ក្រុងហូជីមិញៈ ក្រុមហ៊ុនពិគ្រោះយោបល់អចលនទ្រព្យនានាបានឲ្យដឹងថា វិស័យអចលនទ្រព្យទីក្រុងហូជីមិញក្នុងរយៈពេលប៉ុន្មានឆ្នាំថ្មីៗនេះបានទាក់ទាញការវិនិយោគបរទេសដែលមានតម្លៃរាប់ពាន់លានដុល្លារ ដោយសារសក្ដានុពលកំណើនរបស់ទីក្រុងនេះ។
នៅពេលថ្មីៗនេះទីក្រុងនេះបានជាប់ឈ្មោះក្នុងចំណោមទីផ្សារ ៣ ឈានមុខគេសម្រាប់ក្រុមវិនិយោគិនអចលនទ្រព្យនៅតំបន់អាស៊ីប៉ាស៊ីហ្វិកដែលផ្តល់ចំណាត់ថ្នាក់ដោយវិទ្យាស្ថាន Urban Land Institute របស់អាមេរិក និងក្រុមហ៊ុន PricewaterhouseCoopers ជាក្រុមហ៊ុនសេវាអាជីពថ្នាក់ពិភពលោក។
កាលពីឆ្នាំមុនទីក្រុងហូជីមិញបានទាក់ទាញការវិនិយោគបរទេសចំនួន ៨,៣ ពាន់លានដុល្លារអាមេរិកកើនឡើង ៣៩, ៤៥ ភាគរយធៀបនឹងឆ្នាំ ២០១៨។ នេះបើតាមគណៈកម្មាធិការប្រជាជនក្រុងហូជីមិញ។
ការផលិតមានចំនួន ៤០,១៤ ភាគរយ (៣,៣៣ ពាន់លានដុល្លារ) របស់ទីក្រុងនេះ បន្ទាប់មកគឺវិស័យអចលនទ្រព្យមានចំនួន ២៥ ភាគរយ (២ ពាន់លានដុល្លារ)។
នៅឆ្នាំមុនក្រុមហ៊ុន Phat Dat Real Estate Development បានចុះហត្ថលេខាលើកិច្ចព្រមព្រៀងមួយតម្លៃ ២២,៥ លានដុល្លារជាមួយក្រុមហ៊ុន Samty Asia Investments Pte. Ltd របស់ប្រទេសជប៉ុន ដើម្បីអភិវឌ្ឍគម្រោងអចលនទ្រព្យដោយផ្ដោតការយកចិត្តទុកដាក់លើទីក្រុងនេះ។
ក្រុមហ៊ុន Keppel Group របស់សិង្ហបុរីកាលពីខែវិច្ឆិកាឆ្នាំមុនបានចាប់ផ្ដើមការសាងសង់ គម្រោង Saigon Sports City ដែលជាគម្រោងទីក្រុងវៃឆ្លាតលើផ្ទៃដីទំហំ ៦៤ ហិកតានៅតំបន់ District 2។
ការចំណាយរបស់ការអភិវឌ្ឍនេះតាមការប៉ាន់ប្រមាណមានតម្លៃ ៣០០ លានដុល្លារដែលនឹងមានអាផាតមិនប្រហែល ៤ ៣០០ យូនីត និងកន្លែងលេងកីឡា កន្លែងកម្សាន្ត និងមជ្ឈមណ្ឌលកម្សាន្តប្រកបដោយផាសុកភាពប្រហែល ហើយគ្រោងនឹងបញ្ចប់ក្នុងឆ្នាំ ២០២៧។
ក្រុមហ៊ុន Keppel បានទទួលអាជ្ញាប័ណ្ណសម្រាប់គម្រោងអចលនទ្រព្យផ្សេងទៀតចំនួន ២០ ជាមួយនឹងការវិនិយោគសរុបជាង ៣ ពាន់លានដុល្លារដែលភាគច្រើនក្នុងចំណោមគម្រោងទាំងនេះស្ថិតនៅក្នុងទីក្រុងហូជីមិញ។
ក្រុមហ៊ុន Phu Dong Real Estate Group Joint Stock Company បានឲ្យដឹងថា ខ្លួនបានភ្ជាប់ទំនាក់ទំនងជាមួយក្រុមហ៊ុនជប៉ុនចំនួន ៣ សម្រាប់ការវិនិយោគរួម ដើម្បីអភិវឌ្ឍគម្រោងលំនៅឋាននៅក្នុងទីក្រុងនេះ។
ក្រុមហ៊ុន SK Group របស់ប្រទេសកូរ៉េបានទិញភាគហ៊ុនតម្លៃ ១ ពាន់លានដុល្លារនៅក្នុងក្រុមហ៊ុនអភិវឌ្ឍន៍ឈានមុខគេ Vingroup, SonKim Land ដែលប្រមូលមូលនិធិបាន ១២១ លានដុល្លារពីវិនិយោគិនមួយក្រុមដែលរួមមានក្រុមហ៊ុន EXS Capital ក្រុមហ៊ុន ACA Investments និងក្រុមហ៊ុន Credit Suisse AG។
លោក Yamaguchi Masakazu ប្រធានតំណាងក្រុមហ៊ុន Creed Group របស់ប្រទេសជប៉ុនក្នុងប្រទេសវៀតណាមបានឲ្យដឹងថា តម្រូវការអចលនទ្រព្យនៅក្នុងប្រទេសវៀតណាមនៅតែខ្ពស់ជាពិសេសក្នុងផ្នែកតម្លៃមធ្យម។
លោកថ្លែងថា៖ «តម្រូវការត្រូវបានរំពឹងថានឹងបន្តកើនឡើងក្នុងរយៈពេល ៣០ ឆ្នាំក្រោយ»។
ទាក់ទាញការវិនិយោគក្រុមអ្នកវិភាគបានឲ្យដឹងថា ទីផ្សារអចលនទ្រព្យទីក្រុងហូជីមិញនឹងនៅតែមានភាពទាក់ទាញសម្រាប់ការវិនិយោគបរទេសនៅឆ្នាំនេះ និងក្នុងរយៈពេលជាច្រើនឆ្នាំខាងមុខ។
លោក Nguyen Hoang នាយកផ្នែកស្រាវជ្រាវ និងអភិវឌ្ឍន៍របស់ក្រុមហ៊ុន DK-RA Vietnam បានឲ្យដឹងថា៖ «ខ្ញុំគិតថា អចលនទ្រព្យនៅឆ្នាំនេះនឹងបន្តនៅជាវិស័យមួយក្នុងចំណោមវិស័យដែលទទួលបានអត្ថប្រយោជន៍ធំជាងគេនៃមូលធនបរទេស»។
ក្នុងរយៈពេលប៉ុន្មានឆ្នាំថ្មីៗនេះវិស័យនេះបានជាប់ចំណាត់ថ្នាក់ទី ២ ឬទី ៣ ជាបន្តបន្ទាប់ទាក់ទងនឹងការទាក់ទាញការវិនិយោគផ្ទាល់ពីបរទេស។
ការវិនិយោគបរទេសនឹងជួយឆ្លើយតបតម្រូវការមូលនិធិរបស់ក្រុមហ៊ុនអភិវឌ្ឍន៍ ខណៈរដ្ឋាភិបាលរឹតបន្តឹងឥណទានដែលហូរចូលទៅក្នុងវិស័យអចលនទ្រព្យនេះ។ នេះបើយោងតាមលោក Hoang ។
លោកបន្ថែមថា ក្រៅពីនេះក្រុមវិនិយោគិនបរទេសនឹងទទូចឲ្យមានស្ដង់ដាកាន់តែខ្ពស់ដែលនឹងទាមទារឲ្យក្រុមហ៊ុនអចលនទ្រព្យវៀតណាមត្រូវបង្កើនស្ដង់ដារបស់ពួកគេ និងកែលម្អតម្លាភាព។
ដោយសារនិន្នាការនៃការផ្លាស់ប្តូរទីតាំងផលិតពីប្រទេសចិន ហើយវៀតណាមក្លាយជាជម្រើសមួយក្នុងចំណោមជម្រើសដែលចូលចិត្តជាងគេសម្រាប់ក្រុមហ៊ុនជាច្រើននោះ អចលនទ្រព្យសម្រាប់ឧស្សាហកម្មស្ថិតក្នុងចំណោមវិស័យដែលទាក់ទាញការវិនិយោគបរទេស។
ការជួលអចលនទ្រព្យឧស្សាហកម្មបានកើនឡើងខ្លាំងក្នុងខេត្តជាច្រើនកាលពីឆ្នាំមុន។
ទីក្រុងហូជីមិញគឺជាទីក្រុងមួយក្នុងចំណោមទីក្រុងទទួលបានអត្ថប្រយោជន៍ជាច្រើននៃការផ្លាស់ប្តូរសមត្ថភាពផលិតកម្មចេញពីប្រទេសចិន។
ប៉ុន្តែវិស័យអចលនទ្រព្យក៏រងផលប៉ះពាល់យ៉ាងខ្លាំងដែរ ដោយសារការពិបាកទទួលបានការអនុម័តសម្រាប់គម្រោងថ្មីៗ ខណៈមានដីតិចតួច ឬគ្មានដីនៅសល់សម្រាប់ការអភិវឌ្ឍនៅផ្នែកខាងក្នុងទីក្រុង៕ ANN/LA