អ្នកស្រី ឈរ ចាន់នី (ទី ៣ ពីឆ្វេង) ក្នុងកម្មវិធីផ្សព្វផ្សាយសេវារបស់អ្នកស្រីកាលពីថ្ងៃចន្ទ។ រូបថត សហការី
ភ្នំពេញៈ ភ្នាក់ងារអចលនទ្រព្យ Team Channy ដែលមានមូលដ្ឋាននៅអាមេរិក និងទទួលបានអាជ្ញាប័ណ្ណផ្នែកអចលនទ្រព្យពីក្រុមហ៊ុនអចលនទ្រព្យ Remax Top Producers របស់អាមេរិកបានចាប់ផ្តើមផ្ដល់សេវាទិញ និងជួលអចលនទ្រព្យសម្រាប់អតិថិជនកម្ពុជាដែលស្វែងរកការវិនិយោគលើអចលនទ្រព្យនៅអាមេរិក។
.jpg)
អ្នកស្រី ឈរ ចាន់នី ប្រធានក្រុមរបស់ភ្នាក់ងារ Team Channy ដែលមានបទពិសោធជាង ១០ ឆ្នាំក្នុងទីផ្សារអចលនទ្រព្យនៅអាមេរិកបានប្រាប់ភ្នំពេញប៉ុស្ដិ៍កាលពីថ្ងៃអង្គារថា បើទោះជាមិនមានសញ្ជាតិអាមេរិក ឬមិនមានសិទ្ធិរស់នៅអាមេរិកក្តី ក៏ប្រជាជនកម្ពុជាអាចវិនិយោគលើអចលនទ្រព្យនៅទីនោះបានដោយមិនមានការភ័យខ្លាច។
អ្នកស្រីថ្លែងថា៖ «ក្រុមរបស់ខ្ញុំនឹងជួយសម្រួលដល់អ្នកដែលចង់បានផ្ទះ និងចង់ឲ្យកូនៗរបស់ពួកគេសិក្សានៅទីនោះ ហើយពួកគេក៏អាចទិញផ្ទះសម្រាប់ការវិនិយោគ ឬជួលផងដែរ ដែលក្រុមរបស់យើងនឹងជួយស្វែងរកអតិថិជន [ដើម្បីជួល ឬលក់ចេញវិញ]»។
អ្នកស្រី Channy បានឲ្យដឹងថា ជាមួយនឹងបទពិសោធជាង ១០ ឆ្នាំ លើអចលនទ្រព្យនៅអាមេរិក ក្រុមរបស់អ្នកស្រីបានជួយដល់ប្រជាជនកម្ពុជាក្នុងការទិញផ្ទះនៅអាមេរិកដោយមានឯកសារស្របច្បាប់។ បច្ចុប្បន្នមានអតិថិជនប្រហែល ១០ នាក់មកពីប្រទេស កម្ពុជា ដែលបានទិញផ្ទះនៅអាមេរិក។
អ្នកស្រីបន្តថា៖ «អតិថិជនមានសិទ្ធិក្នុងការទិញអចលនទ្រព្យនៅអាមេរិក ដោយពួកគេត្រូវមានប្រាក់ ២៥ ភាគរយនៃតម្លៃអចលនទ្រព្យ [ដែលត្រូវទិញ] ហើយប្រាក់ដែលនៅសល់ស្វែងរកកម្ចីពីធនាគារ»។
ដោយប្រៀបធៀបជាមួយតំបន់កំពុងអភិវឌ្ឍន៍នៅអាមេរិក អ្នកស្រីបន្ថែមថា៖ «យើងមើលឃើញថា តម្លៃផ្ទះនៅអាមេរិកនៅពេលបច្ចុប្បន្នមានតម្លៃប្រហាក់ប្រហែលគ្នានឹងប្រទេសកម្ពុជា ដូច្នេះពួកគេគួរតែពិចារណាវា»។
អ្នកស្រីបានប្រាប់ភ្នំពេញប៉ុស្ដិ៍ថា ដោយការវិនិយោគលើអចលនទ្រព្យនៅកម្ពុជាស្ទើរតែពឹងផ្អែកទាំងស្រុងលើការវិនិយោគិនពីបរទេស ជាពិសេសក្រុមវិនិយោគិនចិននោះ ហើយស្របពេលដែលរដ្ឋាភិបាលបានឈប់ចេញអាជ្ញាប័ណ្ណសម្រាប់ប្រតិបត្តិការភ្នាល់ល្បែងតាមអ៊ីនធឺណិតទាំងនេះនឹងមានផលប៉ះពាល់អវិជ្ជមានលើវិស័យអចលនទ្រព្យនៅកម្ពុជា។
លោកស្រីបន្តថា៖ «យើងគិតថា ទីផ្សារអចលនទ្រព្យអាមេរិកមានស្ថិរភាពជាងនៅកម្ពុជា ដោយសារវាពឹងផ្អែកខ្លាំងលើក្រុមវិនិយោគិនបរទេស ដូច្នេះតម្លៃនឹងកើនឡើង និងធ្លាក់ចុះដោយសារក្រុមវិនិយោគិនទាំងនោះជាអ្នកកំណត់វា។ យើងជឿជាក់ថា ការទិញលំនៅឋាននៅអាមេរិកនឹងផ្ដល់មោទនភាព និងទទួលបានប្រាក់ចំណេញច្រើនជាងនៅទីនេះ»។
ព្រឹត្តិបត្រស្ថិតិជញ្ជីងទូទាត់របស់ធនាគារជាតិនៃកម្ពុជា (NBC) បានឲ្យដឹងកាលពីសប្ដាហ៍មុនថា ការវិនិយោគផ្ទាល់នៅក្រៅប្រទេសរបស់កម្ពុជាបានធ្លាក់ចុះ ១៣,៤៥ ភាគរយ ក្នុងអំឡុងពេល ៩ ខែដំបូងកាលពីឆ្នាំមុនធៀបនឹងរយៈពេលដូចគ្នាកាលពីឆ្នាំ ២០១៨ មកនៅត្រឹមចំនួន ៨១,៣៨ លានដុល្លារពីចំនួន ៩៤,០៣ លានដុល្លារ។
នៅឆ្នាំ ២០១៨ ការវិនិយោគផ្ទាល់នៅក្រៅប្រទេសរបស់កម្ពុជាមានតម្លៃជាង ១២២,៩ លានដុល្លារ កើន ៧,៧៣ ភាគរយ ពី ១១៤,០៨ លានដុល្លារកាលពីឆ្នាំ ២០១៧។
ទោះយ៉ាងណា របាយការណ៍នេះមិនបានបញ្ជាក់ពីឈ្មោះប្រទេសដែលកម្ពុជាបានវិនិយោគនោះទេ៕ LA
