លោក ម៉ានូ រ៉ាចាន់ អគ្គនាយកធនាគារឯកទេស វីង និងលោក ផល វ៉ាន់ឌី នាយកប្រតិបត្តិ CMA ចាប់ដៃគ្នាក្នុងពិធីចុះ MoU កាលពីថ្ងៃសុក្រកន្លងទៅ។ រូបថត សហការី
ធនាគារឯកទេស វីង (ខេមបូឌា) លីមីតធីត បានបោះជំហានមួយទៀតប្រកបដោយភាពច្នៃប្រឌិត ដើម្បីលើកកម្ពស់បរិយាប័ន្នហិរញ្ញវត្ថុនៅក្នុងប្រទេសកម្ពុជា។
.jpg)
កាលពីសប្តាហ៍មុន ធនាគារឯកទេស វីង ដែលជាអ្នកផ្តល់សេវាធនាគារចល័តឈានមុខគេបានចាប់ដៃគូជាមួយសមាគមមីក្រូហិរញ្ញវត្ថុកម្ពុជា (CMA) ដើម្បីផ្តល់ដំណោះស្រាយងាយស្រួលក្នុងការទូទាត់ប្រាក់ដល់សមាជិករបស់ខ្លួន តាមរយៈកម្មវិធីស្មាតហ្វូនវីងនៅតាមភ្នាក់ងាររបស់ខ្លួន។
ភាពជាដៃគូថ្មីនេះ អនុញ្ញាតឱ្យសមាជិករបស់ CMA ចំនួន ១០១ អាចធ្វើការបង់ប្រាក់របស់ពួកគេតាមរយៈសេវាកម្មវីងនៅទូទាំងប្រទេស។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង មានប្រសាសន៍ថា៖ « ជាមួយនឹងវីង ការបង់ថ្លៃសមាជិកភាពរបស់សមាគមមីក្រូហិរញ្ញវត្ថុកម្ពុជា គឺអាចធ្វើទៅបានដោយងាយស្រួល ដោយលោកអ្នកគ្រាន់តែប្រើម្រាមដៃចុចលើកម្មវិធីស្មាតហ្វូនវីង ឬទៅបង់តាមបណ្តាញភ្នាក់ងារវីងដែលមាននៅទូទាំងប្រទេស»។
«យើងមានសេចក្តីរីករាយក្រៃលែងក្នុងការធ្វើជាដៃគូជាមួយសមាគមមីក្រូហិរញ្ញវត្ថុកម្ពុជាដើម្បីពាំនាំនូវបច្ចេកវិទ្យាចុងក្រោយបំផុត និងសមត្ថភាពដើម្បីគាំទ្រការរីកចម្រើនរបស់គ្រឹះស្ថានមីក្រូហិរញ្ញវត្ថុនៅកម្ពុជា»។
ធនាគារឯកទេសវីងជាអ្នកផ្តល់សេវាធនាគារចល័តឈានមុខគេនៅកម្ពុជា។ រូបថត សហការី
ធនាគារឯកទេសវីងដែលជាអ្នកផ្តល់សេវាធនាគារចល័តនៅកម្ពុជាបានចុះ ហត្ថលេខាលើអនុស្សរណៈនៃការយោគយល់គ្នាជាមួយ CMA កាលពីថ្ងៃទី ៣១ ខែមករាកន្លងទៅ ដើម្បីប្រកាសនូវការដាក់ចេញសេវាកម្មថ្មីនេះ។
អស់រយៈពេល ១១ ឆ្នាំកន្លងមកនេះធនាគារឯកទេសវីងបានបង្កើតប្រព័ន្ធប្រតិបត្តិការហិរញ្ញវត្ថុចល័តយ៉ាងរឹងមាំដែលឆ្លើយតបទៅនឹងតម្រូវការរបស់ប្រជាជនកម្ពុជានៅទូទាំងខេត្តតាមរយៈការផ្តល់ជូននូវសេវាកម្មជាច្រើនដូចជា ការផ្ទេរប្រាក់ ការទូទាត់វិក្កយបត្រ ការបញ្ចូលទឹកប្រាក់តាមទូរស័ព្ទ និងការទូទាត់សាច់ប្រាក់តាមរយៈប្រព័ន្ធអ៊ីនធឺណិត និងក្រៅប្រព័ន្ធអ៊ីនធឺណិត។
លោក ផល វ៉ាន់ឌី នាយកប្រតិបត្តិ CMA ថ្លែងថា៖ « ការប្រើប្រាស់ជម្រើសនៃការបង់ប្រាក់ដែលមានបណ្តាញរឹងមាំ និងប្រកបដោយសុវត្ថិភាពបែបនេះ វាជាការបោះជំហានដ៏សំខាន់សម្រាប់យើង ពីព្រោះយើងបានស្វែងរកមធ្យោបាយជាច្រើនដើម្បីផ្តល់ជូនអតិថិជនរបស់យើងប្រកបដោយភាពងាយស្រួលក្នុងការប្រើប្រាស់បច្ចេកវិទ្យាថ្មីៗ»។
វាគឺជាការផ្លាស់ប្តូរមួយដ៏សំខាន់ពីព្រោះការរៀបចំនេះនឹងជួយដល់សមាជិក CMA បានប្រមាណ ៨០ ភាគរយដែលនៅតំបន់ជនបទ ហើយភាគច្រើននៃពួកគេគឺជាស្ត្រី។
លោក ម៉ានូ រ៉ាចាន់ ថ្លែងថា៖ «យើងចាត់ទុកថានេះគឺជាឱកាសដើម្បីចាប់ដៃគូជាមួយសមាគមដ៏មានវិជ្ជាជីវៈ និងធំបំផុតមួយនៅកម្ពុជាដែលជាការទទួលស្គាល់មួយផ្សេងទៀតចំពោះការយកចិត្តទុកដាក់ដល់អតិថិជន វីង និងសមត្ថភាពក្នុងការប្រើប្រាស់បច្ចេកវិទ្យាដើម្បីធ្វើឱ្យជីវិតប្រជាជនកម្ពុជាក្រីក្ររាប់លាននាក់កាន់តែប្រសើរឡើង»។
CMA មានសមាជិកគ្រឹះស្ថានមីក្រូហិរញ្ញវត្ថុចំនួន ១០១។ រូបថត សហការី
«ខ្ញុំរីករាយណាស់ដែលវីងនិង CMA មានចក្ខុវិស័យដូចគ្នាក្នុងការលើកកម្ពស់បរិយាប័ន្នហិរញ្ញវត្ថុតាមរយៈការផ្តល់សេវាហិរញ្ញវត្ថុងាយស្រួលដល់ប្រជាជនកម្ពុជា។ អស់រយៈពេល ១១ ឆ្នាំកន្លងមកនេះ វីងបានប្តេជ្ញាចិត្ត ដើម្បីធានាថា ប្រជាជនកម្ពុជាទទួលបាននូវភាពងាយស្រួល និងសុវត្ថិភាព នៅពេលដែលនិយាយដល់សេវាកម្មហិរញ្ញវត្ថុចល័ត»។
លោក ម៉ានូ រ៉ាចាន់ បានបន្ថែមទៀតថា៖ «វាគឺជាការប្តេជ្ញាចិត្តរបស់យើងក្នុងការធ្វើឱ្យមានភាពខុសគ្នាជាមូលដ្ឋាននៅក្នុងកម្រិតជីវភាពរស់នៅក្នុងព្រះរាជាណាចក្រកម្ពុជាក៏ដូចជាដើម្បីឆ្ពោះទៅរកការសម្រេចគោលដៅរបស់យើងក្នុងការបង្កើតសង្គមដែលមិនប្រើសាច់ប្រាក់»។
លោកបានបន្ថែមទៀតថា CMA បានធ្វើបដិវត្តន៍ឧស្សាហកម្មមីក្រូហិរញ្ញវត្ថុនៅកម្ពុជា និងបានធ្វើជាគំរូដ៏ល្អមួយសម្រាប់ពិភពលោកទាំងមូល ដើម្បីយកតម្រាប់តាមក្នុងការផ្តល់ជូននូវភាពងាយស្រួលក្នុងការទទួលបានហិរញ្ញវត្ថុសម្រាប់ប្រជាជនកម្ពុជារាប់លាននាក់ទាំងអ្នកមាន និង គ្មានគណនីធនាគារ។
«វីងមានមោទនភាពដែលក្លាយជាផ្នែកនៃដំណើរជោគជ័យនេះតាមរយៈសមត្ថភាពរបស់យើងក្នុងនាមជាធនាគារឯកទេសដែលផ្តល់ការទូទាត់ប្រាក់នៅក្នុងព្រះរាជាណាចក្រ»៕
