ទិដ្ឋភាពទីក្រុងដូហា ប្រទេសកាតា។ រូបថត AFP
ទីក្រុងដូហាៈ កាតាជាប្រទេសអ្នកមានដោយសារប្រេងបានបើកទីផ្សារអចលនទ្រព្យរបស់ខ្លួនដល់ជនបរទេសជាមួយគម្រោងការផ្តល់ឱ្យអ្នកទាំងនោះដែលទិញផ្ទះ ឬហាង នូវសិទ្ធិហៅថា «ផ្ទះនៅប្រទេសតំបន់ឈូងសមុទ្រ»។
.jpg)
គម្រោងដែលបានប្រកាសកាលពីខែកញ្ញាជាផែនការចុងក្រោយបំផុតនៃវិធានការដែលបានរៀបចំឡើងដើម្បីធ្វើពិពិធកម្មសេដ្ឋកិច្ចប្រទេសកាតាងាកចេញពីការពឹងផ្អែកលើវិស័យប្រេង និងទាក់ទាញមូលធនបរទេសនៅមុនព្រឹត្តិការណ៍ប្រកួតបាល់ទាត់ពិភពលោកឆ្នាំ ២០២២។
បុគ្គលអ្នកមានទ្រព្យសម្បត្តិច្រើនត្រូវបានអញ្ជើញឱ្យទៅមើលតំបន់គម្រោងអគារនៅចុងប៉មមាត់សមុទ្រនៃកោះគុជដែលបានបង្កើតឡើងនៅទីក្រុង ដូហា ឬគម្រោងទីក្រុង Lusail ថ្មីដែលនៅជិតពហុកីឡដ្ឋានបាល់ទាត់ពិភពលោក។ អង្គភាពលក់រាយនៅតាមផ្សារទំនើបក៏មានលក្ខណៈគ្រប់គ្រាន់សម្រាប់អ្នកទិញស្នាក់នៅផងដែរ។
យោងតាមសន្ទស្សន៍ថ្លៃរបស់ ValuStrat ដែលជាក្រុមហ៊ុនប្រឹក្សាយោបល់សម្រាប់ អចលនទ្រព្យលំនៅឋាន កំណែទម្រង់នេះក៏អាចជួយធ្វើឱ្យមានការផ្គត់ផ្គង់លើសចំនួនផងដែរ។
កាលពីពេលមុន អ្នកវិនិយោគត្រូវការការគាំទ្រពីបណ្តាអាជីវកម្មកាតា ឬក៏បុគ្គលសម្រាប់លំនៅឋាន ប៉ុន្តែពេលនេះការទិញអចលនទ្រព្យតម្លៃ ២០ ម៉ឺនដុល្លារធានាចំពោះតាំងទីលំនៅបណ្តោះអាសន្នសម្រាប់ភាពជាម្ចាស់។ ការទិញតម្លៃ ១ លានដុល្លារនឹងមានផលប្រយោជន៍នៃការតាំងទីលំនៅអចិន្រៃ្តយ៍រួមទាំងការសិក្សា និងសេវាសុខភាពមិនបង់ថ្លៃ។
អ្នកស្រី Tina Chadda ប្រធានទីផ្សារដែលជាជនជាតិកេនយ៉ាដែលបានរស់នៅក្នុងប្រទេសកាតារយៈពេល ១៥ ឆ្នាំបាននិយាយថា៖ «ខ្ញុំគិតថា ខ្ញុំអាចហៅថា ជាផ្ទះខ្ញុំនៅកាតា។ ខ្ញុំមានអារម្មណ៍ថា កាន់តែមានផាសុកភាព»។
Chadda និយាយថា ទិដ្ឋាការក៏នឹងអនុញ្ញាតឱ្យនាងនាំយកគ្រួសាររួមទាំងឪពុកម្តាយចាស់ជរាពីទីក្រុង Nairobi ប្រទេសកេនយ៉ាទៅកាន់ប្រទេសកាតា ផងដែរ ដោយបន្ថែម៖ «វាជាប្រទេសមានសុវត្ថិភាពប្រៀបធៀបទៅនឹងប្រទេសកេនយ៉ា»។
បណ្តាប្រទេសនៅតំបន់ឈូងសមុទ្រពែរ្ស៍បានពឹងផ្អែកជាយូរមកហើយលើជំនាញ និងបទពិសោធបរទេសដើម្បីប្រែក្លាយប្រាក់ដុល្លារបានពីការលក់ប្រេងរបស់ពួកគេទៅក្នុងទីក្រុងដែលពោរពេញដោយអគារក្នុងតំបន់នេះ ប៉ុន្តែកម្រធ្វើវាឱ្យងាយស្រួល ឬថោកសម្រាប់ជនបរទេសដើម្បីទៅរស់នៅជាអចិន្រៃ្តយ៍នោះ។
គម្រោងស្រដៀងគ្នានេះក៏មាននៅប្រទេសផ្សេងក្នុងតំបន់ឈូងសមុទ្រ ប៉ុន្តែសម្រាប់ការចំណាយខ្ពស់ជាងច្រើនណាស់។ ទីក្រុងឌូបៃ ផ្តល់ជូនទិដ្ឋាការស្នាក់នៅរយៈពេល ១០ ឆ្នាំ សម្រាប់ការវិនិយោគដែលមានតម្លៃ ២,៧ លានដុល្លារ ដោយ ៤០ ភាគរយ នៃទឹកប្រាក់នេះត្រូវតែនៅក្នុងអចលនទ្រព្យ៕ RR
