មេចុងភៅល្បីលោក លូ ម៉េង (ឆ្វេង) និងលោក Malcolm Lee (ស្តាំ) ក្នុងពិធីច្នៃប្រឌិតម្ហូបខ្មែរ និងសិង្ហបុរី។
ដៃ ៤ វប្បធម៌ ២ និងមុខម្ហូប ៥ មុខត្រូវបានរៀបចំឡើងនៅភោជនីយដ្ឋានសេវិនស៊ី ដើម្បីបង្ហាញអំពីមុខម្ហូបប្រពៃណីរបស់មេចុងភៅដ៏ល្បីល្បាញចំនួន ២ រូប។
.jpg)
ដៃ ៤ គឺចង់សំដៅទៅដល់ថ្វីដៃចម្អិនម្ហូបរបស់មេចុងភៅជនជាតិខ្មែរលោក លូ ម៉េង និងមេចុងភៅសិង្ហបុរីលំដាប់ផ្កាយ Michelin លោក Malcolm Lee ដែលបានរួមគ្នាចម្អិនម្ហូបដ៏ពិសេសសម្រាប់ភ្ញៀវកិត្តិយសចំនួន ៧០ នាក់ និងចម្អិនដោយប្រើប្រាស់គ្រឿងផ្សំក្នុងស្រុកស្រស់ៗ។
ព្រឹត្តិការណ៍ចម្អិនម្ហូបដ៏អស្ចារ្យនេះត្រូវបានធ្វើឡើងកាលពីថ្ងៃទី ១៦ ខែកុម្ភៈស្របពេលជាមួយនឹងការប្រារព្ធខួបទី ៥៥ ឆ្នាំនៃទំនាក់ទំនងការទូតរវាងកម្ពុជាសិង្ហបុរីផងដែរ។
ព្រឹត្តិការណ៍ចម្អិនម្ហូបពេលល្ងាចដ៏រំភើបនោះ មេចុងភៅទាំង ២ បានចម្អិនម្ហូបពិសេសចំនួន ៥ មុខ និងបង្អែមដ៏មានឱជារសគួបផ្សំនឹងស្រាដ៏ឈ្ងុយឆ្ងាញ់។
លោក លូ ម៉េង ដែលជាស្ថាបនិក និងជានាយកប្រតិបត្តិក្រុមហ៊ុន Almond Hospitality Group ថ្លែងថាគោលបំណងរបស់លោកគឺផ្តល់ជូននូវម្ហូបខ្មែរពិតៗនឹងរក្សានូវរសជាតិដើម ខណៈលោកកំពុងខិតខំជំរុញមុខម្ហូបកម្ពុជាឲ្យទៅដល់កម្រិតពិភពលោកដូចម្ហូបល្បីៗនៅលើពិភពលោកដទៃទៀត តាមរយៈការប្រើប្រាស់គ្រឿងផ្សំក្នុងស្រុក។
លោកបានលើកឡើងអំពី «សម្លកកូរត្រី» ជាសម្លប្រពៃណីរបស់កម្ពុជា ប្រើប្រាស់គ្រឿងផ្សំ និងបន្លែស្រស់ៗក្នុងស្រុកច្រើនមុខលាយបញ្ចូលគ្នា ទទួលទានជាមួយបាយអង្ករផ្កាម្លិះជាអង្ករដ៏ឈ្ងុយឆ្ងាញ់របស់កម្ពុជា។
សម្លកកូរសាច់ត្រីដែលច្នៃប្រឌិតដោយមេចុងភៅល្បីលោក លូ ម៉េង ។
លោក លូ ម៉េង បានបង្កើតភោជនីយដ្ឋានចំនួន ១១ សាខានៅក្រោមម៉ាកយីហោ Almond Hospitality Group ក្នុងនោះរួមមានភោជនីយដ្ឋានអាហារចិន យី សាង ភោជនីយដ្ឋានម្ហូបអន្តរជាតិ World Dining ភោជនីយដ្ឋានអាហារជប៉ុន Kanji ភោជនីយដ្ឋានអាហារសមុទ្រ សេវិនស៊ី ភោជនីយដ្ឋានអាហារខ្មែរ Uy Kuyteav និង Kroeung និងសណ្ឋាគារ Almond Hotels។
ចំពោះលោក Lee ដែលជាមេចុងភៅលំដាប់ផ្កាយ Michelin មានភោជនីយដ្ឋាន Peranakan ដែលមានមុខម្ហូបពិសេស Candlenut នៅក្នុងប្រទេសសិង្ហបុរី។
នៅក្នុងពិធីនេះដែរ មេចុងភៅដែលមានអាយុ ៣៥ រូបនេះបានចម្អិនមុខម្ហូបការីសាច់ក្តាមបែបសិង្ហបុរីដោយប្រើប្រាស់គ្រឿងផ្សំក្នុងស្រុកស្រស់ៗអមដោយខ្ទិះដូង ស្រូបជាមួយនំបញ្ចុកខ្មែរដ៏ឈ្ងុយឆ្ងាញ់។
មេចុងភៅ Lee ប្រកាន់ខ្ជាប់នូវគំនិតច្នៃមុខម្ហូបរបស់លោកតាមរយៈការលាយបញ្ចូលគ្នាចាប់តាំងពីការចាប់កំណើតភោជនីយដ្ឋាន Peranakan ដែលឆ្លុះបញ្ចាំងពីការចាប់កំណើតរបស់ប្រទេសសិង្ហបុរី។
«ភោជនីយដ្ឋាន Peranakan គឺជាការលាយបញ្ចូលគ្នារវាងរសជាតិបែបចិន និងម៉ាឡេ។ ខ្ញុំគឺជាមនុស្សជំនាន់ទី ៥ ហើយមុខម្ហូបដែលមាននៅភោជនីយដ្ឋាន Peranakan របស់ខ្ញុំគឺ មានតមកពីក្រុមគ្រួសាររបស់ខ្ញុំ។
ទទួលទានអមជាមួយស្រាមកពីប្រទេសនូវែលសេឡង់ និងអូស្ត្រាលីលោក Darren Gall ដែលជាអ្នកជំនាញខាងស្រាក៏បានចែករំលែកទស្សនៈរបស់លោកអំពីស្រា និងអត្ថប្រយោជន៍ និងរបៀបទទួលទានស្រាជាមួយមុខម្ហូបប្រភេទណាឲ្យបានត្រឹមត្រូវ និងមានឱជារសឆ្ងាញ់។
លោក Gall ថ្លែងថា៖« ខ្ញុំដឹងថាស្រាប្រភេទណាត្រូវនឹងមុខម្ហូបអ្វី ដើម្បីពេលផឹកទៅវាផ្តល់នូវរសជាតិឈ្ងុយឆ្ងាញ់ត្រូវនឹងមុខម្ហូប ដែលវាបង្កើននូវបទពិសោធនៃការទទួលទានអាហារទាំងមូលកាន់តែអស្ចារ្យ»។
សម្លការីក្តាមបែបសិង្ហបុរី ចម្អិន និងច្នៃប្រឌិតដោយមេចុងភៅ Malcolm Lee ។
ក្នុងពិធីនេះមានការទទួលទានស្រា Catalina Sauvignon Blanc មកពីតំបន់ Marlborough ប្រទេសនូវែលសេឡង់ និង ស្រា Nanny Goat Vineyard Pinot Noir មកពីតំបន់ Central Otago អមជាមួយបង្អែមអំបុក ផ្លែមៀន ការ៉េមចេក និងចេកឆាបជាបង្អែមកម្ពុជា និងបង្អែម Buah Keluak Bon Bon តំណាងឱ្យប្រទេសសិង្ហបុរី»។
លោក Lee និងលោក លូ ម៉េង លើកឡើងថា ពិធីទទួលទានអាហារពេលល្ងាច Four Hands Dinner នេះគឺជាឱកាសមួយសម្រាប់ពួកគាត់ទាំង ២ ក្នុងការផ្លាស់ប្តូរទស្សនៈគ្នា ហើយក៏ជាឱកាសមួយដើម្បីបង្កើនជំនាញរបស់ពួកគេផងដែរ។
លើសពីនេះទៀតម្រេចកំពតដ៏ល្បីល្បាញអាចមាននៅក្នុងបញ្ជីមុខម្ហូប Candlenut របស់ភោជនីយដ្ឋាន Peranakan ផងដែរ។
លោក លូ ម៉េង ថ្លែងថា៖ «យើងជាចុងភៅមានឱកាសក្លាយជាឯកអគ្គរដ្ឋទូតសម្រាប់ផលិតផល។ យើងចែករំលែកទស្សនៈតាមរយៈការជួបជជែកគ្នា។ ការបង្កើតមុខម្ហូបប្រមាណ ៧០ ភាគរយចេញមកពីអ្នកដទៃ ខណៈ ៣០ ភាគរយជារបស់យើងផ្ទាល់ ដូច្នេះវាគឺជាអ្វីដែលខ្ញុំតែងតែព្យាយាមច្នៃប្រឌិតនឹងបង្កើននៅក្នុងមុខម្ហូបនីមួយៗរបស់យើង»។
លោក Lee និងលោក លូ ម៉េង ថ្លែងដោយយល់ស្របគ្នាថា៖ «គ្រឿងផ្សំសំខាន់បំផុតគឺសេចក្តីស្រឡាញ់»។
ភោជនីយដ្ឋានអាហារសមុទ្រសេវិនស៊ីមានទីតាំងស្ថិតនៅក្នុងសណ្ឋាគារ Almond Hotel Bassac ក្បែរស្ពានឥន្ទធនូក្នុងខណ្ឌចំការមន៕
