កម្មករ​ជាង ២០ រោងចក្រ​ក្នុង​ក្រុង​បាវិត​នៅ​តែ​បន្ត​តវ៉ា


20140429_04a
កម្មកររាប់ពាន់នាក់នៅក្រុងបាវិតធ្វើការតវ៉ាកាលពីថ្ងៃសៅរ៍ ដែលបន្តរហូតដល់ថ្ងៃម្សិលមិញ សហការី

ស្វាយរៀងៈ កម្មករ​រាប់​ពាន់​នាក់​នៅ​ជាង ២០ រោងចក្រ​ក្នុង ក្រុង​បាវិត នៅ​តែ​បន្ត​ធ្វើ​ការ​តវ៉ា​ឈាន​ចូល​ដល់​ថ្ងៃ ទី​៤ កាល​ពី​ម្សិលមិញ​ដើម្បី​ទាម​ទារ​ឲ្យ​ថៅកែ​រោងចក្រ ផ្តល់​ប្រាក់​បន្ថែម​លើក​ទឹក​ចិត្ត​ចំនួន ៥០ ដុល្លារ។

ប្រាក់ ៥០ ដុល្លារ គឺ​ជា​ប្រាក់​លើក​ទឹក​ចិត្ត​ដែល​ថៅកែ​រោងចក្រ​ខ្លះ ក្នុង ក្រុង​បាវិត បាន​ផ្តល់​ឲ្យ​កម្មករ​ដែល​មិន​ចូល​រួម​ធ្វើ​បាតុកម្ម ឬ​កូដកម្ម ចាប់​តាំង​ពី​ដើម ខែ​មករា មក។

លោក ខាត់ ឡូត អនុ​ប្រធាន​សម្ព័ន្ធ​ចលនា​កម្មករ​កម្ពុជា​បាន​ឲ្យ​ដឹង​កាល​ពី​ម្សិលមិញ​ថា កម្មករ​ជាង ២០ រោងចក្រ​ក្នុង​តំបន់​សេដ្ឋកិច្ច​ពិសេស មេនហានធេន និង​ប្រមាណ ៤ រោងចក្រ​នៅ​ក្នុង​តំបន់​សេដ្ឋកិច្ច​ពិសេស តាយសេង បាន​ដើរ​ចេញ​ពី​ការងារ​របស់​ពួក​គេ ដែល​បង្ខំ​ឲ្យ​រោងចក្រ​សម្រេច​ចិត្ត​បិទ​ទ្វារ​ដោយ​សារ​ខ្លាច​មាន​ការ​ប៉ះ​ទង្គិច​ណា​មួយ​កើត​ឡើង។ «កម្មករ​មិន​ចូល​ធ្វើការ​ទេ​ដោយ​សារ​ពួក​គេ​មិន​បាន​ទទួល​នូវ​អ្វី​ដែល​ពួក​គេ​បាន​ទាម​ទារ​ហើយ​ការ​ទាមទារ​នេះ​មិន​ដឹង​ពេល​ណា​បញ្ចប់​ទេ»។

កាល​ពី​ថ្ងៃ​សុក្រ និង​ថ្ងៃ​សៅរ៍ កម្មករ​រាប់​ពាន់​នាក់ នៅ​ក្នុង​តំបន់​សេដ្ឋកិច្ច​ពិសេស មេនហាតធេន និង​រោងចក្រ​មួយ​ចំនួន​នៅ​តំបន់​សេដ្ឋកិច្ច​ពិសេស តាយសេង បាន​នាំ​គ្នា​ដើរ​ចេញ​ពី​ការងារ​ដោយ​ធ្វើ​ការ​ទាម​ទារ​ប្រាក់​បន្ថែម​ចំនួន ៥០ ដុល្លារ​ពី​ថៅកែ​របស់​ពួក​គេ ដែល​ការ​តវ៉ា​នេះ បាន​បន្ត​មក​ដល់​ថ្ងៃ​ចន្ទ​ម្សិលមិញ។ បន្ទាប់​ពី​ចូល​ឆ្នាំ​ខ្មែរ កម្មករ​រោងចក្រ​ចំនួន ៣ បាន​នាំ​គ្នី​គ្នា​ធ្វើ​ការ​តវ៉ា​ទាមទារ​ប្រាក់​បន្ថែម​ចំនួន ៥០ ដុល្លារ​និង​សុំ​ឲ្យ​ទទួល​យក​តំណាង​ពួក​គេ​ចំនួន ៤៣ នាក់​ចូល​ធ្វើ​ការ​វិញ ប៉ុន្តែ​មាន​កម្មករ​នៅ​រោងចក្រ​ខ្លះ បាន​ត្រឡប់​ចូល​ធ្វើ​ការ​វិញ ដោយ​សារ​រោងចក្រ​យល់​ព្រម​តាម​សំណើ​របស់​កម្មករ។

លោក ហាស់ ប៊ុនធី ប្រធាន​មន្ទីរ​ការងារ ខេត្ត​ស្វាយរៀង បាន​ឲ្យ​ដឹង​កាល​ពី​ថ្ងៃ​ម្សិលមិញ​ថា លោក​បាន​ប្រជុំ​ជាមួយ​នឹង​មន្រ្តី​រោងចក្រ និង​សមាគម​រោងចក្រ​កាត់ដេរ​នៅ កម្ពុជា ពី​បញ្ហា​ការ​ទាមទារ​របស់​កម្មករ ប៉ុន្តែ​មក​ដល់​ពេល​នេះ មិន​ទាន់​មាន​ដំណោះស្រាយ​នៅ​ឡើយ​ទេ។ លោក​ថ្លែង​ថា៖ «ខាង​រោងចក្រ​គេ​ថា គេ​មិន​អាច​ផ្តល់​ជូន​តាម​ការ​ទាមទារ​របស់​កម្មករ​បាន​ទេ ដោយ​សារ​តែ​ក្រុមហ៊ុន​មិន​បាន​សន្យា​ផ្តល់​ឲ្យ​ពួក​គេ»។ លោក ហាស់ ប៊ុនធី បាន​បន្ថែម​ទៀត​ថា អាជ្ញាធរ​នៅ​តែ​បន្ត​ពង្រឹង​សុវត្ថិភាព​ដល់​កម្មករ និង​រោងចក្រ ដើម្បី​ការពារ​ក្រែង​មាន​អំពើ​ហិង្សា​កើត​មាន​ឡើង​ជាយថាហេតុ។

ជាមួយ​គ្នា​នេះ​ដែរ កាល​ពី​ថ្ងៃ​ម្សិលមិញ​តំណាង​កម្មករ​ប្រមាណ ៥០០ នាក់​ក្នុង​ចំណោម​ជាង ២០០០ នាក់​មក​ពី​រោងចក្រ អ៊ីចេង នៅ​តាម​បណ្តោយ​ផ្លូវ​ជាតិ​លេខ ៣ បាន​ជិះ​រថយន្ត​ទៅ​កាន់​សាលា ខេត្ត​តាកែវ ដើម្បី​ស្នើ​សុំ​ឲ្យ​លោក​អភិបាល​ខេត្ត​ជួយ​អន្តរាគមន៍។

លោក ប៉ាវ ស៊ីណា ប្រធាន​សម្ព័ន្ធ​ចលនា​កម្មករ​កម្ពុជា​ដែល​ជួយ​អន្តរាគមន៍​លើ​ករណី​នេះ បាន​និយាយ​ថា កម្មករ​ទាំង​អស់​នៅ​រោងចក្រ​នេះ បាន​ធ្វើ​ការ​ទាម​ទារ​នូវ​លក្ខខណ្ឌ​ការងារ​មួយ​ចំនួន​តាំង​ពី​ថ្ងៃ ទី​២១ ខែ​មេសា មក​តែ​មិន​មាន​ដំណោះស្រាយ​រហូត​មក​ដល់​ពេល​នេះ។ លោក​ថ្លែង​ថា៖ «លោក​អភិបាល​ខេត្ត​បាន​សន្យា​ថា នឹង​ចុះ​មក​ធ្វើ​ការ​ដោះស្រាយ​នៅ​រោងចក្រ​នៅ​ថ្ងៃ​ស្អែក (ថ្ងៃ​នេះ) បន្ទាប់​ពី​កម្មករ​បាន​នាំ​គ្នា​ទៅ​កាន់​សាលា​ខេត្ត»៕

ព័ត៌មានថ្មីៗ