ភ្នំពេញៈ ថ្នាក់ដឹកនាំគម្រោងអភិវឌ្ឍន៍លំនៅឋាន និងដីឡូត៍សុទ្ធតែបង្ហាញពីឆន្ទៈក្នុងការចូលរួមជាមួយរដ្ឋាភិបាលដើម្បីផ្តល់ភាពអនុគ្រោះដល់អតិថិជនដែលទិញអចលនទ្រព្យនាអំឡុងពេលជំងឺកូវីដ ១៩ កំពុងរីករាលដាលនៅកម្ពុជា។
នាយករដ្ឋមន្ត្រីកម្ពុជាលោក ហ៊ុន សែន កាលពីថ្ងៃទី ៩ ខែ មីនា ឆ្នាំ ២០២០ នៅក្នុងពិធីសម្ពោធឲ្យប្រើប្រាស់ផ្លូវជាតិលេខ ៥៥ និងបើកការដ្ឋានសាងសង់ផ្លូវជាតិលេខ ១០ បានស្នើឲ្យក្រុមហ៊ុនអភិវឌ្ឍន៍លំនៅឋានទាំងអស់ជួយសម្រួល និងពន្យារពេលក្នុងការបង់ប្រាក់សម្រាប់អតិថិជនតាមលទ្ធភាពដែលអាចធ្វើបាននាអំឡុងពេលកម្ពុជាកំពុងមានការឆ្លងជំងឺកូវីដ ១៩។
លោកថ្លែងថា៖ «សុំឲ្យម្ចាស់បុរី ឬម្ចាស់ផ្ទះដែលលក់ផ្ទះបង់រំលស់ឲ្យកម្មករ និងអ្នកដែលមានការងារក្រុមធ្វើនៅតាមសណ្ឋាគារនានា ឬតាមរោងចក្រនានាដែលត្រូវព្យួរការងារនេះ ពន្យារការបង់កុំផ្ដាច់កុងត្រាក្នុងរយៈពេលហ្នឹង ព្រោះបើតាមដឹងកុងត្រាសម្រាប់បង់រំលស់នេះ កាលណាមិនបង់ឲ្យគេក្នុងរយៈពេលប៉ុន្មានថ្ងៃគឺគេផ្ដាច់កុងត្រាតែម្ដង ហើយដេញយើងចុះពីផ្ទះអ៊ីចឹងទេសុំឲ្យមានការយោគយល់លើបញ្ហានេះ»។
លោក ហ៊ុយ វណ្ណា អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា បានប្រាប់ភ្នំពេញប៉ុស្តិ៍កាលពីថ្ងៃពុធថា ក្រុមហ៊ុនអភិវឌ្ឍន៍លំនៅឋានដែលជាសមាជិកសមាគមអ្នកអភិវឌ្ឍន៍លំនៅឋានកម្ពុជាសុទ្ធតែបានចូលរួមអនុវត្តវិធានការនេះ ព្រោះវិធានការនេះបាននិងកំពុងចូលរួមចំណែកយ៉ាងសំខាន់ក្នុងការរក្សាលំនឹងទីផ្សារលំនៅឋាននៅកម្ពុជានាដំណាក់កាលជំងឺកូវីដ ១៩។
លោកបានបន្តថា ដើម្បីចូលរួមរក្សាលំនឹងទីផ្សារកាលពីថ្ងៃទី ១០ ខែមីនា សមាគមអ្នកអភិវឌ្ឍន៍លំនៅឋានកម្ពុជាបានដាក់ចេញនូវវិធានការសំខាន់ៗមួយចំនួនដូចជា ការលើកទឹកចិត្តតាមរយៈការបញ្ចុះតម្លៃរហូតដល់ ៧ ភាគរយ ការលើកទឹកចិត្តតាមរយៈការបង់ប្រាក់ផ្តាច់ជាមួយក្រុមហ៊ុន និងការផ្តល់ភាពទន់ភ្លន់អំពីលក្ខខណ្ឌនៃការបង់ប្រាក់នៅក្នុងរយៈពេលនៃវិបត្តិជំងឺកូវីដ ១៩។
លោកបានបញ្ជាក់ថា៖ «ទាំងនេះគឺសុទ្ធតែជាវិធានការបឋមប៉ុណ្ណោះ បើរដ្ឋាភិបាលមានវិធានការអ្វីបន្ថែមទៀត សមាគមនឹងពិនិត្យបន្ថែមដើម្បីជួយដល់វិស័យលំនៅឋាននៅកម្ពុជា។ សមាជិកសមាគមនឹងធ្វើការរួមគ្នាដើម្បីធ្វើឲ្យទីផ្សារលំនៅឋានមានភាពល្អប្រសើរ និងមាននិរន្តរភាព»។
លោក អៀង សុធារ៉ា សហស្ថាបនិកក្រុមហ៊ុន Arakawa Co., Ltd ដែលកំពុងអភិវឌ្ឍខុនដូតម្លៃសមរម្យ Arakawa Residence ក្នុងក្រុងភ្នំពេញបានប្រាប់ថា ដោយសារគម្រោងរបស់លោកជាគម្រោងដែលមានតម្លៃសមរម្យ ដូច្នេះការលក់មិនមានអ្វីប្រែប្រួលច្រើនទេ។ លោកបន្តថា ការដាក់ចេញនូវវិធានការរបស់រដ្ឋាភិបាលគឺពិតជាមានតម្លៃណាស់ក្នុងការរក្សាលំនឹងទីផ្សារអចលនទ្រព្យ ព្រោះបើវិស័យនេះមានបញ្ហា វានឹងជះឥទ្ធិពលទៅដល់គ្រប់វិស័យ។
ខណៈបដិសេធថា លោកមិនទាន់ទទួលបានសំណើណាមួយពីអតិថិជន លោក សុធារ៉ា បាននិយាយថា៖ «ក្រុមហ៊ុននឹងពិចារណាបើសិនមានការលើកឡើងរបស់អតិថិជន។ ប៉ុន្តែខ្ញុំនៅតែមានជំនឿថា អតិថិជននៅក្នុងគម្រោង Arakawa Residence នឹងមិនមានបញ្ហានេះឡើយ»។
លោក ជឹម សុជា ប្រធានគ្រប់គ្រងទូទៅនៃក្រុមហ៊ុនពុះដីឡូត៍ UTrust Investment Co., Ltd ដែលមានដីពុះឡូត៍លក់ជិត ៨០ ហិកតា នៅខាងក្រោយផ្សារបាត់ដឹងក្នុងស្រុកឧដុង្គ ក្នុងខេត្តកំពង់ស្ពឺបាននិយាយថា ការផ្ទុះឡើងនៃជំងឺកូវីដ ១៩ បានធ្វើឲ្យការលក់របស់ក្រុមហ៊ុនធ្លាក់ចុះបន្តិចបន្តួច ប៉ុន្តែលោកសង្កេតឃើញថា ការបង់ប្រាក់របស់អតិថិជនមានភាពយឺតយ៉ាវជាងមុន។ លោកបន្តថា មានអតិថិជនមួយចំនួនបានលើកយកបញ្ហាកង្វះថវិកាបង់ប្រចាំខែឲ្យក្រុមហ៊ុនមកឲ្យក្រុមហ៊ុនជួយដោះស្រាយ។
លោកថ្លែងថា៖ «ទោះបីនៅក្នុងកិច្ចសន្យាទិញលក់ ក្រុមហ៊ុនបានសរសេរយ៉ាងច្បាស់ពីលក្ខខណ្ឌបង់ប្រាក់ក៏ដោយ ក៏ពេលថ្មីៗនេះមានអតិថិជនមួយចំនួនតូចបានមកជួបក្រុមហ៊ុនឲ្យជួយដោះស្រាយផងដែរ ដោយលើកហេតុផលថា ពួកគាត់មិនមានប្រាក់ចំណូលគ្រប់គ្រាន់សម្រាប់បង់ឲ្យក្រុមហ៊ុនដូចពេលមុនទេ»។
ការធ្លាក់ប្រាក់ចំណូលនាអំឡុងពេលនេះត្រូវបានអតិថិជនលើកឡើងថា បណ្តាលមកពីកត្តាមួយចំនួនដូចជា ការបាត់បង់ការងារ ការធ្លាក់ចុះផលរបរ ភាពរអាក់រអួលនៃការផ្ញើប្រាក់ពីក្រុមគ្រួសារដែលទៅធ្វើការនៅបរទេស និងការចង់ទុកខ្លះប្រាក់សម្រាប់ពិធីបុណ្យចូលឆ្នាំនាពេលខាងមុខ។ នេះបើតាមលោក សុជា។
ដើម្បីចូលរួមជួយដល់ទីផ្សារអចលនទ្រព្យដែលកំពុងប្រឈមនឹងវិបត្តិជំងឺកូវីដ ១៩ រដ្ឋាភិបាលកម្ពុជាកាលពីចុងខែកុម្ភៈកន្លងមកក៏បានដាក់ចេញនូវវិធានការបន្ទាន់មួយផងដែរ តាមរយៈការមិនយកពន្ធប្រថាប់ត្រាពីការទិញលក់ផ្ទះដែលមានតម្លៃក្រោម ៧ ម៉ឺនដុល្លារនៅក្នុងរយៈពេលពេញ ១ ឆ្នាំ៕ LA