ក្រុងបាងកកៈ ក្រុមហ៊ុនប្រតិបត្តិការសណ្ឋាគារ InterContinental Hotels Group (IHG) នៅតែមិនបារម្ភដោយអារម្មណ៍អវិជ្ជមានសម្រាប់ទេសចរណ៍របស់ប្រទេសថៃ ខណៈក្រុមហ៊ុនរៀបចំបង្កើនទ្វេដងនូវផលបត្រវិនិយោគរបស់ខ្លួនក្នុងរយៈពេលពី ៣ ទៅ ៥ ឆ្នាំជាមួយនឹងគម្រោងប្រើប្រាស់ចម្រុះ ដែលជាជម្រើសពេញនិយមខ្លាំងសម្រាប់វិនិយោគិន។ នេះបើយោងតាមកាសែតបាងកកប៉ុស្តិ៍។
អ្នកស្រី Serena Lim អនុប្រធានផ្នែកអភិវឌ្ឍន៍សណ្ឋាគារទទួលបន្ទុកតំបន់អាស៊ីខាងត្បូង អាស៊ីខាងកើត និងកូរ៉េបានប្រាប់កាសែតបាងកកប៉ុស្តិ៍ថា៖ «មានឧបសគ្គជាច្រើនប្រឆាំងនឹងអាជីវកម្មទេសចរណ៍ ប៉ុន្តែយើងតែងតែចងចាំថា ប្រទេសថៃមានភាពរឹងមាំ និងបានរួចផុតពីកាលៈទេសៈពិបាកកាលពីអតីតកាលដូចជាទឹកជំនន់ និងការបិទព្រលានយន្តហោះក្នុងអំឡុងចលាចលនយោបាយជាដើម»។
ថៃគឺជាទីផ្សារឈានមុខគេមួយសម្រាប់ទីតាំងឈរជើងរបស់ក្រុមហ៊ុន IHG ក្នុងតំបន់ បន្ទាប់មកគឺវៀតណាម ឥណ្ឌូនេស៊ី និងម៉ាឡេស៊ី។
ក្រុមហ៊ុនសម្ព័ន្ធនេះមានសណ្ឋាគារចំនួន ២៩ កំពុងបម្រើសេវា និងសណ្ឋាគារ៣០ ស្ថិតក្នុងផែនការដែលគ្រោងនឹងបើកដំណើរការក្នុងរយៈពេលពី ៣ ទៅ ៥ ឆ្នាំ។
វិស័យដែលទទួលជោគជ័យសម្រាប់ប្រទេសថៃគឺទីផ្សារកណ្ដាលដែលសណ្ឋាគារ Holiday Inn មានឱកាសល្អបំផុតសម្រាប់ការពង្រីកខ្លួន ខណៈដែលសណ្ឋាគារនេះបម្រើភ្ញៀវទេសចរដែលមានប្រាក់ចំណូលមធ្យម និងអ្នកដំណើរក្នុងស្រុកដែលជាប្រភពសំខាន់សម្រាប់ឧស្សាហកម្មទេសចរណ៍ក្នុងប្រទេសនេះ។
បាងកកប៉ុស្តិ៍បានរាយការណ៍ទៀតថា សណ្ឋាគារ Holiday Inn ក៏ជាយីហោរីកចម្រើនរហ័សបំផុតរបស់ក្រុមហ៊ុន IHG ផងដែរ ខណៈដែលជាង ៥០ ភាគរយនៃកិច្ចព្រមព្រៀងគ្រប់គ្រងសណ្ឋាគារនៅក្នុងតំបន់នានាដែលស្ថិតក្រោមការទទួលខុសត្រូវរបស់អ្នកស្រីគឺកំពុងស្ថិតក្រោមយីហោនេះ ។
ទោះយ៉ាងណាលោកស្រី Lim បានឲ្យដឹងថា ក្រុមវិនិយោគិនក្នុងប្រទេសថៃ ទំនងជានឹងកាន់តែមានភាពប្រាកដប្រជាអំពីស្ថានការដែលកំពុងកើតឡើងដែលប៉ះពាល់ដល់អាជីវកម្ម។
លោកស្រីបន្តថា អ្នកដែលនៅតែមានចំណាប់អារម្មណ៍ខ្លាំងលើការវិនិយោគថ្មី គឺម្ចាស់ដែលមានបទពិសោធពីមុនខាងផ្នែកអាជីវកម្មបដិសណ្ឋារកិច្ច។ ក្រុមវិនិយោគិនប្រភេទនេះគឺជាទិសដៅដ៏សំខាន់ដែលក្រុមហ៊ុន IHG បានចាប់ដៃធ្វើជាដៃគូ។
អ្នកស្រី Lim ថ្លែងថា៖ «ក្រុមវិនិយោគិនសណ្ឋាគារថៃកាន់តែមានភាពប្រាកដប្រជា ដោយសារតែតម្លៃដីកើនឡើងដែលធ្វើឲ្យពួកគេមានការយល់ដឹងកាន់តែខ្លាំងអំពីថវិកា»។
អ្នកស្រីបញ្ជាក់ថា ម្ចាស់សណ្ឋាគារនានាកំពុងជ្រើសរើសយកបច្ចេកវិទ្យា ដើម្បីធ្វើឲ្យកាន់តែប្រសើរឡើងសេវាបម្រើភ្ញៀវ និងដំណើរការសណ្ឋាគារដែលខុសគ្នាពីអគារសណ្ឋាគារប្រពៃណីកាលពីអតីតកាលដែលជាធម្មតាផ្ដោតការយកចិត្តទុកដាក់លើភាពប្រណីត។
លើសពីនេះទៀតពួកគេមានទំនោរទៅរកការប្រុងប្រយ័ត្នអំពីការជ្រើសរើសទីតាំងដែលមានតម្រូវការធ្វើដំណើរដ៏រឹងមាំ ហើយពួកគេចង់មានសណ្ឋាគារមានបរិក្ខារដែលអាចត្រូវនឹងទីផ្សារជាទិសដៅ។
លោកស្រី Lim បន្តថា៖ «នៅពេលតម្លៃដីកាន់តែខ្ពស់ខ្លាំង យើងជំរុញឲ្យម្ចាស់សណ្ឋាគារត្រូវពិចារណាលើការអភិវឌ្ឍគម្រោងប្រើប្រាស់ចម្រុះដែលនឹងជួយធ្វើពិពិធកម្មប្រភពចំណូលបានពីសេវាប្រើប្រាស់ផ្សេងៗដូចជាផ្ទៃក្រឡាលក់រាយ និងការិយាល័យជាដើម»៕ LA