ពិព័រណ៍ពាណិជ្ជកម្មថៃ Top Thai Brands 2020 ប្រារព្ធធ្វើឡើងនៅមជ្ឈមណ្ឌលពិព័រណ៍កោះពេជ្រចាប់ពីថ្ងៃទី ៦-៩ ខែកុម្ភៈ ឆ្នាំ ២០២០ ។
ផលិតផលជាច្រើនប្រភេទដែលមកពីទឹកដីនៃស្នាមញញឹមបានមកដល់ព្រះរាជាណាចក្រហើយគឺការតាំងពិព័រណ៍ពាណិជ្ជកម្មថៃ TOP THAI BRANDS 2020 ចាប់ពីថ្ងៃទី ៦-៩ ខែកុម្ភៈនេះ ដែលកំពុងប្រារព្ធធ្វើឡើងនៅឯមជ្ឈមណ្ឌលពិព័រណ៍ និងសន្និបាតកោះពេជ្រ។
.jpg)
ការតាំងពិព័រណ៍ដ៏ធំនេះមានក្រុមហ៊ុនប្រមាណ ២០០ ក្រុមហ៊ុនបានចូលរួម ដាក់តាំងបង្ហាញផលិតផលរបស់ពួកគេដែលមានរហូតដល់ ២៩០ ស្តង់ ដើម្បីផ្តល់នូវជម្រើសសម្បូរបែបសម្រាប់អតិថិជនជ្រើសរើស។ ផលិតផលទាំងនេះមានដូចជា ម្ហូបអាហារ ភេសជ្ជៈ សម្លៀកបំពាក់ គ្រឿងសម្អាង ផលិតផលប្រើប្រាស់ក្នុងផ្ទះ ផលិតផលសម្រាប់ទារក គ្រឿងអេឡិចត្រូនិក និងផលិតផលជាច្រើនប្រភេទទៀត។
ក្រុមហ៊ុនថៃល្បីៗដូចជា Singha Corporation Co Ltd, Charoen Pokphand Group (CP), Mitr Phol Group និង Charoen Pokphand Group (CP) រួមនឹងសហគ្រាសខ្នាតតូច និងមធ្យមជាច្រើនទៀតបានចូលរួមការតាំងពិព័រណ៍នេះ។
លោក Jirawuth Suwanna-Arj អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃក្នុងទីក្រុងភ្នំពេញបានឲ្យភ្នំពេញប៉ុស្តិ៍ដឹងថា៖ «ពិព័រណ៍ពាណិជ្ជកម្មថៃ TOP THAI BRANDS 2020 ក្នុងឆ្នាំនេះគឺជាព្រឹត្តិការណ៍កាន់តែពិសេសពីព្រោះជាឆ្នាំនៃខួបលើកទី ៧០ នៃទំនាក់ទំនងការទូតរវាងប្រទេសថៃ និងកម្ពុជា»។
ការតាំងពិព័រណ៍នេះមានក្រុមហ៊ុនចូលរួមជាង ២០០ និងមាន ២៩០ ស្តង់។
ទំហំពាណិជ្ជកម្មទ្វេភាគីនៃប្រទេសសមាជិកអាស៊ានជិតខាងគ្នានេះមានជាង ៩,៤ ពាន់លានដុល្លារកាលពីឆ្នាំមុន នេះបើយោងតាមស្ថានទូតថៃនៅក្នុងរាជធានីភ្នំពេញ។
ប្រទេសថៃបាននាំចេញទំនិញមកកម្ពុជាមានជាង ៧,១ ពាន់លានដុល្លារ ខណៈនាំចូលទំនិញពីកម្ពុជាមានជាង ២,២ ពាន់លានដុល្លារកាលពីឆ្នាំមុន។
យោងតាមលោក Jirawuth បានឲ្យដឹងថា ការនាំចេញភាគច្រើនពីកម្ពុជាទៅកាន់ប្រទេសថៃរួមមានផ្លែស្វាយ ត្រីទឹកសាប គ្រឿងសមុទ្រ និងខ្សែភ្លើងជាដើម។
លោកបន្ថែមថា ទំនិញភាគច្រើនដែលថៃនាំចូលមកកម្ពុជាគឺពាក់ព័ន្ធផ្នែកចំណីអាហារ បដិសណ្ឋារកិច្ច ឬទំនិញសម្រាប់ប្រើប្រាស់ក្នុងគេហដ្ឋានជាដើម។
ជាមួយនឹងការកើនឡើងនៃចំណង់ចំណូលចិត្ត និងការគាំទ្រផលិតផលថៃពីសំណាក់អតិថិជនទូទៅ តួលេខនេះអាចនឹងកើនឡើងនៅឆ្នាំក្រោយ។
លោក Jirawuth ថ្លែងថា៖ «យើងជឿជាក់ថា ទីផ្សារនឹងរីកចម្រើនជារៀងរាល់ឆ្នាំ។ មិនមានកត្តាអវិជ្ជមានណាមួយដែលធ្វើឲ្យប៉ះពាល់ដល់ពាណិជ្ជកម្មទ្វេភាគីនេះទេ»។
សហព័ន្ធសមាគមសហគ្រាសធុនតូច និងមធ្យមកម្ពុជាបានប្រកាសកាលពីឆ្នាំមុនថា ទំនិញរបស់កម្ពុជាប្រមាណ ៣០ មុខនឹងត្រូវយកទៅលក់នៅក្នុងហាង 7-Eleven របស់ថៃនៅដើមឆ្នាំ ២០២០។
អតិថិជនមានជម្រើសច្រើនជាមួយនឹងទំនិញគុណភាពខ្ពស់ដ៏សម្បូរបែប។
លោក Jirawuth លើកឡើងថាការិយាល័យរបស់លោកក៏នឹងលើកទឹកចិត្តដល់ខ្សែចង្វាក់តូចៗដូចជាក្រុមហ៊ុន Tesco Lotus និងសហគ្រិនខ្នាតតូចជាដើមឲ្យទិញទំនិញពីប្រទេសកម្ពុជាបន្ថែមទៀត។ ប៉ុន្តែទោះយ៉ាងណាក៏ដោយបញ្ហាប្រឈមសំខាន់គឺថាផលិតផលកម្ពុជាត្រូវបំពេញតាមស្តង់ដាអន្តរជាតិ មុនពេលទំនិញទាំងនោះត្រូវបានលក់បានទូលំទូលាយដល់អតិថិជនថៃ។
ពិធីបើកសម្ពោធសាកល្បងធ្វើឡើងនៅថ្ងៃទី ៦ ខែកុម្ភៈដែលនឹងក្លាយជាឱកាសមួយសម្រាប់ពាណិជ្ជករកម្ពុជា និងសមភាគីថៃដើម្បីស្វែងរកឱកាសនាំចេញ-នាំចូល ទំនិញ។
ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មថៃលោក Jurin Laksanavisit នឹងធ្វើជាអធិបតីក្នុងពិធីបើកសម្ពោធជាផ្លូវការនៃព្រឹត្តិការណ៍តាំងពិព័រណ៍នេះនៅវេលាម៉ោង ៦ ល្ងាចថ្ងៃទី ៧ ខែកុម្ភៈ។
ទន្ទឹមនឹងនេះដែរអ្នកចូលរួមនឹងបានរីករាយជាមួយការប្រគំតន្ត្រីពីសំណាក់តារាចម្រៀងថៃ និងកម្ពុជាល្បីៗជាច្រើនរូបដែលមកសម្តែងជូនទស្សនិកជនទស្សនាជារៀងរាល់យប់។
នៅក្នុងការតាំងពិព័រណ៍នេះ អ្នកចូលរួមក៏អាចទទួលបានបទពិសោធដ៏អស្ចារ្យ ជាមួយសេវាកម្មម៉ាស្សាដ៏ល្បីល្បាញរបស់ប្រទេសថៃផងដែរ។
លោកអ្នកអាចអញ្ជើញចូលរួមទស្សនាការតាំងពិព័រណ៍ពាណិជ្ជកម្មថៃ Top Thai Brands ដ៏ធំប្រចាំឆ្នាំលើកទី ៥ នេះដោយសេរី ហើយសម្រាប់ការតាំងពិព័រណ៍រយៈពេល ៤ ថ្ងៃក្នុងឆ្នាំនេះគេរំពឹងថានឹងមានអ្នកចូលរួមជាង ២ ម៉ឺននាក់៕
