លោកស្រី Chan Katarina (រូបអាវខ្មៅ) ប្រធានគ្រប់គ្រងហាងលក់មាន់បំពង Louisiana Chicken ក្នុងទីក្រុងភ្នំពេញ។
ហាងលក់មាន់បំពងដ៏ល្បីល្បាញ Louisiana Famous Fried Chicken (LFFC) បានមកដល់ទឹកដីកំណើតរបស់ម្ចាស់វាហើយកាលពីឆ្នាំមុន ជាមួយនឹងការបើកហាងទី ១ នៅកម្ពុជាក្នុងផ្សារទំនើប ជីប ម៉ុង ណូរ៉ូ ម៉ល។
.jpg)
ប្រវត្តិរបស់ហាងមាន់បំពង LFFC គឺបង្ហាញពីជោគជ័យរបស់ពលរដ្ឋខ្មែររស់នៅសហរដ្ឋអាមេរិក ខណៈលោក Michael Eng បានទិញខ្សែចង្វាក់ម្ហូបអាហារនេះទាំងមូលនៅក្នុងឆ្នាំ ២០០៩ បន្ទាប់ពីការខិតខំប្រឹងប្រែងអស់រយៈពេលជិត ២ ទសវត្សរ៍។
ការមកដល់នៃខ្សែចង្វាក់អាហារឆាប់រហ័សអន្តរជាតិនៅកម្ពុជាដែលមានម្ចាស់ជាជនជាតិខ្មែរនេះគឺវាបានបង្ហាញពីការតស៊ូ និងបានជំរុញទឹកចិត្តលោកស្រី Chan Katarina ដែលជាអ្នកគ្រប់គ្រងហាងមួយនេះនៅកម្ពុជា។
«រឿងរ៉ាវរបស់លោក Michael Eng គឺពិតជាមានការជំរុញទឹកចិត្តខ្លាំងណាស់។ គ្រប់ទិដ្ឋភាពនៃការខិតខំប្រឹងប្រែងរបស់គាត់ មិនត្រឹមតែបានជំរុញទឹកចិត្តខ្ញុំប៉ុណ្ណោះទេ ប៉ុន្តែក៏បានលើកទឹកចិត្តដល់ពលរដ្ឋខ្មែរជាច្រើនទៀតនៅសហរដ្ឋអាមេរិកផងដែរ។ ក្រៅពីការខិតខំប្រឹងប្រែង លោកក៏មានចក្ខុវិស័យ ការប្តេជ្ញាចិត្ត និងឆន្ទៈខ្ពស់ក្នុងការកាន់កាប់ម៉ាកយីហោ LFFC នេះផងដែរ»។
លោកស្រី Chan Katarina
លោកស្រី Katarina បានបន្តថា៖ «លើសពីនេះទៀតការផ្តោតរបស់គាត់គឺបើកអាជីវកម្មដែលមានម្ចាស់ជាជនជាតិខ្មែរ ដើម្បីបំពេញនូវសេចក្តីស្រឡាញ់របស់គាត់ចំពោះ LFFC និងជាកេរដំណែលខ្មែររបស់គាត់។ វាបានបង្ហាញថា តាមរយៈការខិតខំប្រឹងប្រែង និងការតស៊ូព្យាយាមធ្វើឱ្យក្តីសុបិនរបស់មនុស្សម្នាក់ក្លាយជាការពិតហើយខ្ញុំចង់បន្តកេរដំណែលរបស់គាត់ ដែលជាហាងលក់មាន់បំពង LFFC នៅកម្ពុជាដែលជាមាតុភូមិកំណើតរបស់យើង»។
ប្រវត្តិជោគជ័យរបស់លោក Eng គឺជាផ្នែកមួយនៃការខិតខំប្រឹងប្រែង និងការប្តេជ្ញាចិត្ត។ ដោយបានមកដល់សហរដ្ឋអាមេរិកក្នុងអាយុទើបតែ ១៨ ឆ្នាំ ក្នុងឆ្នាំ ១៩៩២ បន្ទាប់ពីរស់រានមានជីវិតពីរបបខ្មែរក្រហម លោកបានធ្វើការជាអ្នកជូតសម្អាតឥដ្ឋ នៅហាងលក់មាន់បំពង LFFC ក្នុងទីក្រុងឡូសអេនជឺឡេស រដ្ឋកាលីហ្វ័រនីញ៉ា។
ក្នុងរយៈពេល ២ ទសវត្សរ៍ លោក Eng បានក្លាយជាម្ចាស់ហាងមាន់បំពងប្រមាណ ១០០ ហាងនៃខ្សែចង្វាក់ទាំងមូល ដោយបានទិញយកហាងមាន់បំពង Louisiana Famous Fried Chicken ពីស្ថាបនិកឈ្មោះ លោក Joe Dion នៅក្នុងឆ្នាំ ២០០៩ ។
«ខ្ញុំកើតនៅក្នុងទីក្រុងភ្នំពេញ ហើយគ្រួសារខ្ញុំមិនសូវធូរធារនោះទេ ដូច្នេះខ្ញុំមិនបានបញ្ចប់មហាវិទ្យាល័យទេ។ ដោយសង្ឃឹមថានឹងមានអនាគតល្អ ម្ដាយខ្ញុំបានខ្ចីលុយគេ ដើម្បីឱ្យបងស្រីខ្ញុំទៅសហរដ្ឋអាមេរិក»។
«គាត់បានចាប់ផ្តើមធ្វើការជាអ្នកគិតលុយនៅហាង LFFC ក្នុងទីក្រុងឡូសអេនជឺឡេស ប្រឹងប្រែងរកលុយឱ្យបានគ្រប់គ្រាន់ ដើម្បីអាចគ្រប់គ្រងហាងមួយដោយខ្លួនឯងបាន។ ខ្ញុំមានឱកាសបានទៅលេងគាត់ និងជួយអាជីវកម្មរបស់គាត់។ នៅហាងនោះហើយ ដែលចំណង់ចំណូលចិត្តចម្អិនអាហាររបស់ខ្ញុំបានចាប់ផ្តើមកើតមានឡើង»។
«ហើយខ្ញុំគិតថា ហេតុអ្វីមិនបើក ហាងមាន់បំពង LFFC នៅក្នុងទីក្រុងភ្នំពេញ? ខ្ញុំចង់ណែនាំប្រជាជនកម្ពុជាឱ្យស្គាល់រសជាតិអាហារមាន់បំពង LFFC ដែលមានរសជាតិដ៏ឈ្ងុយឆ្ងាញ់»។
លោកស្រី Katarina បន្តថា៖ «ខ្ញុំក៏ចង់នាំមុខម្ហូបភាគខាងត្បូងមកទីផ្សារកម្ពុជា និងផ្តល់ឱកាសឱ្យប្រជាជនកម្ពុជាដទៃទៀតទទួលបានជោគជ័យក្នុងនាមជាម្ចាស់អាជីវកម្មជាមួយនឹងឱកាសអាជីវកម្ម (ហ្វ្រេនឆាយ)។ ហើយបន្ទាប់ពីទទួលបានការយល់ព្រមពីលោក Michael Eng វាក៏បានក្លាយជាការពិត ដោយបានបើកហាង LFFC ដំបូងគេនៅកម្ពុជានៅក្នុងផ្សារទំនើប ជីប ម៉ុង ណូរ៉ូ ម៉ល»។
មាន់បំពងដ៏ល្បីល្បាញប្រចាំហាង Louisiana Famous Fried Chicken ។
ស្ថាបនិក LFFC លោក Dion បាននិយាយនៅក្នុងអត្ថបទមានចំណងជើងថា” How Cambodians became kings of beloved South LA fried chicken chain” ដែលចុះផ្សាយលើកាសែត LA Times ក្នុងឆ្នាំ ២០១៧ ថា៖ «ប្រជាជនកម្ពុជាគឺជាហេតុផលដ៏ធំមួយសម្រាប់ភាពជោគជ័យនៃខ្សែចង្វាក់នេះ»។
លោកស្រី Katarina បានលើកឡើងថា៖ «នៅឆ្នាំ ២០០៩, ៩០ ភាគរយនៃហាងទាំង ១០០ គឺជាកម្មសិទ្ធិរបស់ពលរដ្ឋខ្មែរ ហើយសព្វថ្ងៃនេះមានហាងសរុបចំនួន ១៨៥ នៅលើពិភពលោក»។
«យើងមានហាងនៅប្រទេសបូលីវី និងវៀតណាមក៏ដូចជាប្រទេសកម្ពុជា ប៉ុន្តែភាគច្រើនគឺនៅសហរដ្ឋអាមេរិក ស្របពេលមានគម្រោងបើកហាងលក់សិទ្ធិទៅឱ្យបណ្តាប្រទេសអាស៊ាន និងចិនផងដែរ»។
លោកស្រី Katarina បន្ថែមថា៖ «ជំងឺកូវីដ១៩ បានធ្វើឱ្យគាំងផែនការជាច្រើន រាប់បញ្ចូលទាំងគម្រោងរបស់យើងផងដែរ។ ប៉ុន្តែឆ្នាំនេះយើងគ្រោងបើកហាងបន្ថែមទៀតរួមជាមួយការផ្សព្វផ្សាយឱកាសទទួលសិទ្ធិធ្វើអាជីវកម្ម (ហ្វ្រេនឆាយ) សម្រាប់អ្នកដែលចាប់អារម្មណ៍ក្នុងអាជីវកម្មម្ហូបអាហារ និងភេសជ្ជៈ។ នៅពេលអនាគតដ៏ខ្លី យើងក៏មានគម្រោងបើកសាខានៅក្នុងខេត្តសំខាន់ៗ ដូចជាខេត្តព្រះសីហនុ និងសៀមរាប ជាដើម»។
លោក Dion បើកហាងលក់មាន់បំពង LFFC ដំបូងបង្អស់នៅ South LA ក្នុងឆ្នាំ ១៩៧៦។ បុរសដែលមានដើមកំណើតនៅរដ្ឋ Michigan អះអាងថា លោកបានទទួលរូបមន្តពីចុងភៅលោក Paul Prudhomme មកពីទីក្រុង New Orleans ។
«គ្រឿងផ្សំរបស់ជនជាតិ Cajun ត្រូវបានធ្វើឡើងដោយដៃដោយលាយជាមួយម្សៅពិសេសដើម្បីបំពងសាច់មាន់មានរសជាតិឈ្ងុយឆ្ងាញ់ប្លែកពីមាន់បំពងដទៃ។ គ្រឿងផ្សំទាំងនេះធ្វើឱ្យសាច់មាន់ ''Cajun Kick''n Chicken'' ទទួលបានការពេញនិយមយ៉ាងខ្លាំង»។
«អតិថិជនខ្មែរ និងបរទេសគ្រប់វ័យតែងតែចូលចិត្តមាន់បំពងរបស់យើង ដែលធ្វើឱ្យខ្ញុំសប្បាយចិត្តណាស់។ ភ័ស្តុតាងដែលបង្ហាញថា មាន់បំពងរបស់យើងឆ្ងាញ់ប៉ុនណា គឺអតិថិជនបន្តមកម្តងហើយម្តងទៀត»។
លោកស្រី Katarina បានបញ្ជាក់ថា៖ «យើងទទួលបានសំណើជាច្រើនពីអតិថិជនឱ្យបើកហាងបន្ថែមទៀត ដោយអ្នកខ្លះថែមទាំងស្នើសុំឱកាសធ្វើអាជីវកម្ម ទិញ (ហ្វ្រេនឆាយ) ពីយើងផងដែរ។ ដូច្នេះ ខ្ញុំគិតថាមនុស្សកាន់តែច្រើនជឿជាក់លើរសជាតិដ៏ឈ្ងុយឆ្ងាញ់នៃមាន់បំពងរបស់យើង»៕
