំណងកសិកម្មជំនួសពាណិជ្ជកម្ម។ ពន្ធដី និងអគារត្រូវសំដៅដល់ការជំរុញឲ្យម្ចាស់ដីប្រើប្រាស់ដីរបស់ពួកគេ ហើយពន្ធមិនគួរដាក់បន្ទុកលើអ្នកជាប់ពន្ធនោះទេ។
លោកបានឲ្យដឹងថា ទីភ្នាក់ងារដែលជាប់ពាក់ព័ន្ធទាំងអស់ត្រូវបង្កើនការយល់ដឹងជាសាធារណៈអំពីតម្លៃពន្ធថ្មីនេះមុនពេលការទូទាត់លើកដំបូងចាប់ផ្ដើមនៅខែសីហា ឆ្នាំ ២០២០។ ក្រសួងមហាផ្ទៃនៅពេលថ្មីៗ បានប្រកាសថា អំឡុងពេលទូទាត់ពន្ធដី និងអគារនឹងត្រូវពន្យារពេលចាប់ពីខែមេសាដល់ខែសីហា៕ LA
