លោកប្រាក់ សុខុន (ស្ដាំ) និងឯកអគ្គរដ្ឋទូតចិនក្នុងពិធីចុះហត្ថលេខាកាលពីម្សិលមិញ។ សុទ្ធ គឹមសឿន
ភ្នំពេញៈ កម្ពុជាទទួលបានថវិកាចំនួន ៧,៦៦ លានដុល្លារពីកិច្ចព្រមព្រៀងស្តីពីសហប្រតិបត្តិការលើគម្រោងមូលនិធិពិសេស មេគង្គ-ឡានឆាង ដើម្បីគាំទ្រដល់ការអនុវត្តលើផែនការចំនួន ១៩ គម្រោង ខណៈដែលគិតមកទល់ពេលនេះប្រទេស កម្ពុជា បានទទួលគម្រោងសរុបចំនួន ៣៥ មកហើយ។
ការបង្ហាញនេះធ្វើឡើងនៅក្នុងពិធីចុះហត្ថលេខាលើកិច្ចព្រមព្រៀងស្តីពីសហប្រតិបត្តិការលើគម្រោងនៃមូលនិធិពិសេស មេគង្គ-ឡានឆាង រវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិនិងលោក វ៉ាង វិនធាន (Wang Wentain) ឯកអគ្គរដ្ឋទូតចិនប្រចាំកម្ពុជា កាលពីម្សិលមិញនៅទីស្តីការក្រសួងការបរទេស។
លោក ប្រាក់ សុខុន បានថ្លែងថា រដ្ឋាភិបាលសាធារណរដ្ឋប្រជាមានិតចិនបានអនុម័តនិងគាំទ្រផែ្នកហិរញ្ញវត្ថុដល់គម្រោងកម្ពុជាចំនួន ១៩ ដែលគាំទ្រដោយមូលនិធិពិសេសកិច្ចសហប្រតិបត្តិការ មេគង្គ-ឡានឆាង ២០១៨ ដែលមានថវិកាសរុបចំនួន ៧,៦៦ លានដុល្លារអាមេរិក។
.jpg)
លោកបន្តថា ចាប់តាំងពីការបង្កើតកិច្ចសហប្រតិបត្តិការ មេគង្គ-ឡានឆាង ប្រទេស កម្ពុជា បានទទួលគម្រោងសរុបចំនួន ៣៥ ដែលមានវិសាលភាពគ្របដណ្តប់លើសកម្មភាពកិច្ចសហប្រតិបត្តិការក្នុងវិស័យកសិកម្ម ទេសចរណ៍ បច្ចេកទេសព័ត៌មានវិទ្យា អប់រំ និងស្រាវជ្រាវធនធានទឹក អភិវឌ្ឍន៍ជនបទ និងការផ្លាស់ប្តូរផ្នែកវប្បធម៌ និងសាសនា។ គម្រោងមួយចំនួនត្រូវបានបញ្ចប់ជាស្ថាពរ និងគម្រោងដែលនៅសល់ផ្សេងទៀតជិតត្រូវបានបញ្ចប់ ឬមានវឌ្ឍនភាពគួរឲ្យកត់សម្គាល់។
លោកបានបញ្ជាក់ថា ការចុះកិច្ចព្រមព្រៀងនេះ ជាតឹកតាងយ៉ាងច្បាស់លាស់ថា កិច្ចសហប្រតិបត្តិការ មេគង្គ-ឡានឆាង បាននិងកំពុងបោះជំហានទៅមុខយ៉ាងមាំមួនជាមួយនឹងចំណងនៃកិច្ចសហប្រតិបត្តិការដ៏រឹងមាំតាមរយៈគម្រោងទាំងនេះ។ ថ្វីដ្បិតគម្រោងទាំងនេះ មិនមែនជាគម្រោងហេដ្ឋារចនាសម្ព័ន្ធខ្នាតធំ ប៉ុន្តែវាបានផ្តល់អត្ថប្រយោជន៍យ៉ាងច្រើនសម្រាប់អនុតំបន់មេគង្គ នៅក្នុងបរិបទនៃការវិវត្តយ៉ាងឆាប់រហ័សនៃទិន្នន័យនិងការច្នៃប្រឌិតថ្មីៗរបស់ពិភពលោក។
លោក ប្រាក់ សុខុន បានលើកឡើងថា៖ «សមត្ថភាពនៃការចែករំលែក ចំណេះដឹងថ្មី ចំណេះធ្វើ និងបទពិសោធរបស់ប្រទេសមេគង្គ និងចិននេះ ខ្ញុំអាចហៅថា ជាហេដ្ឋារចនាសម្ព័ន្ធទន់ បានជួយបំពេញយ៉ាងល្អទៅដល់ហេដ្ឋារចនាសម្ព័ន្ធរឹងដែលត្រូវបានអនុវត្តក្រោមគម្រោងទ្វេភាគីនិងពហុភាគីដទៃទៀត។ សម្រាប់ខ្ញុំតម្លៃពិតប្រាកដនៃគម្រោងខ្នាតតូចទាំងនេះ គឺវាអាចបង្កើតលទ្ធផលរូបីក្នុងការលើកកម្ពស់ជីវភាពរស់នៅ និងរួមចំណែកដល់សុខុមាលភាពរបស់ប្រជាជន»។
លោក វ៉ាង វិនធាន បានថ្លែងថាកិច្ចសហប្រតិបត្តិការ មេគង្គ-ឡានឆាង គឺជាយន្តការកិច្ចអនុតំបន់ថ្មីដោយមានការប្រឹក្សាយោបល់ការចូលរួមចំណែកនិងផលប្រយោជន៍រួមគ្នារវាងបណ្តាប្រទេសនៅតាមបណ្តោយទន្លេមេគង្គ។ វាមានលក្ខណៈអំណោយផលក្នុងការកាត់បន្ថយគម្លាតនៃការអភិវឌ្ឍនៅអាស៊ាននិងលើកកម្ពស់សមាហរណកម្មអាស៊ានជាទូទៅ។
លោកបន្តថា លើសពីនេះវាជំរុញឲ្យសកលភាវូបនីយកម្មសេដ្ឋកិច្ចដែលបើកចំហរួមបញ្ចូលមានតុល្យភាព និងមានអត្ថប្រយោជន៍ដល់មនុស្សទាំងអស់ «ប្រទេសចំនួន ៦ នៅតាមបណ្តោយទន្លេមេគង្គ គឺមានភាពជិតស្និទ្ធជាមួយគ្នាមិនត្រឹមតែតាមទីតាំងភូមិសាស្ត្រប៉ុណ្ណោះទេ ប៉ុន្តែថែមទាំងនៅក្នុងទំនាក់ទំនងពីបុព្វបុរស និងប្រវត្តិវប្បធម៌ផងដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយបានយល់ឃើញថាកិច្ចសហប្រតិបត្តិការ មេគង្គ-ឡានឆាង គឺជាកិច្ចសហប្រតិបត្តិការពង្រឹងទំនាក់ទំនងពាណិជ្ជកម្ម ការផ្សារភ្ជាប់រវាងប្រជាជនការអភិវឌ្ឍនិងសន្តិសុខតាមតំបន់មេគង្គ ហើយចិននឹងទាញប្រយោជន៍ច្រើនពីកិច្ចសហប្រតិបត្តិការនេះ។
ប៉ុន្តែលោកថា៖ «វាជារឿងធម្មតាក្នុងកិច្ចសហប្រតិបត្តិការដែលមានអ្នកចំណេញតិច ឬច្រើន ហើយគេមិនអាចចោទចិនបានឡើយ។ សំខាន់ជាសមាជិកមួយ កម្ពុជាត្រូវពង្រឹងសមត្ថភាព ភាពឆ្លាតវៃ ខ្លាំង និងបង្កើនភាពដឹកនាំដើម្បីទាញប្រយោជន៍ឲ្យបានច្រើនមកវិញ»។
គម្រោងកម្ពុជាទាំង ១៩ ដែលទទួលបានការគាំទ្រពីមូលនិធិពិសេសនៃកិច្ចសហប្រតិបត្តិការ មេគង្គ-ឡានឆាង ២០១៨ មានដូចជា៖ កម្មវិធីគាំទ្រអាហារូបករណ៍, វគ្គបណ្តុះបណ្តាលស្តីពីការគ្រប់គ្រងគម្រោង, ការកាត់បន្ថយភាពក្រីក្រតាមរយៈការអភិវឌ្ឍសេដ្ឋកិច្ចជនបទ, ការអភិវឌ្ឍសមាហរណកម្មសហគមន៍តាមដងទន្លេមេគង្គ, កិច្ចសន្ទនាអន្តរជំនឿស្តីពីសន្តិភាព និងការអភិវឌ្ឍជានិរន្តរ៍, ពង្រឹងសមត្ថភាពសម្រាប់ការអនុវត្តផែនការយុទ្ធសាស្ត្រគ្រប់គ្រងតំបន់ការពារធម្មជាតិនិងក្របខ័ណ្ឌ, គម្រោងកសាងសមត្ថភាពតាមរយៈកិច្ចសហប្រតិបត្តិការ មេគង្គ-ឡានឆាង សម្រាប់សេដ្ឋកិច្ចឌីជីថល និងគម្រោងផ្សេងៗជាច្រើនទៀត។
សូមបញ្ជាក់ថា កិច្ចសហប្រតិបត្តិការ មេគង្គ-ឡានឆាង ត្រូវបានបង្កើតឡើងក្នុងឆ្នាំ ២០១៥ ដោយមានសមាជិកសរុប ៦ រួមមាន កម្ពុជា ចិន ឡាវ មីយ៉ាន់ម៉ា ថៃ និងវៀតណាម និងផ្តោតសំខាន់លើសសរស្តម្ភ ៣ និងមានវិស័យអាទិភាពចំនួន ៥៕
