កម្មវិធីសប្បុរសធម៌ក្នុងអំឡុងរាត្រីឆ្លងឆ្នាំដើម្បីរៃអង្គាសថវិកាជួយដល់មន្ទីរពេទ្យកុមារអង្គរខេត្តសៀមររាប។
ក្រុមហ៊ុន Memoire Hotels and Resorts បានត្រៀមខ្លួនរួចជាស្រេចដើម្បីពង្រឹងការប្តេជ្ញាចិត្តក្នុងការធ្វើឲ្យគម្រោងការទទួលខុសត្រូវសង្គម Corporate Social Responsibilities (CSR) ក្លាយជាចំណុចអាទិភាពរបស់ ខ្លួននៅក្នុងឆ្នាំនេះ ទោះបីវាជាផ្នែកមួយនៃយុទ្ធសាស្ត្រអាជីវកម្មរបស់ខ្លួនក្នុងរយៈពេលប៉ុន្មានឆ្នាំនេះក្តី។
.jpg)
ក្នុងនាមជាសាជីវកម្មដ៏ល្អមួយ សណ្ឋាគារដែលមានមូលដ្ឋាននៅខេត្ត សៀមរាប មួយនេះ កំពុងសម្លឹងមើលការរួមចំណែកជួយដល់សហគមន៍មូលដ្ឋាន ដែលនៅជិតប្រតិបត្តិការអាជីវកម្មរបស់ខ្លួន។
លោក Philip Kao ដែលជាស្ថាបនិក និងជាអគ្គនាយកក្រុមហ៊ុន Memoire Hotels and Resorts បានឲ្យកាសែតភ្នំពេញប៉ុស្តិ៍ដឹងថា៖ «គម្រោង CSR របស់យើងគឺផ្តោតលើផ្នែកចំនួន ៣ សំខាន់ៗ ក្នុងនោះរួមមានការកែលម្អបរិស្ថាន លើកកម្ពស់ការអប់រំ និងជំនាញ ព្រមទាំងការគាំទ្រដំណោះស្រាយសង្គមដោយផ្អែកលើទីតាំងអាជីវកម្មរបស់យើង»។
លោក Philip Kao មានមោទនភាព ចំពោះគម្រោង CSR ។
កាលពីពេលថ្មីៗនេះ សណ្ឋាគារបានចាប់ផ្តើមយុទ្ធនាការសប្បុរសធម៌សម្រាប់គម្រោង CSR ឆ្នាំ ២០២០ របស់ខ្លួន ដោយសហការជាមួយ ក្រុមហ៊ុនលក់គ្រឿងអលង្ការ ជាង ប៉ាក់វណ្ណហុង ដើម្បីជួយដល់មន្ទីរពេទ្យកុមារអង្គរ។
កម្មវិធីសប្បុរសធម៌ ក្នុងអំឡុងរាត្រីឆ្លងឆ្នាំសកលនៅសណ្ឋាគារ Memoire Palace Resort & Spa គឺរៃអង្គាសថវិកាសរុបបានចំនួន ៣៧,០៤៨ ដុល្លារអាមេរិក។
ចំពោះកម្មវិធី« Go Green Project» វិញបានរួមចំណែកដល់ដំណោះស្រាយបរិស្ថានយ៉ាងច្រើន តាមរយៈការមិនប្រើប្រាស់ប្លាស្ទិកនៅក្នុងឧស្សាហកម្មទេសចរណ៍ក្នុងខេត្ត សៀមរាប និងទូទាំងប្រទេស ក៏ដូចជា ការផ្តល់អាហារូបត្ថម្ភដល់កុមារ និងលើកកម្ពស់ការអប់រំនៅតាមសហគមន៍ ដែលជាគំនិតផ្តួចផ្តើមនៃគម្រោង CSR របស់សណ្ឋាគារនៅក្នុងឆ្នាំនេះ។
«នៅក្រោមគម្រោង Go-Green Project យើងនឹងចូលរួមនៅក្នុងយុទ្ធនាការ សណ្ឋាគារបៃតង និងទីក្រុងបៃតង ជាមួយក្រសួង ទេសចរណ៍ ហើយនឹងចូលរួមក្នុងយុទ្ធនាការដាំដើមឈើប្រចាំឆ្នាំ នៅក្រោមគម្រោង « មនុស្សម្នាក់ ដើមឈើមួយដើម»។
លោក Philip Kao បន្ថែមថា៖ «យើងមានផែនការមិនប្រើដបប្លាស្ទិកឲ្យបានជាង ៣០០,០០០ ដប នៅក្រោមសណ្ឋាគារ Memoire Hotels &Resorts ហើយបន្តគាំទ្រការមិនប្រើប្លាស្ទិក ដើម្បីការពារបរិស្ថាន ហើយនឹង អនុវត្តគំនិតផ្តួចផ្តើមនេះនៅក្នុងឧស្សាហកម្មទេសចរណ៍នៅខេត្ត សៀមរាប និងប្រទេសកម្ពុជា»។
កម្មវិធីសម្អាតទីក្រុងត្រូវបានធ្វើឡើងកាលពីឆ្នាំកន្លងទៅ។
ក្រុមហ៊ុន Memoire Hotels and Resorts ដែលមានសរុបចំនួន ៣ ក្នុងនោះរួមមាន សណ្ឋាគារ Memoire d''Angkor Boutique Hotel សណ្ឋាគារ Memoire Palace Resort & Spa និងសណ្ឋាគារ Memoire Siem Reap Hotel បានក្លាយជាសណ្ឋាគារដែលគាំទ្រយ៉ាងសកម្ម ជាពិសេស ការលើកស្ទូយក្នុងការការពារបរិស្ថាន និងរួមចំណែកដល់សហគមន៍ដែលស្ថិតនៅក្នុងទឹកដីទេសចរណ៍ដ៏ល្បីល្បាញនេះ។
យោងតាមលោក Kao បានឲ្យដឹងថា នៅក្នុងឆ្នាំនេះ សណ្ឋាគារក៏នឹងលើកកម្ពស់កម្មវិធី« Good Food Programme» ដើម្បីផ្តល់អាហារូបត្ថម្ភដល់កុមារផងដែរ។
លោកបានបន្ថែមថា៖ «យើងនឹងគាំទ្រដល់ការបង្កើតមជ្ឈមណ្ឌលសិក្សាតាមសហគមន៍មួយ នៅភូមិពាក់ស្នែង និងផ្តល់ថវិកាដើម្បីសាងសង់ថ្នាក់រៀនកុំព្យូទ័រ និងផ្តល់កុំព្យូទ័រសម្រាប់កុមារចំនួន ២៥០ នាក់»។
កាលពីឆ្នាំមុនសណ្ឋាគារបានអនុវត្តគម្រោងស្រដៀងគ្នាជាច្រើន ដូចជាយុទ្ធនាការដាំដើមឈើដើម្បីការពារបរិស្ថានពីការផ្លាស់ប្តូរអាកាសធាតុ កម្មវិធីរៃអង្គាសថវិកាជួយមន្ទីរពេទ្យកុមារអង្គរ និងការកាត់បន្ថយការប្រើប្រាស់ដបប្លាស្ទិកជាដើម។
លោក Philip Kao មានប្រសាសន៍ ថា៖ «យើងកាត់បន្ថយការប្រើប្រាស់ដបប្លាស្ទិកបានជាង ៧ ម៉ឺនដប ហើយនៅឆ្នាំ ២០១៩ យើងបានដាក់តាំងបង្ហាញនូវស្នាដៃសិល្បៈដែលផលិតពីប្លាស្ទិក ដើម្បីផ្សព្វផ្សាយអំពីផលប៉ះពាល់នៃការប្រើប្រាស់ប្លាស្ទិកដល់អតិថិជនទាំងជាតិនិងអន្តរជាតិ និងដល់ក្រុមរបស់យើងផងដែរ»។
សូមបញ្ជាក់ថាសណ្ឋាគារ Memoire Palace Resort & Spa ជាសណ្ឋាគារដ៏ទំនើប គ្មានប្លាស្ទិក មានបរិយាកាសដ៏មនោរម្យ ជាពិសេស បន្ទប់ស្នាក់នៅធំទូលាយ មានរហូតដល់ ៦៤ បន្ទប់ ពោរពេញដោយផាសុកភាព និងមានទីតាំងស្ថិតនៅតាមបណ្តោយផ្លូវផ្សារក្រោម ក្រុងសៀមរាប៕
ការដាំដើមឈើគឺជាគម្រោង CSR ដ៏សំខាន់របស់សណ្ឋាគារ។
សណ្ឋាគារជួយដល់កុមារក្រីក្រនៅភូមិពាក់ស្នែងខេត្តសៀមរាប ។
